Axewu 1 - Emakhuwa Bible

Olamuleliwa oraseliwa wa Empa ya Muluku

¹ Vanihukuni noopacera na mweeri wanaathannamosa muyaakhani yanaapiili ya olamula wa Dariyu, Yave aahuuluma mwa mprofeeti Axewu ni Zerubabeli, mwaana mulopwana a Xeyaletiyeli, guvernadori a oYuda ni Yoxuwa, mwaana mulopwana a Yehozadaki, mutokweene a asaserdoti*, eeraka:

² Yave a ikuru sootheene oneera ha: “Muloko ola oneera: ‘Nlelo kheenaaye ophiyera ehuhu ya orasela Empa ya Yave.’ ”

³ Tivawo Yave uulummaawetho mwa mprofeeti Axewu:

⁴ “Weeraka ti ehuhu ya okhala nyuwosa mpaani mooreerela, Empaaka epwahereraka okhala yooheleyeene nthala?”

⁵ Vano, Yave a ikuru sootheene oneera ha: “Moone nnenesene ephiro mukuxenraanyu.

⁶ Nyuwosa munnaphatteyaxa, vaheera munghepha vakhaani. Nyuwosa munnaca, mene khamumvona. Munnawura, mene khamunkwaneya. Munnawara, mene khamumviherana. Munnaakhela nlivonanyu, munahela munrupani woothorowa.”

⁷ Vano, Yave a ikuru sootheene oneera ha: “Moone nnenesene ephiro mukuxenraanyu.

⁸ Ngwele mwaako weera mwaruuhe itthaabwa. Muteke Empaaka, weera Miyo kihakalale ni kivuwiheriweno,” oneera Yave.

⁹ “Nyuwosa mwaaweherera yincipale, mene erwiiye vakhaani. Vano yeeyo nyuwosa muruuhalaanyu owaani Miyo kiphwante ni iphumu. Kipakenleni hiiho?” onkoha Yave a ikuru sootheene. “Niwoko Empaaka eheleiyeene nthala, khula mutthu a nyuwo ompwatthela paahi mpaanimwawe.

¹⁰ Tivawo, niwoko na nyuwosa, erimu ehiimihalaaya nikame ni etthaya ehiyalaaya wiimiha soowiimasaya.

¹¹ Mutuphini ni mmwaako kootannyera wuumelela ophwannye etrigu, eviinyu, makhura ni sootheene enruweraaya etthaya, mpakatho atthu, mihuwo ni miteko sootheene sa matataanyu.”

¹² Vano, Zerubabeli, mwaana mulopwana a Xeyaletiyeli, Yoxuwa, mwaana mulopwana a Yehozadaki, mutokweene a asaserdoti*, ni akina yaahalahanle a muloko yaahiiwelela nsu na Yave, Mulukwaaya, niwoko na masu a mprofeeti Axewu, mwa yoowo Yave, Mulukwaawe, aamurumihenlaawe. Vanonto muloko waamoova Yave.

¹³ Vano Axewu, namutthenga a Yave, aaronghela muloko mutthenga wa Yave ola: “Miyo kiri ni nyuwosa,” onghima Yave.

¹⁴ Hiiho, Yave aamulipihera Zerubabeli, mwaana mulopwana a Xeyaletiyeli, guvernadori a oYuda ni Yoxuwa, mwaana mulopwana a Yehozadaki, mutokweene a asaserdoti*, vamoha ni muloko mukinoowo, enapacerasa orasela Empa ya Yave a ikuru sootheene, Mulukwaaya,

¹⁵ vanihukuni nanaamiloko miili ni maxexe na mweeri wanaathannamosa vayaakhani yanaaveeli ya olamula wa Dariyu.