Deuteronomiyo 21 - Emakhuwa Bible

Ikano mwaha wa mutthu oovettuliwa

¹ Aphwanyiwa mutthu ookhweene ntuphini mwa elapweene yeeyo Yave Mulukwaanyu onoovahaaweni weera mukuxe ahisuweliwaka omwiivale,

² asitokweenaanyu ni aphukaanyu erowekewo weera yaphime orakama weenraaya okhuma vamuttemboni mpaka mmasidadeni soowaattamana.

³ Vano asitokweene a esidade eneera ekhuveelaxe muttembo emukuxeke mwaamombe ohitonke ovareliwa muteko naari ohiteexihiwe murindi.

⁴ Vahoolowaya emurongheke vareyareyani ohinalimmwewo naari ohinaaliwewo ni nraayawo nxaapa antthimakaayawo maahi. Nyuwosa mwakhumuleke exiko ya mwaamombe.

⁵ Hiiho asaserdoti* a ekhapira ya Leevi, yaphiyeke, niwoko Yave Mulukwaanyu aathanlenle ohoolela ni ovaha mareeliho mwa Nsina na Yave ni oreherera milattu sootheene sa ivilamuhano ni mapuhero.

⁶ Vahoolowaya asitokweene ootheene a esidade yaattamelanxe muttembo enyaweleke wa mwaamombeni mwa yoowo okhumuleliwe exiko vareyareyani

⁷ yeeraka: “Matataahu khaamwiivale ola naari maithwaahu khaamoonne opanke yeela.

⁸ Ii! Yave, mwaakhelele wiiraana wu wa mulokwaanyu aYixrayeli mwa yaawosa ngwooponlaanyu ni muhithorihe mulokwaanyu niwoko na okhwa wa mulopwana oohikhalano nthowa.” Hiiho nthowa na okhwa nnooleveleliwa.

⁹ Mooteene yoowo nyeenyuweenesa munimwiimalihera nthowa noomwiiva mukina oohikhalano nthowa mweenre mpakaka yeeyo eri yooreera vamaithoni wa Muluku.

Asithiyana ootthukiwa

¹⁰ Nyuwosa mwaawananaka amwiittanaanyu Yave Mulukwaanyu anawinnyerera mmatatanimwanyu munaatthukasa,

¹¹ mmoha a nyuwosa anamoona muthiyana ooreeraxa ootthukiwa anamusivela, amutheleke.

¹² Amurowaneke owannyawe, ammettheke mayihi ni amutherekeleke mankharu,

¹³ ni aruleke ikuwo aavaraniwaawe. Aamalihakaru owiinanela atithwawe ni amayawe akhalaka owannyawe wa mweereene owo, vahoolowaya munroweleke ni owo akhaleke mwaarinyu ni nyuwo mukhaleke aiyawe.

¹⁴ Owo aahinsivela, amuhiyeke arowaka ontthunaawe. Muhimuthumihe hoye hoye muhimpake epottha, niwoko mulopwana owo oomveiha.

Soophwanela sa ontthaara

¹⁵ Mulopwana mmoha awaatteya asithiyana eeli anamukupali mmoha a yaawo, ni ooweeli anaayarano anamwane, ntthaara nakhala na muthiyana ohinimukupalaawe,

¹⁶ vano mulopwana owo aarehererelaka yoohiyeriwa anamwanaawe, ahimvaheke soophwanela sa ntthaara mwaana a muthiyana ookhupaleya, mwaana a muthiyana ohinimukupalaawe vekhaikhai akhala ntthaara.

¹⁷ Owo attittimihereleke ntthaara na muthiyana ohinimukupalaawe, amvahaka iphura sa sooreelasawe sootheene. Mwaana owo ti eneneero yoopacera ya ikuru sa atithawe. Soophwanela sa ontthaara ti sawawe.

Anamwane oottiyamaaru

¹⁸ Mulopwana akhalano mwaana mulopwana oottiyamaaru khaleeleya, ahiwiiwelelaka atithawe ni amayawe yaamulakaka,

¹⁹ atithawe ni amayawe emuroiheke wa ahooleli a muloko a vamulako wa esidadaawe.

²⁰ Awo eweereleke ahooleli: “Mwanihu mulopwana ola ti oottiyamaaru. Khaleeleya, khaniiwaru nsunahu; ori oohuureya ni namuhapaliwa.”

²¹ Vano asilopwana ootheene a esidadaawe emvonyeke maluku mpaka okhwa. Mmalihe yoonanara ela variyariwanyu. aYixrayeli ootheene anoosuwela yeeyo ni animoova.

Ikano soohiyanahiyana

²² Mulopwana mmoha athoriheliwa okhwa niwoko na wiiva, anaphwanela wiiviwa wa otthukeleliwa mmwirini,

²³ muhihiye mutembwaawe otthukeleliweene ohiyu wootheene. Muvithe nihuku nenenenno, niwoko yoowo onthomeiwa mmwirini ti oolaphiwa ni Muluku. Muhivalihe elapo Yave Mulukwaanyu onoovahaaweni ntoko yoohiyeriwa.