aRooma 12 - Emakhuwa Bible

Soovahiwa sa okumi

¹ Tivawo axunnaka, kinoodyoonttelelani niwoko na ikharari sa Muluku, weera mwiileve ntoko yooveleela ya okumi, yootteela ni yoomusiveliha Muluku, niwoko wu ti omurumeelawanyu Muluku woowaakhuleleya.

² Muhitthareke mweettelo wa elapo ela, mene mutatuxiwe ni oreherera wa soowuupuwelasanyu. Hiiho nyuwo mmwiiwexexe ti heeni otthuna wa Muluku, eyo tiiyo, ti heeni yooreera, yoomusiveliha ni yookwanela.

³ Vano, ni mahala kivahiwaaka, kinooleelani ootheene nyuwo weera muhiixooneke woopwaha ontthuneyaaya. Ohiyanawaya, mukhale oohiixoona. Khula mutthu iiwehaweheke ni muringo wa nroromelo Muluku oovanghaaweni.

⁴ Hiiho ntoko khula mutthu a hiyo okhalannaawe erutthu emoha ni mipatta sincipale, ni mipattasene seiyo khasimvara muteko mmoharu,

⁵ hiihotho hiyo nri ancipale, nimpaka erutthu emoharu mwa Kristu, ni mpatta ti mpatta ontthukiwa vamoha ni mipatta sootheene sikina.

⁶ Nookhalano sa mahala soohiyanahiyana ntoko mahala nivahiwaahu. Akhala mukina ongwera othalihera otthuna wa Muluku, ontthuneya ovarela muteko mahaleene yaawo munroromelonimwawe.

⁷ Mahalaanyu yakhala orumeela, murumeele, yakhala ohusiha, muhusihe,

⁸ yakhala oowaalipiha mirima akina, mupake hiiho, yakhala ovaha, muvahe ni murima wootheene, yakhala ohoolela, muhoolele ni nthiti, yakhala omorela ikharari, mupakeke ni ohakalala.

Mweettelo wa muKristu

⁹ Osivela okhale wa ekhaikhai. Muthanye yeeyo eri yoonanara, ni muvarexexe yeeyo eri yooreera.

¹⁰ Musivelaneke mukina ni mukhwaawe ntoko axunna. Fataari mwaattittimihe akhwiinyu muhinaaye asineenaanyu.

¹¹ Nihoohaleelekeni nthiti, mwiiminyaalele mmunepani, mwaarumeeleke Apwiya.

¹² Muhakalaleke munroromeloni, mukhale ni ovilela moothananani, mpwaherereke mmavekeloni.

¹³ Mwaakawele ootteela seiyo awo anghaawelaaya, ni ngwaakheleke nnene yaawo anoophiyerelani.

¹⁴ Mwaareeliheke yaawo anoosoondani, mwaareeliheke ni muhaalapheke.

¹⁵ Muhakalaleke ni yaawo anghakalala, ni mwiinleke ni yaawo aniinla.

¹⁶ Mukhaleke ni murima mmoharu mukina ni mukhwaawe. Muhikhale oowiixoona, mene mukhale oolikaneene mwiiwananaka ni atthu oohittittimiheyaxa. Muhiisuwele weera muri asuweli.

¹⁷ Muhaakakhane wa mukina yoonanara ni yoonanara. Mwaasaase opaka yeeyo eri yooreera vamaithoni wa ootheene.

¹⁸ Wawereya, mukhaleke ni murettele ni atthu ootheene.

¹⁹ Oosiveleya, muheettele isikula, mene muhiyere yeeyo wa isara sa Muluku, niwoko yoolempwa: “Apwiya yeenre: ‘Isikula ti sawaka. Miyo nkittaruxe.’”

²⁰ Ohiyanawaya: “Mwiittanaanyu avoliwa etala, mumvaheke yooca, avoliwa ntthona, mumvaheke yoowura. Mwapaka yeeyo, nyuwo mmwimwaandyeerere wuuliwawawe muru.”

²¹ Muhiwiniwe ni yoonanara, mene ngwine yoonanara ni yooreera.