Daniyeli 7 - Emakhuwa Bible

Moonelo wa axinama ooluwaxa axexe

¹ Vayaakhani yoopacera ya olamula wa Beltexazari, mwene a oBabiloniya, Daniyeli aaloha ni nyoonelo sikina sikina saavira mmuupuwelonimwawe iixaatalenleene vabeettiniwawe. Owo aalepa nkwasu wa yoolohaawe.

² Daniyeli aahera: “Moolohanimwaka ohiyu kaahoona ni ohoolowaka saakhala ipheyo ixexe sa wiirimu sitekumihaka ephareiya etokotoko.

³ Axinama axexe atokotoko, ekhalelowaaya yoovirikana mukina ni mukhwaawe, yaakhuma mphareiyani.

⁴ Oopacera aari ntoko mwatto akhalanaka mapupha a xaaka. Kaaweha mpaka mapuphaawe yaavasuliwa ni owo aaheemexiwa vathi moota wooweera aaheemela nyetto miili ntoko mutthu, anaakhela murima wa mutthu.

⁵ Vano ohoolowaka kaamoona mwaamunama anaaveeli aalikana ni ursu*. Owo eemenle ni nyetto sa ohoolo ni mmwaano eriyari ya maino aakhalano iparari tthaaru. Aaleeliwa: ‘Mvenye ni mukhuure enama yincipale.’

⁶ Vahoolowaya kaaweha ni ohoolowaka aakhala mwaamunama anaararu, aalikana ni havara. Ottuliwawe aakhalano mapupha maxexe ntoko a mwaapalame. Mwaamunama ole aakhalano nyuru mixexe ni aavahiwa ikuru sa olamula.

⁷ Vahoolowaya, moolohanimwaka ohiyu kaaweha ni aakhalawo mwaamunama anaaxexe – oowoopihaxa ni a ikuru sitokotoko. Aakhalano maino matokotoko a eyuuma mwa yaawo aakhuurelaaweno aavaraawe ni aanyikalela seiyo saahala. Khaalikanano axinama araru akina ni aakhalano manyaka muloko.

⁸ Miyo kiwehexexaka manyaka, kaahoona nnyaka nikhaani nikina, naakhuma eriyaraaya ni manyaka mararu a yaale oopacera yaakompholiwa weera nikhaani nne niphwanye nipuro. Nnyaka nne naakhalano maitho ntoko a atthu ni eyano yuuluma moota woowiikuxa.

⁹ Miyo kiwehaka, saahiikaathiwa ihice sa emwene ni Muluku Oohimala aakilaathela. Yoowaraawe yaari yootteela ntoko etthabwe ni mayihaawe etteenleene ntoko mapururu a eputtiputthi. Ehicaawe ya emwene yaariciwa ni mooro ni mareekwaaya yaavarelatho.

¹⁰ Mooloko wa mooro waakhuma ohoolowawe. Atthu ancipalexa yaamurumeela; atthu oohaalikeleya yaaheemela ohoolowawe. Nipuro nuulummwa milattu naapacera nthorihelo ni ilivuru saahuliwa.

¹¹ Vano miyo kaapwaherera oweha niwoko na masu oowiikuxa nnyaka nne nuulumaaya. Kaaweha mpaka aakhwaawe mwaamunama ni erutthwaawe yaaphwatiwa, enavonyeriwa vayikho.

¹² Ikuru soolamula sa axinama akinaawo saavenxiwa, mene yaatthuniheriwa okhala ni okumi wa ehuhu ekina.

¹³ Mmoonelonimwaka ohiyu kaaweha ni aakhala ohoolowaka mmoha aalikana ni mwaana a mutthu arwaaka mmahutteni a wiirimu. Owo aamwaattamela Muluku Oohimala, anaronghiwa vamaithoniwawe.

¹⁴ Owo aavahiwa olamula, ovuwa ni omwene; miloko sootheene ni atthu a muulumo ootheene yaamulapa. Olamulawawe ti woohimala ni khoorwa omala ni omwenaawe khoorwa ophwatiwa.”

Etaphulelo ya moonelo

¹⁵ “Miyo, Daniyeli, kaariipiwa murima ni nyoonelo saavinre mmuupuwelonimwaka saakivalaveliha.

¹⁶ Kaamwaattamela mmoha a yaale yeemenle vaavaale, kinamvekela etaphulelo ya ekhaikhai ya itthu sootheene iye. Vano owo aakileela, akithaliheraka etaphulelo ya itthu iye:

¹⁷ ‘Axinama axexe atokotoko ari imwene ixexe sineera sikhumelele mweelaponi.

¹⁸ Vaheera ootteela a Muluku a Musulusulu animwaakhela omwene ni anookuxa yoowo wa mahuku ootheene – aani, wa mahuku ootheene.’

¹⁹ Vanonto, kaatthuna osuwela etaphulelo ya ekhaikhai ya mwaamunama anaaxexe aavirikana ni akinaawo ni aari oowoopihaxa, aarino maino matokotoko a eyuuma ni mankharu a ebronze* – mwaamunameene yoole aakhuura ni aanyaanya seiyo aavaraawe ni aanyikalela sootheene saahala.

²⁰ Kaatthuna osuwelatho mwaha wa manyaka muloko a mmurumwawe ni sa nnyaka nikina naakhumelenle vanipuroni na manyaka mararu makina yaakomphongwe – nnyakanene nenne naarino maitho ni eyano yuuluma moota woowiikuxa.

²¹ Miyo kiwehexexaka, nnyaka nne naawanano ootteela, nnaawina,

²² mpaka Muluku a Musulusulu aaphiyalaawe, alaleiyaka nthorihelo aweerelaka ootteela a Muluku a Musulusulu. Yoophiya ehuhu awosa yookuxa omwene.

²³ Owo aakithalihera etaphulelo ela: ‘Mwaamunama anaaxeexe ti omwene wanaaxexe onuukhumelele mweelaponi. Onoovirikana ni omwene mukina wootheene ni onoonyaanya elapo yootheene ya vathi, ahononaka ni anyikalelaka.

²⁴ Manyaka muloko ti mamwene muloko eniikhumelele omweneene yoowo. Vahoolowaya mwene mukina onookhumelela – avirikanaxaka ni mamwene oopacera. Owo onimwaakuruxa mamwene mararu.

²⁵ Owo onimuuluma soomvirikanyihela Muluku a Musulusulu, aahasulaka ootteelaawe, eereraka oceendya ihuhu ni malamulo. Ootteela animwinnyereriwa mmatatanimwawe wa ehuhu, ihuhu ni eriyari ya ehuhu.

²⁶ Vaheera Mphuki onookilaathi ni ikurusawe sinoovenxiwa ni sinoophwatiwa woomalela wa mahuku ootheene.

²⁷ Vano olamula, ikuru ni ovuwa wa omwene wootheene wa vathi onimwinnyereriwa mmatatani mwa ootteela, muloko wa Muluku a Musulusulu. Omwenaawe onookhala woohimala ni anamalamula ootheene anoomulapa emwiiwelelaka.’

²⁸ Ela emalihero ya moonelo. Miyo, Daniyeli kaathananaxa niwoko na soowuupuwelasaka ni ekhovaaka yaakimora, mene kaathokorora itthu iya vamurimani.”