Daniyeli 11 - Emakhuwa Bible

¹ Vano vayaakhani yoopacera ya Dareyexi, mMedesi, kaaheemela weera kimwaakihe ni kimukhavihere.”

Mamwene a ohitto ni a ottuttuwani

² Vano, kinoothaliherani ekhaikhai: “Mamwene mararu makina animoowa oParesi, ni vahoolowaya anaaxexe oopuhaxa waapwahaxa araru akinaawo. Owo aakhalaka moolamulani niwoko na mihakhusawe, onimwaatannya ootheene weera ewaneno omwene wa oGresiya.

³ Vanonto mwene ooweraxa onookhumelela mwa yoowo aneera alamule ni ikuru sitokotoko, apakaka yeeyo ontthunaawe.

⁴ Vahoolo wa okhalihiwa, omwenaawe onoomwaramwareya ni onookawanyeya mipatta mixexe sa elapo ya vathi. Omwenaawe khookhala wa ekhapiraawe ni khoolipa ntoko waaraaya, niwoko omwenaawe onimwaakhiwa, yinnyereriweke akina.

⁵ Mwene a ohitto onoothatuwa oolipa, mene mmoha a asitokweene a anakhottwaawe onoothatuwa oolipaxa ompwaha yoowo, ni owo onoolamula omwenaawe ni ikuru sitokotoko.

⁶ Siviraleene iyaakha sikina, awosa anoopaka wiiraana. Mwaana muthiyana a mwene a ohitto onoorowa wa mwene a ottuttuwani weera apakeno wiiraana, mene muthiyana owo kharwa apwahereriha ikurusawe ni hiihotho atithawe. Mmahukuni awo owo, vamoha ni yaamuhoola, atithawe ni namakhaviheraawe animwinnyereriwa mookhwaani.

⁷ Mmoha a emusaawe onoovenya vanipuroniwawe muthiyana ole. Owo onimwaawanano anakhotto a mwene a ottuttuwani, avolowaka nipuronaya noolipaxa; onimwaawanano, aawinaka.

⁸ Owo onookuxatho milukusaya, icaambulosaya sa eyuuma ni ikarumasaya soorikaxa sa eparatha* ni eyuuma yoorikaxa, aroihaka wExipitu. Owo onoomuhiya mmuretteleni mwene a ottuttuwani wa iyaakha sikina.

⁹ Vano mwene a ottuttuwani onoovolowa omwene wa mwene a ohitto, mene onoohokoleela elapwaawe.

¹⁰ Anamwanaawe animwiirehererela ekhotto etokotoko yaathukumanyihaka anakhotto ancipale, mwa yaawo eniyaarowele ntoko maahi oowuupaxa, ewanaka mpakatho nipuronaya noolipaxa na amwiittanaaya.

¹¹ Vanonto mwene a ohitto onookhuma oonyoonyiweene, angwananaka mwene a ottuttuwani mwa yoowo aneera aangwanane ni anakhotto ancipale, mene orookhalaru hiiho mwene a ottuttuwani onoowiniwa.

¹² Vano anakhottweene yaawo yaawiniwaka, mwene a ohitto onoosareya wiixoona, awiivaka anakhotto ancipalexa, vaheera owinawawe khoopwaherera.

¹³ Niwoko mwene a ottuttuwani onimwaathukumanyiha anakhotto ancipale akina waapwaha anakhottweene yaale oopacera ni, siviraleene iyaakha sikina, owo onoorowa ni anakhotweene yaawo oolikaneene owana.

¹⁴ Ehuhuweene yeeyo ancipale anoongwanano mwene a ohitto. Anamapuhera variyari wa mulokwaanyu anoorukunuwelana, ekwaniheraka hiiho moonelo ola, mene khasiweettela nnene.

¹⁵ Vanonto mwene a ottuttuwani onimoowa, atekaka ikaaro sookurumulela exiri, akuxaka esidade yoolipaxa. Anakhotto a ohitto kheerwa ongwanano; mpakatho anakhottwaaya ooweraxa kheerwa ewera.

¹⁶ Namahuhula owo onoopaka yeeyo ontthunaawe; khaawo aneera amooceelihe. Owo onimwiitekiha mweelaponi Yooreeraxa ni onookhalano ikuru soophwatano yeeyo.

¹⁷ Owo onimoowa ni ikuru sa omwenaawe wootheene, apakaka wiiraana ni mwene a ohitto. Vano owo onoomutheliha mwanawe muthiyana mmoha eerelaka ophwata omwene wa ohitto, mene soovaanelasawe khaseetteleya nnene hata khasinimukhavihera etthu.

¹⁸ Vano owo onoorowa mpatta wa ilapo sa ephareiya akuxaka sincipale sa seiyo, mene mutokweene mmoha a anakhotto onoomaliha wiixoonawawe mwene owo ni wiixoona iwo onoomuhonona.

¹⁹ Vahoolowaya mwene owo onoohokoleela esidadaawe yoolipaxa ya elapwaawe, mene onookwakwathuwa, amoraka ni khooneyatho.

²⁰ Namarandelaawe onoomurumihela namaliviha misoko weera mihakhu sa emwene sipwaherere. Wa soothesene, siviraleene iyaakha sikina, owo onoophwatiwa, mene khoohiyono musarani naari mukhottoni.

²¹ Vanonto onoorandeliwa ni mulopwana oohooneleya mwa yoowo ahaaphwanenle okhala mwene. Owo onoovolowa moomweneni, amakaaya yuupuwelaka weera noolipa, ni onookuxa omwene avarelaka muteko wootha.

²² Vano anakhotto ancipalexa anoopuruliwa ohoolowawe; anakhottweene yaawo vamoha ni mwaana a mwene mmoha a wiiraana onoophwatiwa.

²³ Vahoolo wa wiiraana aapankaawe ni yoowo, onoopaka mootapanyani ni mukuttula vakhaani paahi ti onuuhale olamulaka.

²⁴ Ilapo sa mihakhu siixoona okhala soolipa, owo onoovolowamo, aweraka yeeyo atithawe naari makholowaawe yahaawenraaya: Owo onookawa soohuhula, soowiiyiwa ni mihakhu eriyari ya anamattharaawe. Onoovaanela okuxa isidade soolipaxa, mene wa ehuhu ekina paahi.

²⁵ Onimwaathukumanyiha anakhotto ancipalexa ni olipawawe murima wa ongwanano mwene a ohitto. Mwene a ohitto onoowana ni anakhotto ancipale ni ooweraxa, mene owo khawera owina niwoko na ovaaneleliwa.

²⁶ Mpakatho yaale ancihiwa ni mwene animweerera omphwata; anakhottwaawe anoophwatiwa ni ancipale anookhwela mukhottoni.

²⁷ Mamwene meeli awo, mirimasaya soosareya soonanara, anookilaathi vameesa mamoharu, elokotthanaka, mene kheephura etthu niwoko ommaleloni nlelo oneera orwe mweehuhuni yoothanliwa.

²⁸ Mwene a ottuttuwani onoohokoleela elapwaawe ni mihakhu sincipale, mene murimaawe onootthuna owanano wiiraana wootteela. Owo onoopaka ntoko uupuwenlaawe, ahokoleeleke elapwaawe.

²⁹ Mweehununi yoothanliwa, onoovolowatho elapo ya ohitto, mene ehuhuweene yeeyo emalihero enoovirikana yoopacera.

³⁰ Makula matokotoko a ilapo sa ephareiya ya ninkela nsuwa anoongwanano ni owo anooporora. Woottharelana anyoonyiweene owo onimweerera ophwata wiiraana wootteela. Owo onoohokolowa awooniheraka murimaawe wooreera yaale ahingye wiiraana wootteela.

³¹ Anakhottwaawe anoorowa weera eveihe Empa ya Muluku yoolipaxa, emalihaka sooveleela sa khula nihuku. Vanonto anoomuteka muluku oohiira.

³² Owo onoonanariha mirima sa yaale yaaveihale wiiraana, mene atthu animusivela Mulukwaaya anoomukhootta nnenesene.

³³ Yaale arino miruku animwaaxuttiiha ancipale, mene wa ehuhu ekinaawosa animwiiviwa ni ekatana, anoohisiwa, anoovariwa ni anoohuhuliwa.

³⁴ Awosa yaamoraka, anooxuukhaviheriwa ni ancipale ahikhanle mweekhaikhaiyini anootakanserana ni yaawo.

³⁵ Akina a anamiruku anookwakwathuwa weera awosa etteelihiwe, etotoxiwe ni epakiwe moota wookwanela mpaka ommaleloni wa ehuhu niwoko ommaleloni nlelo onoophiya mweehuhuni yoothanliwa.”

Mwene oowiixoona

³⁶ “Mwene onoopaka yeeyo ontthunaawe. Onimwiivuwiha ni onimwiixunnuwiha opwaha wakhalaru muluku ni onoomveiha Muluku a miluku ni itthu sihitonke wiiwiwa. Owo sinoomweettela nnene mpaka okwanela ehuhu ya isara, niwoko yeeyo elakeliwe ontthuneya okhumelela.

³⁷ Owo kharwa attittimiha miluku sa makholowaawe hata miluku soothanliwa ni asithiyana naari kharwa ampwattha akhalaru muluku, mene onimwiivuwiha eeraka ti mutokweene opwaha iyo.

³⁸ Vanipuroniwaya owo onoomuttittimiha muluku a moolipa; onoomuttittimiha ni eyuuma yoorikaxa ni eparatha* muluku oohisuweliwa ni makholowaawe, amuttittimihaka ni maluku oowaaraxa ni soovaha soorikaxa.

³⁹ Onoowanano mapuro oolipaxa ni ekhavihero ya muluku oohisuwanyeya aattittimihaka yaawo animwaakhulela. Owo onimwaakhaliha yaawo anamalamula a ancipale ni onimwaakawela ilapo ni ntthuvelo ntokotoko.

⁴⁰ Mweehuhuni ya ommaleloni, mwene a ohitto onoovolowa mukhottoni ni mwene a ottuttuwani onoongwanano mwene a ohitto ni ikaaro sa ikavalu*, anamweettiha a ikavalu* ni makula matokotoko mancipale. Owo onoovolowa ilapo sincipale aviraka ntoko maahi oowuupaxa.

⁴¹ Owo onoovolowatho Elapo Yooreeraxa. Ilapo sincipale sinookuxiwa, mene wEdomi, oMowabe ni asitokweene a wAmoni anootapuxeya mmatatanimwawe.

⁴² Owo onimunnuwiha olamulawawe mweelaponi sincipale; wExipitu khoonoopowa.

⁴³ Mwene owo onookhalano mihakhu sa eyuuma yoorikaxa ni eparatha* ni soopuha sootheene sa wExipitu, aalamulakatho aLibiya ni aNubiya.

⁴⁴ Vaheera ihaali sa ninkhuma nsuwa ni ottuttuwani sinoomoopopiha ni oonyoonyiweene onoovenyera ophwata ni wiiva miloko sincipale.

⁴⁵ Owo onookunga iheemasawe sa emwene eriyari ya iphareiya vathi wa mwaako wootteela wooreeraxa. Vaheera ommaleloniwawe onoomphiyera ni khaawo anaamukhavihere.”