aRooma 10 - Emakhuwa Bible

¹ Axunnaka, ohaawela wa murimaaka ni nivekelonaka wa Muluku mwaha wa aYixrayeli, ti weera awo evuluxiwe.

² Vano kinoowera okhalela onamoona weera awo arino nthiti wa itthu sa Muluku, mene nthitinaya khanihiyono mwaha wa esuwelo.

³ Hapo ehisuwelaka waakhuleliwa onrweela wa Muluku ni yaasaasaka ekhaikhaiyaaya asineenaaya, awo khayaakhulenle waakhuleliwa wa Muluku.

⁴ Moone, Kristu ti ommaleloni wa nlamulo, akwaniheraka waakhuleliwa ni Muluku wa ootheene anroromela.

⁵ Vano, Moisesi olempe moota ola mwaha wa waakhuleliwa onrweela wa nlamulo: “Mutthu ompaka itthusene seiya anaakhale niwoko na iya.”

⁶ Mwahatho wa waakhuleliwa onrweela niwoko na nroromelo, elempwe: “Muheere mmurimanimwanyu: ‘taani anaawele wiirimu’” (eyo tiiyo omukuruxa Kristu).

⁷ Hoye hoye: ‘taani anaakhuruwele moowiixera’” (eyo tiiyo omvenyereriha Kristu mwa akhwiiye).

⁸ Vano, Yoolempwa* enghima eheeni? “Nsu nri vakhiviruwanyu; nri mmwaano ni mmurimanimwanyu.” Nsu nenenenno na nroromelo ninlaleiyaahu ti nna:

⁹ Nyuwo mwalapa ni eyanowaanyu weera Yeesu ti Apwiya ni mwaroromela ni murimaanyu weera Muluku aamvenyereriha mookhwaani, nyuwo munoovuluxiwa,

¹⁰ niwoko ni murima munroromela weera mwaakhuleliwe ni Muluku, nitho ni eyano munlapa weera mvuluxiwe.

¹¹ Ntoko Yoolempwa* yeenraaya: “Yoowo onimuroromela, kharwa uulihiwa muru.”

¹² Khoohiyanne variyari wa aYuda ni amalapo, niwoko Apwiyeene yaawo ti Apwiya a ooweeli, ni Awo annaareelihaxa ootheene yaawo angwiitthana Yaawo,

¹³ hapo “ootheene yaawo aniitthana Nsina na Apwiya eniivuluxiwe.”

¹⁴ Vano, eniwiitthane hai Yaale yahaaroromenlaaya? Ni eniyaaroromele hai Yaale awo yahiiwalaaya suulummwaka sa Yaawo? Ni eniyiiwe hai, ahikhanle mutthu onlaleiya?

¹⁵ Ni eniilaleiye hai ehirumihiwe? Ntoko elempwalaaya: “Ti sooreeraxa inaawo sa yaale anlaleiya masu ooreeraxa!”

¹⁶ Wa soothesene, khaahiyono aYixrayeli ootheene yaakhulenle masu ooreeraxa. Vano Yesaya eenre: “Apwiya, taani ororomenle mutthengaahu?”

¹⁷ Hiiho, nroromelo ninrwa niwoko na wiiwa mutthenga, ni mutthenga oniiwiwa niwoko na masu a Kristu.

¹⁸ Vano miyo kinookoha: Awo khayiiwale masu ale? Vekhaikhai yaahiiwa! Yoolempweene yeeyo yeenre: “Nsunaya nohiiwanyeya elapo yootheene, ni maswaaya mpaka ekotenle elapo yootheene.”

¹⁹ Kinookoha veeli: Weeraka aYixrayeli khayiiwexenxe? Woopacera, Moisesi eenre: “Miyo kinimookhalihani atthu a ehace wa yaawo ahikhanle muloko, ni Miyo nkitannye isarasanyu niwoko na muloko ohisuwenle.”

²⁰ Ni Yesaya eenre ni murima woolipa: “Koophwanyiwa ni yaale yahaakaasa, ni kohiixoonihera wa yaale yahaakikoha.”

²¹ Mwahatho wa aYixrayeli Owo eenre: “Kohookola matataaka mahuku ootheene wa muloko mmoha wohiiwelela ni onkiwanano.”