Deuteronomiyo 19 - Emakhuwa Bible

Ikano mwaha wa isidade sootthawela

¹ Yave Mulukwaanyu aaphwataka miloko sa elapweene yeeyo onoovahaaweni, ni nyuwosa moomolaka munaakamela mmasidadenimwaya ni impasaya,

² vano muthanle isidade tthaaru sootthawelamo siri eriyari ya elapo Yave Mulukwaanyu onoovahaaweni weera mwakuxe.

³ Muhule misewe sinrowawo ni mukawanyihe mipatta miraru elapo Yave Mulukwaanyu onoovahaaweni ntoko yoohiyeriwa weera yoowo anaamwiive mutthu atthawelekemo.

⁴ Ti ala meerelo mwaha wa mulopwana anaamwiive mukina anaatthawelewo iivuluxaka: yoowo anaamwiive mukhwaawe mweerisani, woohilakela, yahiittanneene.

⁵ Ntoko ha: mulopwana mmoha arowa ni muthamwenaawe othikila ikhuuni moothakoni, ni, athikilaka hiihaale epaso yamukhuleela mukhwaawe, anakhwa, owo atthaweleke esidade emoha emoha ya seiyo weera iivuluxe.

⁶ Ohiyanawaya nakukuttula ohononeliwe aahimuttharelele oonyoonyiweene mpaka omuphwanya warakamaxawo aaheereke, omwiiva, waaroohiphwanelaru, niwoko khiittanne ni mukhwaawe.

⁷ Tivawo koolamulenlaakani othanla isidade tthaaru sootthawela.

⁸ Yave Mulukwaanyu aandyeerera elapwaanyu ntoko aaroromelinghaawe ni nlipelo makholowaanyu oovahakani elapo yootheene aaroromelinghaawe yaawosa,

⁹ vano muthanletho isidade tthaaru. Eyo eniyereiye nyuwosa mwiiwelela oororomeleyeene malamulo ala kinoolamulelaakani olelo, eyo tiiyo omusivela Yave Mulukwaanyu ni weetta mphironimwawe mahuku ootheene.

¹⁰ Mpake yeeyo weera ehivuuviheriwe ephome yoohinthowa mweelaponimwanyu, mwa yeeyo Yave Mulukwaanyu onoovahaaweni ntoko yoohiyeriwa ni weera muhikhalane nthowa na oyeehiwa wa ephome.

¹¹ Wa soothesene, mukina amusoonda mukhwaawe, amwiipithelaka mphironi, anamukarawela mpaka omwiiva ni atthawela musidade emoha emoha ya seiyo,

¹² asitokweene a esidadaawe elamuleleke oroihiwa musidade otthawenlaawemo ni emwinnyerereke mmatatani mwa nakukuttula ohononeliwe weera akhwe.

¹³ Muhimmorele ikharari. Mmalihe variyari wa aYixrayeli nthowa noomwiiva mukina woohikhalano nthowa weera sootheene siweetteleni nnenesene.

¹⁴ Muhiceendye ikanyero sa nyiinano sa mwaattamwanaanyu yiikaathiyaaya makholowaanyu mwa yoohiyeriwaanyu mweelaponi Yave Mulukwaanyu onoovahaaweni weera mwakuxe.

¹⁵ Khoonkwana omuthorihela mutthu ni namoona mmoha yakhalaru yoonanara yootakhala naari yoottheka. Yoowoothera ontthuneya waakhuleliwa ni ekhavihero ya anamoona eeli hoye hoye araru.

¹⁶ Akhala namoona oowootha amoothera mukhwaawe yakhalaru yoonanara,

¹⁷ asilopwana eeli awo yiixoonihere vamaithoni wa Yave ohoolo wa asaserdoti* ni aphuki eniirumeele ehuhuweene yeeyo.

¹⁸ Aphuki yaasaasereke mulattu owo, ni, waakhuleliwa weera namoothera ohootha amootheraka mukhwaawe,

¹⁹ vano munttaruxele yeeyo aamvaanelenlaawe munneiye. Mmalihe yoonanara variyariwanyu.

²⁰ Atthu akinaawo yasuwela yeeyo animoova, kheerwatho epakeya etthu siiyeela eriyaraanyu.

²¹ Muhimmorele ikharari – mulivanyihe okumi ni okumi; niitho nniitho; niino nniino; ntata ni ntata; nnaawo ni nnaawo.