Axewu 2 - Emakhuwa Bible

Ovuwa wa muhoolo wa Empa ya Muluku

¹ Vanihukuni nanaamiloko miili nnimoha na mweeri wanaathannamiili, Yave aahuuluma mwa mprofeeti Axewu:

² “Munkohe ha, Zerubabeli, mwaana mulopwana a Xeyaletiyeli, guvernadori a oYuda ni Yoxuwa, mwaana mulopwana a Yehozadaki, mutokweene a asaserdoti*, vamoha ni muloko mukinoowo:

³ ‘Taani ahalahanle a nyuwosa oonne Empa ya Muluku ela ngwaaranimwaya woopacera? Naalikanxeraka yeele, kheenlikana ni yeeyo munoonaanyu vano.

⁴ Mene vano, mulipihe murima Zerubabeli,’ onghima Yave. ‘Mulipihe murima, Yoxuwa, mwaana mulopwana a Yehozadaki, mutokweene a asaserdoti*. Mulipihe murima! ootheene nyuwosa a muloko wa mulaponi ni muvare muteko,’ onghima Yave, ‘niwoko Miyo kiri ni nyuwosa,’ onghima Yave a ikuru sootheene.

⁵ ‘Wu ti wiiraana kipankaaka ni nyuwosa mukhumaleene wExipitu; Munepaaka ori eriyaraanyu. Muhoovase.’

⁶ Yave a ikuru sootheene oneera: ‘Ohilekenle, kinooteterexatho erimu, etthaya, ni mipatta sikina sa elapo.

⁷ Kinoothukumeliha miloko sootheene, mwa seiyo, sinooruuha mihakhusaya ni kinoosariha ovuwa Empa ya Muluku ela,’ onghima Yave a ikuru sootheene.

⁸ ‘Okhuma eparatha* mpaka eyuuma yoorikaxa ti sawaka,’ onghima Yave a ikuru sootheene.

⁹ ‘Ovuwa wa Empa enyowani ya Muluku ela, onimunnuwaxa opwaha wa khalayi,’ oneera Yave a ikuru sootheene. ‘Ni kinookhaliha murettele nipuro nna,’ onghima Yave a ikuru sootheene.”

Ohiiha ni yoororomeliha

¹⁰ Vanihukuni nanaamiloko miili ni maxexe na mweeri wanaathannaaxexe, vayaakhani yanaaveeli ya olamula wa Dariyu, Yave aahuuluma ni mprofeeti Axewu, amweerelaka:

¹¹ “Yave a ikuru sootheene oneera ha: ‘Mwaakohe asaserdoti* yookoha ela mwaha wa Nlamulo:

¹² Mukina akuxa enama yootteeliheriwa mooxoriwa mwa soowarasawe ni iyo satava yoocaanyu hoye hoye etthu ekina yoowaapeiwa naari eviinyu hata makhura hoye hoye yakhalaru yooca, vano yeeyo enookhala yootteelihiwa?’ ” Vanonto asaserdoti* yaamwaakhula: “Hoye!”

¹³ Woottharelana Axewu aahaakoha: “Mukina aahitteela niwoko na otava muttembo, vahoolowaya anatava ikina ikina sa itthusene seiya, vano iyo sinookhala soohitteela?” Asaserdoti* yaamwaakhula: “Aani, khasitteela.”

¹⁴ Vanonto Axewu aahima yoowaakhula ya Yave: “Ti yeeyo eneereya ni muloko ola ni elapo ela. Sootheene ompakaaya ni sootheene onkiveleelelaaya ti soohitteela.

¹⁵ Vano ngwiriyane: Okhuma olelo mpaka muhoolo, moonelemo. Moota heeni mwaakhalaanyu nihinaaye wiikaathiwa nluku vanlukuni Mpaani mwa Yave?

¹⁶ Mukina aaphiyaawe yuukeliwaayawo etrigu aasaasaka miringo miloko miili, saakhala paahi muloko. Mukina aarowaawe yaathokororiwaayawo eviinyu weera akuxe miringo miloko mithanu, aaphwanya miloko miili paahi.

¹⁷ Miyo koophwata muteko wootheene wa matataanyu ni nihooxo, murawa ni maralala, vaheera nyuwosa khamwaahokoleenle wa Miyo,” onghima Yave.

¹⁸ “Okhuma olelo, nihuku nanaamiloko miili ni maxexe na mweeri wanaathannamixexe, moonelemo nihuku na mathipelo a Empa ya Yave yaapakingwaaya, aani muupuwele nnene:

¹⁹ Vatathani wookhala nlelo mmiso? Mpaka olelo evideira*, mwiri wa ifiigu, mwiri wa eromazera* ni wa sooliveira* khasiimale soowiima. Vaheera, okhuma olelo mpaka muhoolo, kinimooreelihasani.”

Yoororomeliha ya Muluku wa Zerubabeli

²⁰ Yave aahuuluma ni Axewu emaara yanaaveeli, munihukuni nanaamiloko miili ni maxexe na mweeri wanaathannamixexe:

²¹ “Mwamuleele Zerubabeli, guvernadori a oYuda, weera Miyo kinooteterexa erimu ni etthaya.

²² Kinoomoroxa ihice sa emwene ni kinoophwata olamula wa omwene wa anamarwa. Kinoopittula ikaaro ni anamweettihaaya; ikavalu* ni anamweettihaaya anoomora, khula mutthu mwa ekatana ya mukhwaawe.

²³ ‘Nihuku nno,’ onghima Yave a ikuru sootheene, ‘Miyo kinimookuxani nyuwo, murumeiyaaka Zerubabeli, mwaana mulopwana a Xeyaletiyeli,’ onghima Yave ‘ni kinimoopakani munela woottittano, niwoko kohoothanlani nyuwo,’ onghima Yave a ikuru sootheene.”