Daniyeli 4 - Emakhuwa Bible

Yooloha ekina ya Nebukadenezari

¹ Ya mwene Nebukadenezari, wa atthu a ilapo, miloko ni muulumo ootheene ankhala mweelaponi ya vathi: murettele ni mpuha okhale ni nyuwosa!

² Enkisiveliha woothaliherani sa ineneero ni sootikhiniha sooweraxa Muluku a Osulusulu okipakenlaawe.

³ Ineneerosawe ti sitokotoko ni sootikhinihasawe ti sooweraxa! Omwenaawe ti woohimala ni olamulawawe ompwaherera wa ikhapira sootheene.

⁴ Miyo, Nebukadenezari, kaari mpaanimwaka ya emwene, oohakalaleene ni opuha.

⁵ Kaaloha kinakhala oowooveene. Kiixaatalenleene vabeettiniwaka, kaahookhwa maririmela niwoko na nyoonelo ni icaambulo koonnaaka mmuupuwelonimwaka.

⁶ Vano kaalamula weera anamiruku ootheene a oBabiloniya eruuhiwe ohoolowaka weera ekitaphuleleke yoolohaaka.

⁷ Vanonto, ephiyakaru anamacitta, akhwiri, anamawehaweha ithenyeeri ni anahako, kaahaathalihera yooloha, mene khayaawenre otaphulela yeeyo.

⁸ Woomalihera Daniyeli aaphiya ohoolowaka, kinamuthalihera yoolohaaka. Owo oniitthaniwa Beltexazari nri nsina na mulukwaaka ni munepa wa miluku sootteela onkhala mwa yoowo.

⁹ Keenre: “Beltexazari, mutokweene a anamacitta, koosuwela weera munepa wa miluku sootteela onkhala mwa nyuwo, ni mungwera othupulula nakhalaru ntikhinelo. Vano mukitaphuleleleke yoolohaaka.

¹⁰ Nyoonelo koonnaaka kiixaatalenleene vabeettiniwaka ti iya: Kaahoona ni waakhalawo ohoolowaka mwiri woorakamaxa eriyari ya elapo.

¹¹ Mwiri waahunnuwaxa mpaka omakoteloniwaya waaphiya wiirimu; waari woowooneya mpaka ekotenle elapo.

¹² Makukhwaaya yaari ooreera ni soowimasaya saahaatta ni saakhalamo sooca wa ootheene. Vathiwaya axinama a ntuphini yaamutthawelawo ni ipalame sa wiirimu saakhala mphandinimwaya; soopattuxiwa sootheene saaca mwemmo.

¹³ Mmooneloni kaarinaaka kikonaka, kaaweha ni ohoolowaka aakhala namutthenga ootteela aarweela wiirimu.

¹⁴ Owo aakhuwela ni nsu ntokotoko: "Muuhe mwiri ni mutaase; mvuruleke makukhwaaya ni mmwaraxe soowiimasaya. Axinama ari vathiwaya etthawewo ni hiihotho ipalame sinkhala mphandinimwaya.

¹⁵ Vaheera nikotto ni mikhwankwaarisaya, sitthukiweene ni eyuuma ni ebronze*, sikhaleke vathi; eriyari ya malaxi a ntuphini. Owo iimeliwe nikame na wiirimu ni owo aceeke malaxi vamoha ni axinama a elapo ya vathi.

¹⁶ Muupuwelowaawe wa omutthu oceendyiwe ni okhale ntoko mwaamunama mpaka omvirela ihuhu ithannapiili.

¹⁷ Yoolakela enlaleiwa ni anamitthenga; ootteela anghima yoolakela eyo weera akumi ootheene esuwele weera Muluku Musulusulu onlamula meekhaawe omwene wootheene wa omutthu. Owo onimvaha onimutthunaawe ni onimwinnyerera olamula yoole oohiphwanelela.

¹⁸ Ela yooloha miyo Nebukadenezari kaaraakano. Vano, Beltexazari, mukithalihere etaphulelowaaya niwoko khawowo a anamirukwaaka moomwenenimwaka ongwera okithalihera etaphulelowaaya. Vaheera nyuwo mungwera niwoko munepa wa miluku sootteela onkhala mwa nyuwo.”

Daniyeli ontaphulela yooloha yanaaveeli

¹⁹ Vano Daniyeli (iitthaniwatho Beltexazari) aatikhinihiwaxa wa ehuhu ekina ni soowuupuwelasawe samoopopiha. Vanonto mwene aamweerela: “Beltexazari, muhihiye yooloha naari etaphulelowaaya ewoopopihakani.” Daniyeli aamwaakhula: “Pwiiyaaka, waari weera yooloha ela yaaweereela amwiittanaanyu ni etaphulelowaaya awananinyu!

²⁰ Mwiri moonnaanyu wunnungwe woorakamaxa omakoteloniwaya ophiyaka wiirimu ni woowooneya mpaka ekotenle elapo,

²¹ aani, mwireene yoowo ni makukhu ooreeraxa ni soowiima soowaatta, waavahaka sooca wa ootheene, wiitthuuwa wa axinama ni mapuro a ipuurusaya ipalame sa wiirimu –

²² vano nyuwo, mwene, ti mwiri mutokweene owo! Moothatuwa mutokweene ni oolipaxa; otokweenaanyu wohunnuwa mpaka woophiya wiirimu ni olamulawanyu ompwaherera mpaka ilapo sa ottai sa elapo ya vathi.

²³ Nyuwo, amwene mwaamoonatho namutthenga, ootteela, aarweela wiirimu, eeraka: ‘Muuhe mwiri ni mutaase! Vaheera nikotto ni mikhwankwaarisaya sitthukiweene ni eyuuma ni ebronze*, muhiyeke. Nno nikhaleke vathi eriyari ya malaxi a ntuphini. Owo onimwiimeliwa nikame na wiirimu ni onookhala ni axinama a ntuphini mpaka omvirela ihuhu ithannapiili.’

²⁴ Ii! Amwene, etaphulelo ni ekano Muluku a Musulusulu olamulenlaawe mwaha wa pwiiyaaka mwene ti ela:

²⁵ Munimoomoleliwa ottai wa atthu ni munookhala vamoha ni axinama a ntuphini; munimooca malaxi ntoko imombe ni munimwiimeliwa nikame na wiirimu. Sinimoovirelani ihuhu ithannapiili mpaka muneeraanyu mwaakhulele weera Muluku a Musulusulu onlamula omwene wa omutthu, amvahaka akhalaru mutthu onimutthunaawe.

²⁶ Nlamulo noohiya nikotto ni mikhwakwaarisaya nintaphulela weera omwenaanyu munoohokoloxeriwatho nyuwo mwaakhulela olamula wa wiirimu.

²⁷ Tivawo, amwene, mwaakhulele olakawaka: muhiyeke sootthekasanyu mpakaka yeeyo eri ya ekhaikhai ni muhiyeketho soonanarasanyu, ngwooniheraka oohooxiwa murima wooreera. Apaale vano opuhawanyu onoopwaherera.”

Oyevihiwa wa Nebukadenezari

²⁸ Itthu sootheene iye saamukhumelela mwene Nebukadenezari.

²⁹ Sivirakaru nyeeri muloko ni miili, mwene eetteettaka hiihaale vataratoni wa empa ya emwene oBabiloniya,

³⁰ aahiixeerela: “Moone, Babiloniya mutokweene kiitekenlaaka ntoko erikiriki ya omwenaaka. Kohiitekela ola ni ikurusaka sooweraxa ni wa ovuwawaka.”

³¹ Owo uulumaka hiihaale, nsu naahoorwa wiirimu: “Mwene Nebukadenezari, ekano elamuliwe wa nyuwo ti ela: Olamulawanyu wa omwene woovenxiwa wa nyuwo.

³² Munimoomoleliwa ottai wa atthu ni munookhala vamoha ni axinama a ntuphini; munimooca malaxi ntoko imombe. Sinimoovirelani ihuhu ithannapiili mpaka muneeraanyu mwaakhulele weera Muluku a Musulusulu onlamula omwene wa omutthu, amvahaka akhalaru mutthu onimutthunaawe.”

³³ Vano yeeyo yuulummwe mwaha wa Nebukadenezari yaakwaniheriwa khuluwi. Aahoomoleliwa ottai wa atthu, anaca malaxi ntoko imombe. Erutthwaawe yaahiimeliwa nikame na wiirimu mpaka mayihaawe ni mapururuwaawe wunnuwa ntoko a xaaka ni mankharwaawe yaavera ntoko a apalame.

³⁴ Simalakaru ihuhusene seiye, miyo, Nebukadenezari, kaaweha wiirimu ni kaahoonelela weera muupuwelowaaka waahokolowa. Vano kaamuttottopela Muluku a Musulusulu; kaamuttittimiha ni kaamvuwiha. Olamulawawe ti woohimala; omwenaawe ompwaherera wa ikhapira sootheene.

³⁵ Atthu ootheene a elapo ya vathi khaveetthwaawewo. Owo ompaka yeeyo ontthunaawe ni ikuru sa wiirimu ni amaki a vathi. Khawowo ongwera ohiiha ntatanawe hata omweerela: “Mpankeni?”

³⁶ Ehuhuweene yeele waakihokoleela muupuwelowaaka ni kaahaakhelatho nttittimihonaka ni waarawaka wa ovuwa wa omwenaaka. Anamalakaaka ni maneethaaka yaakaasa ni kaahokoleela vahiceniwaka ya emwene kithatuwaka mutokweene opwaha khalayi.

³⁷ Vano miyo, Nebukadenezari, kinimuttottopela, kinimuttittimiha ni kinimvuwiha Mwene a wiirimu, niwoko sootheene ompakaawe ti sa ekhaikhai ni iphirosawe sootheene ti sookwanela. Owo ongwera wayeviha ootheene aneetta moota woowiixoona.