Daniyeli 6 - Emakhuwa Bible

Ovaaneleliwa wa Daniyeli

¹ Yaamusiveliha Dareyexi waakhaliha mapwattapwattha ncira ni miloko miili weera elamule mmapuroni moothemwene a omwenaawe ni

² anamawehaweha asitokweene araru yaalamulaka yaawosa. Vano Daniyeli aari mmoha a araru ale. Mapwattapwattha yaatthuneya owaakhula araru ale weera mwene ahiyeleele etthu.

³ Vano Daniyeli aaweraxa moolamulanimwawe eriyari ya asitokweene eeli akina ni mapwattapwattha, moota wooweera mwene aahuupuwela omukhaliha mutokweene anaaveeli a omwene wootheene.

⁴ Mwa yeeyo, maguvernadori eeli akina ni mapwattapwattha yannaasaasa moota woomoothera Daniyeli moolamulanimwawe, mene khayaawenre ophwanya. Khayaaphwanya etthu yookhoromana mwa yoowo niwoko aari oororomeleya ni khaankhanle a murima wookhoromana naari murima woohipwattha.

⁵ Ommaleloni asilopwana ale yaaheera: “Khanirwa niphwanya etthu weera nimoothere mulopwana owo, Daniyeli, ohikhanle mwaha wa nlamulo na Mulukwaawe.”

⁶ Tivawo maguvernadori eeli akina ni mapwattapwattha oowiiwananeene yaarongwaaya wa mwene, enamweerela: “Ii! Mwene Dariyexe, mukhaleke wa mahuku ootheene!

⁷ Anamawehaweha a itthu sa emwene, anamalamula, mapwattapwattha, anamalaka ni maguvernadori ootheene yaahiiwanana weera mwene akhalihe ekano ni anyesererihe yeeyo. Vano ekanoweene yeeyo ti ela: Wa mahuku miloko miraru, yoole aneera amulape akhalaru muluku hata mutthu mukina ahikhanle mwene onoovonyeriwa mulittini mwa amwatto.

⁸ Vano, amwene, mukhalihe ekano ni mulepe yeeyo weera ehiceendyiwe, muttharaka ikano sa aMedesi ni aParesi sihingwereya oceendyeya.”

⁹ Vano Dareyexe aalepa ekano.

¹⁰ Vano Daniyeli iiwakaru weera ekano yoolempwa, aarowa owannyawe, anavolowa mukwaartunimwawe mwa osulu mwa mwemmo ixanela saahuleleya mpatta wa oYerusaleemu. Mmwe aapaka yeeyo aakhovelenlaawe opaka: imaara tthaaru khula nihuku annakokhora, annavekela, amutthapelaka Mulukwaawe.

¹¹ Vano asilopwana ale yaarowa vamoha, enamphwanya Daniyeli avekelaka, amvekelaka Muluku ekhavihero.

¹² Tivawo yaarongwaaya wa mwene, enuuluma ni yoowo mwaha wa ekanowaawe ya emwene: “Ii! Amwene, moolepa ekano weera wa mahuku miloko miraru, yoole aneera amulape akhalaru muluku hata mutthu mukina ohikhanle mwene, onoovonyeriwa mulittini mwa amwatto, keera?” Mwene aawaakhula: “Ekano ti ya ekhaikhai, ettharaka ikano sa aMedesi ni aParesi sihingwereya oceendyeya.”

¹³ Vano yaamweerela: “Daniyeli, mmoha a ootthukiwa a oYuda, khanoopwatthani nyuwo, amwene, hata ekano mulempaanyu. Owo nlelo onnavekela imaara tthaaru khula nihuku.”

¹⁴ Mwene iiwakaru yeeyo aathananaxa; aatthunaxa omoopola Daniyeli ni aahaasaasa moota woomoopola mpaka wiila.

¹⁵ Vano asilopwana yaarowa vamoha wa mwene, enamweerela: “Ii! Amwene, muupuwelele weera nlamulo na aMedesi ni aParesi nneera nnenesene weera khoongwereya oceendya yakhalaru ekano hoye hoye yoolamula ya emwene.”

¹⁶ Vano mwene aalamula ni awosa yaamuruuha Daniyeli, enamvonyera mulittini mwa amwatto. Wa soothesene mwene aamweerela Daniyeli: “Mulukwaanyu munimurumeelaanyu khula nihuku awoopoleni!”

¹⁷ Yaawala nlitti ni nluku, ni mwene aattitta ni munelaawe a emwene ni annela a maneethaawe weera aalakeleliwaawe Daniyeli kheenceendyeya.

¹⁸ Vahoolowaya mwene aaholokoleela mpaanimwawe ya emwene, anaviriha ohiyu ahicaaka, hata ahimutthunaka mutthu vamaithoniwawe. Vano khaawenre okona.

¹⁹ Oxaakaru, mwene aavenya, anatthimakela onlittini na amwatto.

²⁰ Aakhuveelaawe vanlittini, aamwiitthana Daniyeli ni nsu noothananaxa: “Daniyeli, murumeiyi a Muluku Mukumi, weeraka Mulukwaanyu mwa Yoowo munimurumeelaanyu khula nihuku oowera oowoopolani?”

²¹ Vano Daniyeli aamwaakhula: “Ii! Amwene, mukhaleke wa mahuku ootheene!

²² Mulukwaaka aamurumiha ndyelowaawe ni owo oowala iyano sa amwatto. Awosa khaakivulalinghe niwoko koophwanyiwa woohinthowa vamaithoniwawe. Hata nkipankeru etthu yoonanara ohoolowanyu, amwene.”

²³ Mwene aahakalalaxa, analamula weera Daniyeli akhumihiwe munlittini. Vano Daniyeli akhumihiweene munlittini, yaahoona weera khaavulanleru niwoko aamuroromela Mulukwaawe.

²⁴ Mwene aalamula weera asilopwana yaamoothenre Daniyeli moota woolokotheya eruuhiwe ni evonyeriwe munlittini na amwatto vamoha ni axaaraaya ni anamwanaaya. Awosa ehinaaye ophiya vathi, amwatto yaahaakaphula, enapwexakasa makhuvaaya ootheene.

²⁵ Vano mwene Dareyexi aalepela miloko sootheene ni atthu a muulumo ootheene mweelaponi yootheene: “Mpuha okhaleke ni nyuwo!

²⁶ Kinkhaliha ekano weera moomwenenimwaka wootheene atthu emooveke ni emuttittimiheke Muluku a Daniyeli, niwoko Owo ti Muluku Mukumi ni Owo onkhala wa mahuku ootheene. Omwenaawe khoorwa ophwatiwa ni olamulawawe khoommala.

²⁷ Owo onnoopola ni onnivuluxa; Owo ompaka sootikhiniha ni ineneero wiirmu ni vathi. Owo oomoopola Daniyeli mwa ikuru sa amwatto.”

²⁸ Hiiho Daniyeli saamweettela nnene moolamulani mwa Dareyexi ni mwa Siru, mParesi.