Deuteronomiyo 15 - Emakhuwa Bible

Ikano sa khula eyaakha yanaathannapiili

¹ Khula ommaleloni wa eyaakha yanaathanapiili mmaliheke ikoongori sootheene.

² Eyo epakiweke moota ola: khula namakopa amaliheke aamukoongorenlaawe mukhwaawe. Ahikhaleru muYixrayeli anaamukokoce mukhwaawe, niwoko yoohimmwa ehuhu ya Yave omalihiwa wa ikoongori.

³ Muntthuniheriwa omukokoca namarwa, vaheera mmaliheke yakhalaru ekoongori ya axunninyu aYixrayeli.

⁴ Hiiho khakhalaru namahaawa variyariwanyu, niwoko Yave Mulukwaanyu onimooreelihaxani mweelaponi onoovahaaweni ntoko yoohiyeriwa weera mukuxe.

⁵ Vanonto nyuwosa mmwiiweleleke Yave Mulukwaanyu muttharaka malamulo ootheene ala kinoovahakani olelo.

⁶ Yave Mulukwaanyu onimooreelihani ntoko aaroromelinghaawe ni nyuwosa sinimookoongorelani miloko sincipale, mene nyuwosa khamukoongora. Munoolamula miloko sincipale, nto khoowowo muloko onoolamuleni.

⁷ Akhala muYixrayeli mukina ohaangwe yakhalaru esidade ya mulaponi Yave Mulukwaanyu onoovahaaweni, muhimuumele murima hata muhimulipele mmatatani munninyu oohaawa.

⁸ Ohiyanawaya, muhimulipele mmatatani mmoolihaka sootheene ontthunaawe.

⁹ Mwiipasoope weera muhuupuwele ha: “Eyaakha yanaathannapiili yoomaliha ikoongori yookhuveela. Nkintthuna omooliha munnaka oohaawa.” Onoowereya weera owo onoomukhuwelela Yave niwoko na okhoottawanyu ni mmwiphwanyaneye ni soottheka.

¹⁰ Mumvahe ni murima wootheene ohoovoreyakani, niwoko na yeeyo, Yave Mulukwaanyu onooreeliha mitekosanyu sootheene ni sootheene muneeraanyu mpake.

¹¹ Mulaponi anookhala anamahaawa mahuku ootheene. Tivawo kinoolamulenlaakani weera munreerele murima munninyu muYixrayeli okhuma namahaawa mpaka onghaawela mulaponimwanyu.

¹² Munninyu muHeberi mulopwana hoye hoye muthiyana iitthumiha wa nyuwo anoorumeelani iyaakha ithannamosa, vayaakhani yanaathannapiili muntapuxeke.

¹³ Nyuwo mwaamutapuxaka, muhimuhiyeke arowaka matataru.

¹⁴ Mumvahaxeke sa muhuwaanyu, etrigwaanyu ni eviinyuwaanyu. Mumvaheke muttharaka mareeliho Yave Mulukwaanyu oovanghaaweni.

¹⁵ Muupuwelele weera mwaari ipottha wExipitu ni weera Yave Mulukwaanyu oowoopolani. Tivawo kinoovahaakani malamulo ala olelo.

¹⁶ Vaheera murumeiyaanyu aweerelani: “Miyo nkintthuna woohiyani” niwoko na woosivelani nyuwo ni emusaanyu ni na ohithoiwa etthu,

¹⁷ vano mukuxe muttemuttemu ni muthoroleno naarunawe vamulako. Hiiho owo onoothatuwa murumeiyaanyu wa mahuku ootheene. Mumpakele hiihotho murumeiyaanyu muthiyana.

¹⁸ Woomutapuxa murumeiyaanyu, murimaanyu ohoovoreyeni niwoko ophwanela wa mutekwaawe wa iyaakha ithannamosa iyo woopwaha muteko wa namwaakhela. Ohiya yeeyo Yave Mulukwaanyu onooreeliha sootheene muneeraanyu mpake.

Matthaara a mihuwo

¹⁹ Mumvahe Yave Mulukwaanyu khula napunci a ntthaara na mihuwosanyu. Muhivarihe muteko matthaara a imombesanyu naari muhimetthe matthaara a ikhondoolosanyu.

²⁰ Khula eyaakha nyuwo vamoha ni emusaanyu mwakhuurele vamaithoni wa Yave Mulukwaanyu vanipuroni Owo aneeraawe athanle.

²¹ Mwaamunama arakala hoye hoye akhala oohoona naari arakala moota mukina wootepaxa, nyuwo muhimvahe Yave Mulukwaanyu ntoko yooveleela.

²² Mwa yeeyo mwakhuureleke mmasidadenimwanyu. Yaale ootteela ni oohitteela ntoko ekhovelelowaanyu ekhuurekeno, ntoko onkhuureliwaawe naahe hoye hoye eveyado.

²³ Wa soothesene, muhikhuure ephome. Mmiineleke vathi ntoko maahi.