Daniyeli 8 - Emakhuwa Bible

Moonelo wa napunci a ekhondoolo ni a epuri

¹ Vayaakani yanaararu ya olamula wa mwene Beltexazari, miyo, Daniyeli, kaakhalano moonelo mukina, ohiya woopacera.

² Mmoonelonimwaka koonnaaka yaari ti ela: Kaari musidadeni yoolipaxa eniitthaniwa Susani, elapo ya wElami. Mmoonelonimwaka kaari mukerekhere mooloko Ulai.

³ Kaaweha okhopela mooloko ni kaamoona napunci ni manyaka meeli, eemenleene mukerekhere mooloko ni manyakeene yaale yaarakamaxa. Vano nnyaka naamalihenre omela naari noorakamaxa opwaha nikina.

⁴ Kaangwehexexa napunci eetteettaka mpatta wa ninkela nsuwa, ottuttuwani ni ohitto. Khaariworu mwaamunama aawera ongwanano hata waakiha mwa ikurusawe. Aapaka yeeyo aatthunaawe ni aamutepa wunnuwa.

⁵ Miyo nlelo kitthokelelaka yeeyo, wootutuxereya epuri etokotoko yaarweela mpatta ninkela nsuwa ekhalanaka nnyaka eriyari ya maithwaaya. Eyo yaaviravira elapo ya vathi yootheene, ehitavaka vathi.

⁶ Epuri ele yaamwaattamela napunci a manyaka meeli kaamoonnaaka eemenleene mukerekhere mooloko, enamurowela enyoonyaxiweene.

⁷ Kaahoona epuri engwananaka napunci moota woowoopihaxa; yaammana napunci epwexaka manyakaawe. Napunci khaawenre owina ni aamoroxeliwa vathi, ananyikaleliwa ni khaawo aawera omoopola mwa ikuru sa epuri.

⁸ Epuri yaahunnuwaxa, mene ereene ya ikuruxa, nnyakanaya ntokweene naapwexiwa, ni vanipuroniwaya manyaka maxexe matokotoko yaahunnuwa ewehaka mipatta mixexe sa vathi.

⁹ Vannyakani nimoha a yaawo naakhuma nikina nikhaani, mene naahunnuwa woowaakuveya mukuruni niwehaka mpatta wa ohitto, ninkhuma nsuwa ni wa Elapo Yooreeraxa.

¹⁰ Naahunnuwa mpaka waatava anakhotto a wiirimu, nnavonyera vathi sikina sa ithenyeeri sa wiirimu, nnanyikalela.

¹¹ Aahunnuwa moota wooweera aamutannya mutokweene a anakhotto a wiirimu avenxaka yooveleela ya khula nihuku aapakeliwa mutokweene yoowo, ni nipuronawe nootteela naaphwatiwa.

¹² Niwoko na ovaanya, anakhotto a ootteela ni yooveleela ya khula nihuku yaavahiwa nnyaka. Nnyaka nno naamweetteleya nnene mwa sootheene naapakaaya ni ekhaikhai yaavonyeriwa vathi.

¹³ Vano kaawiiwa andyelo etthekulaka ni mmoha a yaawo aamukoha mukhwaawe: “Sookhumelela iya nsimale yaakhani sihimmwale ni moonelo ola? Mpaka yaakhani ovaanya woophwata oneeraaya opwaherere wooceeliha sooveleela sa khula nihuku? Mpaka yaakhani Nipuro Nootteela* ni anakhotto eneeraaya evahereriwe mukuruni mwa nnyaka enyikaleliwaka?”

¹⁴ Owo aakaakhula: “Sootheene iyo sinoomala oxeexelo ni ohiyu 2 300. Vahoolowaya Nipuro Nootteela* nnooraseliwa.”

Gabriyeli ontaphulela moonelo

¹⁵ Miyo, Daniyeli kiwehexexaka moonelo ni keereraka wiiwexexa, ohoolowaka aakhumelela mmoha aalikana ni mutthu.

¹⁶ Kaahiiwa nsu na mulopwana wUlai iitthanaka: “Gabriyeli, munthalihere mulopwana ola etaphulelo ya moonelo.”

¹⁷ Owo aakaattamenlaawe, kaahoova, kinamorela vathi. Owo aakeerela: “Mwaana a mutthu, mwiiwexexe weera moonelo ola onthoonyera ihuhu sa ommaleloni.

¹⁸ Owo uulumaka ni miyo, miyo kiipopheiyeene kaakomoka. Vano aakitava, anakeemexa.”

¹⁹ Owo aakeerela: “Miyo kinimoothaliherani yeeyo eneera ekhumelele muhoolo, mweehuhuni ya isara, niwoko moonelo ola onthoonyera ehuhu ya ommaleloni.

²⁰ Napunci a manyaka meeli mmoonnaanyu onaathoonyera mamwene a oMedesi ni oParesi.

²¹ Epuri ya mapururu mancipale enimuthoonyera mwene a oGresiya ni nnyaka ntokotoko erirari ya maithwaaya ti mwene oopacera.

²² Manyaka maxexe akhumme vanipuroni na nnyaka nenenenno naaphweeye, anthoonyera imwene ixexe sineera sikhumelele mwa muloko owo, mene ohikhalanaka ikhurusene seiyo sa muloko yoowo.

²³ Mweehuhuni yoomalihera ya olamulawaya, ovaanya wa atakhali waatepaka, onookhumelela mwene a oxilili, namawera onyeenga.

²⁴ Owo onoothatuwa oolipaxa, mene khoohiyono ni ikurusawe. Owo onootannyera ophwata woowoopiha ni sinoomweettela nnenesene mwa sootheene aneeraawe apake. Owo onimwaaphwata asilopwana ooweraxa ni atthu ootteela.

²⁵ Onoopakiha weera olokottha weetteleye nnene ni onimwiixoona okhala mutokweene waapwaha akina. Owo onimwaaphata ancipale a yaawosa aniixuupuwela weera nri mmuretteleni ni onoongwanano Mutokweenexa a anamwane asilopwana a mamwene. Vaheera owo onoophwatiwa, mene khoohiyono ni ikuru sa omutthu.

²⁶ Moonelo wa oxeexelo ni ohiyu 2 300 nyuwo moonnaanyu etiitthu, mene muthokorore muxiirini niwoko onthoonyera itthu sa muhooloxa.”

²⁷ Miyo Daniyeli kaakhulumuwaxa, kinavoreiwa mahuku makina. Vahoolowaya kaavenya, kinapwaherera omurumeela mwene. Kaatuthuwa mwaha wa moonelo ole; nkiiwexexa etaphulelowaaya.