Deuteronomiyo 17 - Emakhuwa Bible

¹ Muhimpakele Yave Mulukwaanyu yooveleela ya emombe elopwana hoye hoye ekhondoolo yoorakala, niwoko ti sa mwiikho wa Yoowo.

² Vano mulopwana hoye hoye muthiyana mmoha onkhala esidade emoha emoha Yave Mulukwaanyu onoovahaaweni aphwanyaniwa apakaka yeeyo Yave Mulukwaanyu ohintthunaawe ananarihaka wiiraanawawe,

³ ahiiwelelaka malamulowaaka niwoko na olapa ni wuuramela miluku sikina hoye hoye nsuwa, mweeri naari ithenyeeri sa wiirimu,

⁴ vano mwasuwela yeeyo, mwaasaasere yaari ettiitthu. Yakhala ettitthu, enaakhuleliwa weera yoopakiwa ehintthuneya oYixrayeli,

⁵ munronghe mulopwana hoye hoye muthiyana owo opanke yoonanara eyo wa mulako wa esidadaanyu ni mumvonye maluku mpaka okhwa.

⁶ Athorihiweke yaakhulenleene anamoona eeli hoye hoye araru ahikhaleke mmoha paahi.

⁷ Eniipacere ovonya maluku ti matata a anamoona awo emvonyaka namathorihiwa ni vahoolowaya a muloko wootheene. Mmalihe yoonanara variyariwanyu.

Olaka wa asaserdoti* ni aphuki

⁸ Vanonto, nakhumelela nthoriho musidadenimwanyu, mulattu woowiiva hoye hoye owanawaniwa naari mulattu mukina muhingweraanyu wuuluma, muroweke vanipuroni Yave Mulukwaanyu aneeraawe athanle.

⁹ Murowe wa asaserdoti* ari aLeevi ni wa mphuki anaakhale mutokweene ehuhuweene yeeyo. Mwaaleele mulattu ni awosa anoohima emalihero.

¹⁰ Mutthareke olakela awo eneeraaya yuulume vanipuroni Yave aneeraawe athanle. Mpake nnenesene sootheene awo eneeraaya yoolamuleleni.

¹¹ Mutthareke ikano anooxuttihaayani ni olakelawaya. Muhihapuweru wa seiyo.

¹² Yoowo aniixoone ahaapwatthaka aphuki hoye hoye asaserdoti* eniimurumeeleke Yave Mulukwaanyu iiviweke. Mmalihe yoonanara variyariwanyu.

¹³ Hiiho muloko wootheene onimwiiwa ni, woovaka, khoonghokoleelatho ovaanya.

Ipakelo sa mwene

¹⁴ Mwaavolowaka mweelaponi Yave Mulukwaanyu aneeraawe oovaheeni, munakuxa yeeyo mwiitekihakawo ni nyuwo mweera: “Nimukhalihe mwene oonilamula ntoko sirinaaya miloko sootheene naattamannaahuno,”

¹⁵ mwiipasoope woomvara mwene aneeraawe amuthanle Yave Mulukwaanyu. Muhimvare omwene namarwa ahikhanle muYixrayeli – owo akhaleke a eriyari ya axunneiye aYixrayeli.

¹⁶ Mwene owo ahikhalanekeru ikavalu* sincipale naari ahihokoloxere muloko wExipitu weera akhaleno ikavalu* sincipale, niwoko Yave Mulukwaanyu aaweerelani: “Muhikuxeretho ephiroweene yeele.”

¹⁷ Owo ahaatheleke asithiyana ancipale weera murimaawe ohihapuxiwe. Ahithukumanyihetho eparatha* hoye hoye eyuuma yoorikaxa yincipale.

¹⁸ Aakilaathelaka ehice ya emwene, alamuleleke opakiwa elivuru ya malamulo yoovarelaawe muteko, eweheriwaka yoopacera enkosoopiwa ni asaserdoti* aLeevi.

¹⁹ Elivuru eyo eettaneke ni asomeke yeeyo mahuku ootheene a okumaawe weera axuttere omuttittimiha Yave Mulukwaawe iiwelelaka nnenesene malamulo ala ni ikano iya sootheene.

²⁰ Ahiikuxerereke aapwahaka axunneiye aYixrayeli weera ahihapuweru. Hiiho owo ni anamukalampaawe eniilamule mahuku mancipale moomwenenimwawe muYixrayeli.