Deuteronomiyo 2 - Emakhuwa Bible

Iyaakha munikareni

¹ Vahoolowaya naahokoleela ottuli, nnarowa onikareni nikuxeraka ephiro enkela Ephareiya Yooxeera, ntoko Yave aakilamulenlaawe. Naaheetta iyaakha sincipale niviraviraka elapo ya mmanyaakoni sa oSeyiri.

² Vano Yave aakeerela:

³ “Nyuwosa khamureere weettasa mviravirasaka elapo ya mmanyaakoni iya. Vano, murowaseke mpatta wa ottuttuwani.

⁴ Muleele muloko: ‘Nyuwosa munoovira mweelaponi ya axunninyu, ekhapira ya Esawu ankhala oSeyiri. Awosa eniyeereke owoovasani, mene mwiipasoope nnenesene.

⁵ Muhaatannyase, niwoko nkoovahasaniru mpatta wa elapwaaya, hata vakhaani. Koomvaha Esawu okuxa elapo ya mmanyaakoni sa oSeyiri.

⁶ Nyuwosa mwalivase ni eparatha* wa yooca muneeraanyu mwace ni maahi muneeraanyu mwawure.’”

⁷ Yave Mulukwaanyu ohooreelihasani mmitekonimwanyu sootheene. Owo aahookosoopani mmukwahanimwanyu munikareni ntokweene nna. Iyaakha miloko mixexe iye Yave Mulukwaanyu aari ni nyuwo ehoohaleelakani etthu.

⁸ Hiiho naavira elapo ya axunnihu, ekhapira ya Esawu yaakhala oSeyiri. Vahoolowaya naavira wookela wa wAraba, wElati ni wEzeyoni-Geberi. Naahokolowa nikottoombelaka wookela nikare na oMowabe.

⁹ Vano Yave aakeerela: “Muhaaxupe aMowabe naari muhaatannyere ekhotto, niwoko nkoovahasani mpatta wa elapwaayasa. Elapo ya wAri kohinnyerera ekhapira ya Loti.”

¹⁰ Khalayi awEmiti ti yaakhalawo; waari muloko woolipaxa, woowaatta ni woorakamaxa ntoko awAnaki.

¹¹ Awosa yiitthaniwa aRefayimi, hiiho ntoko awAnaki, mene aMowabe yaawiitthana awEmiti.

¹² Khalayeenetho aGori yaakhala oSeyiri, mene ekhapira ya Esawu yaawoomolawo. Yaahaaphwata aGori, eniitekihasa mmapuronimwaya, ntoko aYixrayeli yaapankaaya mweelaponi Yave aavanghaawe.

¹³ Yave aaheera: “Mvenyase ni mulapuwase nreyareya na oZeredi.” Hiiho naalapuwa nreyareya nne.

¹⁴ Nivennyeene oKadexi-Bareneya saavira iyaakha miloko miraru niithannatthaaru mpaka olapuwa nreyareya na oZeredi. Mweehuhuweene yeele ekhapira yootheene ya anakhotto ti eriheiyaaya variyari wa waakonelingwe, ntoko Yave aaroromelinghaawe.

¹⁵ Yave aahaattaruxa ni ommaleloniwaya aahaatoloxa ootheene variyari wa waakonelingwe.

¹⁶ Ekhwiiyeene anakhotto ootheene a muloko,

¹⁷ Yave aakeerela:

¹⁸ “Olelo munoovira mweelaponi ya oMowabe wAri.

¹⁹ Mwaakhuveelaka awAmoni, muhaaxupe naari muhaatannyere ekhotto, niwoko nkoovahasaniru mpatta wa elapwaaya keenre kivahaka ekhapira ya Loti.”

²⁰ Elapo ele yiitthaniwatho elapo ya aRefayimi yaakhalaayawo khalayi. Wa soothesene, awAmoni yaawiitthana aZamezumi.

²¹ Waari muloko woolipaxa, woowaatta ni woorakamaxa ntoko awAnaki. Yave aahaaphwata ohoolo wa awAmoni mwa yaawo yaawoomonle, eniitekiha mmapuronimwaya.

²² Yave aapaka mooteene yoowo eerelaka ekhapira ya Esawu yaakhala oSeyiri aaphwantaawe aGori ohoolowaya. Ekhapira ya Esawu yaawoomola, eniitekiha mmapuronimwaya mpaka olelo.

²³ Ti yeeyo yaakhumelenletho awAwi yaakhala mmittettheni soowaattamela oGaza. aKaftori erweelaka oKaftori yaahaaphwata, eniitekiha mmapuronimwaya.

Owiniwa wa Sihoni, mwene a oHexeboni

²⁴ “Murowe ni mwalapuwe nreyareya na wArenoni. Moone, koowinnyererani Sihoni, ngwAmori, mwene a oHexeboni, mmatatanimwanyu vamoha ni elapwaawe. Mpacere waakamela elapo ele mwaawananaka.

²⁵ Olelo vaava kinoopacera woopopiha moovasiwaka nyuwo mmilokoni sootheene sa elapo ya vathi. Iyo siiwaru epilaanyu nsithukumelase ni othanana.”

²⁶ Onikareni na oKedemoti kaamurumihela anamitthenga Sihoni, mwene a oHexeboni, kimurumihelaka murettele keeraka:

²⁷ “Munihiye nivire elapwaanyu. Nnivire ni musewe paahi, nihihapuwelakaru mpatta mukina.

²⁸ Munithumihere yooca weera nice ni maahi weera niwure. Nnooliva. Munihiye niviraka paahi vathi,

²⁹ ntoko yaanitthunihenraaya ekhapira ya Esawu enkhala oSeyiri ni aMowabe ankhala wAri. Hiyo nintthuna omulapuwa Yordanu weera navolowe elapo Yave Mulukwaahu onnivahaawe.”

³⁰ Wa soothesene, Sihoni, mwene a oHexeboni, aakhootta oniviriha. Yave Mulukwaanyu aamuttiihamaaru amuumihaka murimaawe weera amwinnyerere mmatatanimwanyu ntoko onooneyaaya olelo.

³¹ Yave aakeerela: “Moone, kingwinnyererani nyuwo Sihoni ni elapwaawe. Vano mpacere waakamela mukuxaka elapo.”

³² Sihoni ni anakhottwaawe ootheene aahoorwa oniwanano oYahazi.

³³ Yave Mulukwaahu ooninnyerera mmatatanimwahu ni naamwiiva vamoha ni anamwanaawe asilopwana ni anakhottwaawe ootheene.

³⁴ Ehuhuweene yeele naakuxa isidadesawe sootheene, ninamaliha ophwata, niwiivasaka alopwana, athiyana ni anamwane. Khanaamuhiyaleru mutthu.

³⁵ Naahalanne paahi asinama ni soohuhula sa isidade soowiniwa.

³⁶ Naawina okhuma wAroweri munxaapwani na wArenoni ni esidade eri nreyareya nimoharu nenno mpaka oGiliyade. Khayaariwo esidade nooceelaahu. Yave Mulukwaahu ooninnyerera sootheene.

³⁷ Wa soothesene, mwaasemba elapo yootheene ya awAmoni, elapo ya mukerekhere mooloko Yaboke nitho isidade sa mmanyaakoni, ntoko Yave Mulukwaahu aanilamulenlaawe.