Daniyeli 1 - Emakhuwa Bible

Daniyeli oBabiloniya

¹ Vayaakhani yanaararu moolamulani mwa Yehoyakimi, mwene a oYuda, Nebukadenezari, mwene a oBabiloniya, aarowa oYerusaleemu, anarica.

² Vano Yave aamwinnyerera Yehoyakimi, mwene a oYuda, mmatatanimwawe vamoha ni ikaruma sikina sa Empa ya Muluku. Nebukadenezari aakuxa seiye aronghaka wa empa ya mulukwaawe oBabiloniya, aniikaathi mpaani mwa mihakhu sa mulukwaawe.

³ Vanonto mwene aamulamulela Axepenazi, mutokweene a arumeiyi a empa ya emwene, weera aaruuhe aYixrayeli akina akina a emusi ya mwene ni a maneethi:

⁴ Amiravo oohirakala, oophwaneliwa, oolikaneene ooxuttera, a miruku, yiiwexexaka woowaakuveya ni oowera orumeela mpaani mwa mwene. Owo aalamuliwa waaxuttiha nuulumo ni ilivuru sa aBabiloniya.

⁵ Vameesaniwawe mwene Nebukadenezari awosa yaahaalikeleliwa sooca ni eviinyu ya khula nihuku. Awosa yaaxuttihiwa mweehuhuni ya iyaakha tthaaru ni vahoolowaya yaamurumeelaaya mwene.

⁶ Variyariwaya yaakhala akina yaakuxiwe oYuda: Daniyeli, Hananeya, Mixayeli ni Azariya.

⁷ Mutokweene a arumeiyi a mwene aahaatteha masina manyowani: Daniyeli iitthaniwa Beltexazari, Hananeya Xadraki, Mixayeli Mixaki ni Azariya Abedneku.

⁸ Vaheera Daniyeli aalakelaxa ohiinanariha ni sooca ni eviinyu ya mwene, anamvekela mutokweene a arumeiyi a mwene omutthunihera weera atthare moota owo.

⁹ Vano Muluku aatava murima wa mutokweene ole moota wooweera aamoonihera Daniyeli ikharari ni murima wooreera.

¹⁰ Hata hiiho, mutokweene aamweerela Daniyeli: “Kingwoova apwiyaaka mwene, mwa yaawo alamulenle weera ngwure ni muce sooca iya. Awo yoona weera nyuwosa munimoonda waapwaha asikhwiinyu, okumaaka onookhala ngwoopihani niwoko na nyuwosa.”

¹¹ Vano Daniyeli aamweerela namalipelela aakhalihingwe ni mutokweene weera amukosoope Daniyeli, Hananeya, Mixayeli ni Azariya:

¹² "Dyoontte, ngwoote murima arumeiyaanyu wa mahuku muloko: Munivahe mapoonda paahi weera nice ni maahi oowura.

¹³ Vahoolowaya mphimelele ekhalelowaahu ni ya amiravo anca sooca sa mwene ni vano mwaapakele arumeiyaanyu muttharihaka yeeyo moonnaanyu.”

¹⁴ Vanonto owo aahaakhulela masu ale, anawoota murima mahuku muloko.

¹⁵ Evinreene mahuku muloko ekhalelowaaya yaari oolipakaneene waapwaha asikhwaaya ootheene yaaca sooca sa mwene.

¹⁶ Tivawo namalipelela aavenxalaawe sooca ni eviinyu yaathanliwe ni mwene, anaavaha mapoondaru.

¹⁷ Muluku aahaavaha amiravo axexe ale miruku ni wiiwexexa wa ilivuru ni sooxuttiha soohiyanahiyana. Vano Daniyeli annawera otaphulela soowoona ni sooloha soohiyanahiyana.

¹⁸ Ommaleloni wa ehuhu mwene aalakenlaawe weera eruuhiwe wa yoowo, mutokweene a arumeiyi a mwene aahaarongha wa Nebukadenezari.

¹⁹ Mwene aahuuluma ni yaawo ni aahoona weera khaawoworu aalikana ni Daniyeli, Hananeya, Mixayeli, ni Azariya. Tivawo yaapacenraaya omurumeela mwene.

²⁰ Mwaha wa miruku ni wiiwexexa, mwene aahoona weera yannaweraxa waapwaha anamacitta ni akhwiri ootheene yaari moomwenenimwawe wootheene.

²¹ Vanonto Daniyeli aakhalawo mpaka eyaakha yoopacera ya olamula wa mwene Siru.