Daniyeli 2 - Emakhuwa Bible

Oloha wa Nebukadenezari

¹ Vayaakhani yanaaveeli ya olamulawawe, Nebukadenezari aaloha; aari oohitteene, ahiweraka okona.

² Tivawo aawiitthannaawe anamacitta, anahako, akhiwiri ni anamawehaweha ithenyeeri, anaalamula omuleela yeeyo aalonghaawe.

³ Aaweerela: “Kooloha yookivalaveliha ni kintthuna osuwela etaphulelowaaya.”

⁴ Vano anamawehaweha ithenyeeri yaamwaakhula mwene munuulumoni na Eramewu: “Ii! Mwene, mukhaleke wa mahuku ootheene! Mwaaleele arumeiyaanyu yoolohaanyu ni hiyo nnootaphulela.”

⁵ Mwene aawaakhula anamawehaweha ithenyeeri: “Yeeyo kilakenlaaka ti ela: nyuwosa mwaahikithalihera yoolohaaka ni etaphulelowaaya, kinoolamula weera mukakatthasiwe ni impasanyu sinootatuxiwa ittuxo.

⁶ Vaheera mwakithalihera yooloha ni etaphulelowaaya, munimwaakhela wa miyo soovaha, sooliva ni nttittimiho ntokotoko. Vano mukithalihere yooloha ni etaphulelowaaya.”

⁷ Emaara yanaaveeli awosa yaamwaakhula: “Mwaaleele arumeiyaanyu yoolohaanyu ni hiyo nnootaphulela.”

⁸ Vanonto mwene aaweerela: “Koosuwela weera muntthuna omaliha ehuhu niwoko moosuwela weera yoolakelaaka ti ela:

⁹ Mwaahikithalihera kilonghaaka, ootheene nyuwo kinimoottaruxani moota mmoha. Nyuwosa moovaanela okilokottha mmalihaka ehuhuweene, ngwehereraka weera kittiwale. Vanonto, mukithalihere yoolohaaka ni kinoosuwela weera munoowera otaphulela seiyo.”

¹⁰ Anamawehaweha ithenyeeri yaamwaakhula mwene: “Khawoworu mutthu mweelaponi ongwera opaka yeeyo amwene munnyesererihaanyu! Khawowo mwene mukina, akhalaka mutokweenexa ni ooweraxa, otonke ovekela mooteene yoola wa anamacitta, anahako naari anamawehaweha ithenyeeri.

¹¹ Yeeyo amwene mumvekelaanyu yootepaxa orika. Khawoworu ongwera omuthalihera mwene sihikhanle miluku ni seiyo khasinkhala variyari wa atthu.”

¹² Eyo yaamunyoonyiha mwene, emusarihaka isara moota wooweera aalamulela ohitiwa wa anamiruku ootheene a oBabiloniya.

¹³ Hiiho ekano yaalaleiwa weera anamiruku ehitasiwe; anamitthenga yaarowa omwaasaasa Daniyeli ni asinthamwenaawe weera yiivasiwetho.

¹⁴ Vano Ariyoke, mutokweene a anamalipelela a mwene, arowaka weera awiive anamiruku, Daniyeli aahuuluma ni yoowo ni masu a miruku ni soowuupuwela sooreera.

¹⁵ Aamukoha mutokweene ole: “Amwene alamulenleni ni oxilili?” Vano Ariyoke aamuthalihera Daniyeli mulattu ole.

¹⁶ Iiwakaru yeeyo, Daniyeli aarowa wa mwene, anamvekela ehuhu weera owo awere otaphulela yooloha ele.

¹⁷ Vahoolowaya Daniyeli aahokoleela owannyawe, anaathalihera mulattu asinthamwenaawe Hananeya, Mixayeli, ni Azariya.

¹⁸ Owo aahaavekela omudyoonttelela Muluku a wiirimu ikharari mwaha wa ntikhinelo nne weera owo ni asinthamwenaawe ehiiviwe vamoha ni anamiruku akinaawo a oBabiloniya.

¹⁹ Ohiyuweene yoole ntikhinelo naathupululiwa wa Daniyeli mmooneloni. Vano Daniyeli aamutthapela Muluku a wiirimu,

²⁰ eeraka: “Nsina na Muluku nitthapeliwe wa mahuku ootheene; miruku ni ikuru ti sawawe.

²¹ Owo onceendya ihuhu sa vanihukuni ni sa vayaakani; Owo onaakhaliha mamwene ni Owo onaakuruxa yaawo. Owo onaavaha miruku anamiruku ni esuwelo yaale aniiwexexa nnene.

²² Owo onthupulula itthu sa moowiixera ni soowiipithiheya. Owo onsuwela yeeyo eri mpiphini ni waara onkhala ni Yoowo.

²³ Kinootthapelani ni kinoottottopelani Nyuwo, Muluku a makholowaaka; mookivaha miruku ni ikuru; mookisuweliha yeeyo noovekenlaahuni; moonisuweliha yooloha ya mwene.”

Etaphulelo ya yooloha

²⁴ Vano Daniyeli aarowa wa Ariyoke, mwa yoowo mwene aamuthanlalaawe weera awiive anamiruku a oBabiloniya, anamweerela: “Muhiwiive anamiruku a oBabiloniya. Mukironghe wa mwene ni kinoomutaphulelela yoolohaawe.”

²⁵ Ariyoke aamurongha Daniyeli wa mwene, anamweerela: “Koomphwanya mulopwana variyari wa anamavariwa a oYuda ongwera omuthaphulela mwene etaphulelo ya oloha.”

²⁶ Mwene aamukoha Daniyeli, iitthaniwatho Beltexazari: “Nyuwo munoowera okitaphulela yeeyo koonnaaka moolohanimwaka?”

²⁷ Daniyeli aamwaakhula: “Khawowo namiruku, namatthoma, namacitta naari nahako ongwera omutaphulela mwene ntikhinelo owo okoherenraawe.

²⁸ Mene ookhala Muluku wiirimu onthupulula mitikhinelo. Owo oomoonihera mwene Nebukadenezari yeeyo eneera yeereye mmahukuni a muhoolo. Yooloha ni nyoonelo moonnaanyu mukonaka ti iya:

²⁹ Ii! Mwene, nyuwo mwaakonaanyu, mmuupuwelonimwanyu waahuleya wa itthu sa muhoolo ni Namathupulula a mitikhinelo oowooniherani yeeyo eneera yeereye.

³⁰ Wa miyo, ntikhinelo nna kithupululeliwaaka – khoohiyoni niwoko kirookhalanaxa miruku waapwaha akina, mene weera nyuwo, mwene, musuwele etaphulelowaaya ni weera mwiiwexexe yeeyo evinre mmuupuwelonimwanyu.

³¹ Amwene, mwaahoona ni ohoolowanyu yaakhala ecaambulo etokotoko; ecaambulo yoorakamaxa yoowaara ni ekhalelowaaya yoowoopihaxa.

³² Muru wa ecambuloweene yeele waapakiwe ni eyuuma yoorikaxa; ekakasa ni nyoonosaya sa eparatha*; erukulu ni eyuunu ya ebronze*;

³³ nyetto sa eyuuma ni inaawosaya saatakanseriwe eyuuma ni oloko.

³⁴ Nyuwo ngwehexexaka, nluku nimoha naakurukunduwa muneenaayaru. Naaswanya nyetto sa eyuuma ni oloko sinattikittheya.

³⁵ Vano eyuuma, oloko, ebronze*, eparatha* ni eyuuma yoorikaxa saanyaanyiwa sinakhala ntthupi ntoko makamba vanipuroni nimveeriwa* etrigu ehuhu ya elimwe. Epheyo yaavaviha seiyo sihihiyaka eneneero ya okhalawaya. Vaheera nluku naaswannye ecaambulo naathatuwa mwaako woorakamelaxa osulu ni waasareya elapo ya vathi yootheene.

³⁶ Eyo yaari yooloha ni vano kinootaphulela yeeyo wa mwene.

³⁷ Nyuwo, mwene, ti mwene a mamwene. Muluku a wiirimu ohoovahani olamula ni ikuru, owera ni ovuwa;

³⁸ ohinnyerera mmatatanimwanyu omutthu ni axinama a ntuphini ni ipalame sa wiirimu. Weiwo sintthunaaya okhalawo, Owo ohookhalihani namalamula a sootheene seiyo. Muru wa eyuuma yoorikaxa ti nyuwo.

³⁹ Vahoolowanyu omwene okina onookhumelela – wooyevaxa ohilikanaka ni wawinyu. Vahoolowaya omwene wanaararu wa ebronze* onoolamula mweelaponi yootheene.

⁴⁰ Woomalihera onuukhale omwene wanaaxexe – woolipa ntoko eyuuma, ni yeenre ekhalaka eyuuma, enoopwexa ni enoophwata sootheene. Mooteene yoowo eyuuma ennyaanyaaya sootheene, omwene yoowotho onoophwata itthu sootheene sikina.

⁴¹ Ntoko moonnaanyu, inaawo ni ikatha saatakanseriwe eyuuma ni oloko. Eyo entaphulela weera omwene yoowo onuukhale wookawanyeya. Hata hiiho onookhalano ikuru sa eyuuma murimoonaru eyuuma yootakansereya ni oloko.

⁴² Mooteene yoowo ikatha saatakanseriwaaya eyuuma ni oloko, hiihotho mpatta mukina wa omwene owo onoolipa ni mukinoowo woohilipa.

⁴³ Ntoko moonnaanyu, eyuuma yaatakanseriwe ni oloko. Eyo entaphulela weera omwene owo onimwaasaasa wiiraana ni miloko sikina, mene wiiwananawaya khoolipa, hiiho ntoko eyuuma ehintakansiwaaya ni oloko.

⁴⁴ Mweehuhuni ya mamwene awo, Muluku a wiirimu onookhaliha omwene oneera ohiphwatiweru hata ohilamuliwe ni miloko sikina. Omwene owo onoophwata imwene sootheene sikina iyo, vaheera owo onoopwaherera wa mahuku ootheene.

⁴⁵ Ela etaphulelo ya moonelo wa nluku naakurukundungwe vamwaako muneenaayaru – nluku nno naanyaannye eyuuma, ebronze*, oloko, eparatha* ni eyuuma yoorikaxa. Muluku Mutokweene oomoonihera mwene yeeyo eneera yeereye muhoolo. Yooloha ti ya ekhaikhai ni etaphulelowaaya ti yoororomeleya.”

⁴⁶ Vano mwene Nebukadenezari aamukokhorela Daniyeli, anamuttittimiha, analamula weera apakeliwe soovaha ni sooveleela ni avahiwe erubani*.

⁴⁷ Mwene aamweerela Daniyeli: “Vekhaikhai Mulukwaanyu ti Muluku a miluku ni Apwiya a mamwene ni Namathupulula a mitikhinelo, niwoko moowera woonihera ntikhinelo nna.”

⁴⁸ Vanonto mwene aamukhaliha Daniyeli vanipuroni noottittimiheyaxa, amvahaka soovaha sincipale. Aamukhaliha namalamula a elapo yootheene ya oBabiloniya ni aamukhalihatho mutokweene a anamiruku ootheene a elapo ele.

⁴⁹ Ohiya toko yeeyo, niwoko na nivekelo na Daniyeli, mwene aamukhaliha Xadraki, Mixaki ni Abedneku maguvernadori a elapo ya oBabiloniya, Daniyeli owo areene vaate wa emwene.