Biblia Todo Logo
Bìoball air-loidhne

- Sanasan -

Daniyeli 5 - Emakhuwa Bible


Efesta ya Belixazari

1 Mwene Belixazari ahaapakela efesta etokotoko maneethaawe macira muloko, anawuraxa vamoha ni yaawosa.

2 Awuraka hiihaale eviinyuwaawe, aalamula weera ikoomixi sa eyuuma yoorikaxa ni eparatha* atithawe Nebukadenezari yaakhumihalaaya Mpaani mwa Muluku oYerusaleemu siruuhiwe. Aatthuna weera maneethaawe, axaarawe ni ikuxosawe ewurere.

3 Vano yaaruuha ikoomixi sa eyuuma yoorikaxa saakhumihiwe Mpaani mwa Muluku oYerusaleemu ni mwene, maneethaawe, axaarawe ni ikuxosawe yaawurera.

4 Ewuraka eviinyu, yaattottopela miluku sa eyuuma yoorikaxa, eparatha*, ebronze*, eyuuma, nyiri ni maluku.


Yoolempwa vaxirini

5 Wootutuxereya ntata na mutthu naahooneya nilepaka vaxirini mpatta woowooneyaxa mpaani mwa emwene. Mwene aahoona ntata nlepaka.

6 Aahookhwa maririmela ni aahoovaxa moota wooweera makuthaawe yaamanana ni khaawera weemela.

7 Mwene aawiitthana anamacitta, anamawehaweha ithenyeeri ni anahako, anaweerela anamiruku ale a oBabiloniya: “Yoole aneera asome masu ala ni akithalihere etaphulelowaaya onoowarihiwa ekuwo yoorikaxa ni onyooro wa eyuuma yoorikaxa muxikomwawe ni onookhala oottittimiheya anaararu mweelaponi yootheene.”

8 Vano anamiruku ootheene a mwene yaahoorwa, mene khayaawenre osoma masu hata omuthalihera mwene etaphulelowaaya.

9 Hiiho mwene Beltexazari aahoopopiheyaxatho ni ekhovaawe yaamoraxa. Vanonto maneethaawe yaatikhinihiwa.

10 Pwiyamwene, iiwakaru okhuwela wa mwene ni maneethaawe, aavolowa mukwartuni mwa efesta, anamweerela: “Ii! Amwene, mukhaleke wa mahuku ootheene! Muhoove ni muhitteenguwe!

11 Ookhala mulopwana moomwenenimwanyu orino munepa wa miluku mwa yoowo. Mweehuhuni mwa atithinyu waahooneya weera aakhalano wiiwexexa ni miruku ntoko sa miluku. Mwene Nebukadenezari, atithinyu mwaarandenlaanyu, aamukhaliha mutokweene a anamacitta, akhwiri, anamawehaweha ithenyeeri ni anahako.

12 Mulopwana owo, Daniyeli, mwene aamuttenghaawe Beltexazari, aakhalano iseru ni oweratho otaphulela sooloha, othalihera ethale ni othupulula mitikhinelo soorikaxa. Mmwiitthane Daniyeli ni owo onimoothaliherani etaphulelo ya masu ala.”


Etaphulelo ya masu vaxirini

13 Vano Daniyeli aaroihiwa ohoolo wa mwene ni owo aamukoha: “Nyuwo Daniyeli, mmoha a anamatthukiwa atithaka, amwene, yaakhumihalaaya oYuda?

14 Kohiiwa weera munepa wa miluku ori mwa nyuwo ni weera mookhalano wiiwexexa, soosuwela ni miruku sitokotoko.

15 Anamiruku ni akhwiri kaaruuheliwa ohoolowaka weera esome masu ala ni ekithalihere etaphulelowaaya, mene khaawenre othalihera.

16 Vano miyo kohoona weera nyuwo munoowera otaphulela ni othupulula mitikhinelo. Mwawera osoma masu ala mukithaliheraka etaphulelowaaya, munoowarihiwa ikuwo soorikaxa, onyooro wa eyuuma yoorikaxa muxikomwanyu ni munookhalihiwa oottittimiheya anaararu moomwenenimwaka.”

17 Vano Daniyeli aamwaakhula mwene: “Muhiyeke soovahasanyu ni mwaavahe akina. Wa soothesene, kinimoosomelani yoolempwa ni kinimoothaliherani etaphulelowaaya.

18 Ii! Amwene, Muluku a Musulusulu aahaavaha atithinyu, Nebukadenezari, olamulaxa, otokweenexa, ovuwa ni waara.

19 Niwoko na otokweene Muluku aavanghaawe, miloko sootheene sa elapo ya vathi ni atthu a muulumo ootheene yaamoovaxa. Yaale mwene aatthunnaawe owiiva, aangwiiva ni yaale aatthunaawe owuurela, aangwuurela; yaale aatthunaawe waakhaliha mapuro oottittimiheya, aamwaakhaliha ni yaale aatthunaawe waayeviha aamwaayeviha.

20 Wa soothesene, murimaawe waathatungwaaya woowiixoona ni woowuuma niwoko na wiikuxa, aavenxiwa vahiceniwawe ya emwene ni aahaakhiwa ovuwawawe.

21 Aahoomoleliwa ottai wa atthu ni muupuwelowaawe waari ntoko mwaamunama. Aakhala vamoha ni abuuru a ntuphini, anaca malaxi ntoko imombe ni erutthwaawe yaahiimeliwa nikame na wiirimu mpaka aakhulenlaawe weera Muluku a Musulusulu onlamulaxa omwene wa atthu ni onimukhaliha mulamuli yoowo onimutthunaawe.

22 Vaheera nyuwo, Beltexazari, namarandelaawe, khamwiiyevinghe muroosuwelaru sootheene iye.

23 Ohiyanawaya mohiivuwiha ompwaha Yave a wiirimu. Moolamula weera ikoomixi sa Mpaani mwa Yave muruuheliwe nyuwo, maneethaanyu, axaarinyu ni ikuxosanyu weera ngwurere. Moottottopela miluku sa eparatha*, eyuuma yoorikaxa, ebronze*, eyuuma, nyiri ni maluku mwa seiyo sihingwera woona, wiiwa naari wiiwexexa. Vaheera khamunttittiminghe Muluku mwa Yooworu onlakela okumaanyu ni iphirosanyu sootheene.

24 Tivawo aaruminghaawe ntata nilempe masu ala.

25 Masu alempwe ti ala: MENE, MENE, TEKEL, PARSINI.

26 Vano etaphulelo ya masu ala ti ela: MENE: Muluku ohaalikela mahuku a olamulawanyu, anahela ommaleloniwaya.

27 TEKEL: moophimiwa vamuringoni ni mooveruwa.

28 PARSINI: Omwenaanyu wookawanyeya, enavahiwa aMedesi ni aParesi.”

29 Vano Beltexazari aalamula weera Daniyeli awarihiwe ikuwo soorikaxa, onyooro wa eyuuma yoorikaxa muxikomwawe ni owo aamukhaliha oottittimiheya anaararu moomwenenimwawe.

30 Ohiyuweene yoole Beltexazari, mwene a oBabiloniya, aahiiviwa

31 ni Dareyexi, mMedesi, aakuxa omwene areeneno iyaakha miloko mithannamosa ni piili.

Makhua Shirima Bible © Christelike Lektuurmaatskappy NPC, 2021.

CHRISTELIKE LEKTUURMAATSKAPPY NPC
Lean sinn:



Sanasan