Deuteronomiyo 16 - Emakhuwa Bible

Masu mwaha wa mPaska

¹ Muupuwelele mweeri wa Abibi mumpakelaka Yave Mulukwaanyu efesta ya mPaska*, niwoko ohiyu wa mweeri wa Abibi ookhumihalaaweeni wExipitu.

² Ehuhu ya mPaska* mumpakele yooveleela Yave Mulukwaanyu mmoha a mihuwosanyu vanipuroni Yave Mulukwaanyu aneeraawe athanle ntoko woomakawo Nsinanawe.

³ Muhikhuureno ipaawu soopakiwa ni eferementu; wa mahuku matannameeli muceeke ipaawu soohikhalano eferementu. Ti epaawu ya moohaawani niwoko mwaakhumme woowaakuveya wExipitu. Hiiho munimuupuwelela mahuku ootheene ehuhu ya okhumawanyu wExipitu.

⁴ Wa mahuku mathannameeli nyuwosa muhiphwanyaniwe yooheliwa eferementu mweelaponimwanyu. Muhixeeleleru enama ya yooveleela ya wiila wa nihuku noopacera ekonaka mpaka waaxiiye.

⁵ Muhipake efesta ya mPaska* mmasidadeni Yave Mulukwaanyu onoovahaaweni,

⁶ ohikhanle vanipuroni Owo aneeraawe athanle ntoko woomakawo Nsinanawe. Mwapakewo efesta ya mPaska* oxekuwa nsuwa nineelaka, mweehuhuni ya okhumawanyu wExipitu.

⁷ Nyuwosa mwaapeyeke enama ni mwakhuureleke vanipuroni Yave Mulukwaanyu aneeraawe athanle. Vano oxeexeloweene khula mutthu a nyuwo ahokoleeleke oheemaniwawe.

⁸ Muceeke ipaawu soohikhalano eferementu wa mahuku mathannamosa, vaheera munihukuni nanaathannameeli muthukumane vamaithoni wa Yave Mulukwaanyu muhivarakaru muteko.

Efesta ya Isimana

⁹ Mwaalikele isimana ithannapiili okhuma ehuhu mpacenraanyu ohepha etrigu.

¹⁰ Vahoolowaya mumpakele Yave Mulukwaanyu efesta ya isimana mumvahaka yooveleela ya otthunawanyu muttharaka mareeliho mwaakhenlaanyu wa Yave Mulukwaanyu.

¹¹ Vanonto muhakalale vamaithoni wa Yave Mulukwaanyu vanipuroni Owo aneeraawe athanle ntoko woomakawo Nsinanawe – nyuwosa, anamwaniinyu, arumeiyaanyu asilopwana ni asithiyana, aLeevi ankhala mmasidadenimwanyu, anamarwa, akwaasuni ni asinaamukhweli ankhala variyariwanyu.

¹² Muupuwelele weera mwaari ipottha wExipitu ni mwiiwelele nnenesene ikano iya.

Efesta ya Mmikotthani

¹³ Mpake efesta ya mmikotthani wa mahuku mathannameeli muthukumannyeene soohepha mmapuroni emveeriwa* etrigu ni sinaameliwa iwuuva*.

¹⁴ Muhakalale mufestanimwanyu – nyuwosa, anamwaniinyu, arumeiyaanyu asilopwana ni asithiyana, aLeevi ankhala mmasidadenimwanyu, anamarwa, akwaasuni ni asinaamukhweli ankhala variyariwanyu.

¹⁵ Wa mahuku mathannameeli mumpakele Yave Mulukwaanyu efesta ya mmikotthani vanipuroni owo aneeraawe athanle. Yave Mulukwaanyu onooreeliha soohephasanyu sootheene ni sootheene mumvaraanyu ni ohakalalawanyu onookwanela.

¹⁶ Asilopwana ootheene yiixoonihereke ohoolo wa Yave Mulukwaanyu imaara tthaaru vayaakhani vanipuroni Owo aneeraawe athanle – mweehuhuni ya efesta ya ipaawu soohikhalano eferementu, ya isimana ni ya mmikotthoni. Ahikhale anaaphiye ohoolo wa Yave matataru.

¹⁷ Khula mutthu a nyuwosa amuruuhele Yave yamahala attharaka mareeliho aakhenlaawe wa Yave Mulukwaawe.

Apukhi ni mitekosaya

¹⁸ Mwaakhalihe aphuki ni asitokweene akina wa khula epuumba, mmasidadeni sootheene Yave Mulukwaanyu onoovahaaweni ni weera awosa ethorihe muloko ettharaka ekhaikhai.

¹⁹ Muhivirikanyihe ekhaikhai naari muhipake nthalu. Muhaakhulele makhwankwa, niwoko awo anaaphuta owiitho anamiruku ni anghenyengera masu a oororomeleya.

²⁰ Mutthareke ekhaikhai paahi weera mukhaleno okumi ni mukuxe elapo Yave Mulukwaanyu onoovahaaweni.

Olapa woohitthuniheriwa

²¹ Muheemexeru mwiri wootteeliheriwa Axera mukhwipi mwa altaari* muneeraanyu muntekele Yave Mulukwaanyu,

²² naari muheemexeru nrimbu nootteeliheriwa, niwoko Yave Mulukwaanyu onnathanya yeeyo.