Amosi 6 - Emakhuwa Bible

Ii! Wa yaalesa ahimpwattharu etthu

¹ Ii! Nyuwosa munkhala muhipwatthaka etthu oSiyoni, ni muniixoona okhala oolipeene vamwaakoni wa oSamariya; nyuwosa atthu oosuwanyeyaxa mwiixuupuwelaka weera muri ooreerela eriyari ya miloko, mwa seiyo ontthimakelaayawo muloko wa oYixrayeli!

² Murowase oKalene ni mwawehewo; vahoolowaya, mwapwaherere mpaka oHamate, ni woottharelana mwakhuruwele oGati, mulaponi mwa aFilisti. Weeraka iyo ti sooreerelaxa opwaha omwenaanyu miili? Elapwaaya ti etokweene opwaha yawinyu?

³ Nyuwosa munuupuwela weera munsusa nihuku noonanara, mene vekhaikhai munkhuveeliha nihuku noowoopihaxa.

⁴ Nyuwosa muniixaatalela mbeettini soophwanelihiwa ni maino a etthepo muniixookola muhicenimwanyu sa nsawu. Munkhuura iputtiputthi sooreerela ni aximombe oonenevaxa.

⁵ Mungwiipa amakitaanyu ntoko Davide, ni mumpakelela ikaruma sa masoma.

⁶ Nyuwosa mungwurera eviinyu mukoomixini sitokotoko, mwiixoottihaka makhura ooreeraxa, mene khamunthananela oheleya nthala wa Yoseefe.

⁷ Tivawo nyuwosa muneeraanyu mukhale eriyari ya yaawo eniipacere oronghiwa wootthukiwani elapo ekina; sinoomala ifesta sa yaawo ankhala moopuhani.

⁸ Yave onlamula sootheene ohiilipela! Yave, Muluku a ikuru sootheene, oneera ha: “Onkihiira wiixoona wa Yakobe, ni kinthanya impasawe sa emwene; kinimwinnyerera esidade ni sootheene sirimo.”

⁹ Asilopwana muloko yahiiwa empa emoha, awosatho animookhwa.

¹⁰ Vano mmusi onghisa mittembo arwa okhumiha mpaani, ni amukoha mukina aniipithemo: “Ookhalatho mukina ori ni nyuwo?” Ni owo aakhula ha: “Hoye,” vano mmusi owo onoomweerela: “Mmaale! Nihiromoleru Nsina na Yave.”

¹¹ Vano Yave, oolamulela, ni Owo onoophwata empa etokweene apwexakasaka, ni empa ekhaanene mpaka othatuwa impharumpharu.

¹² Weeraka ikavalu* sinootthimaka vasulu mwala? Mukina onoowera ottipuramo ni imombe? Vaheera nyuwosa mootatuxa yoowookoleleya, enakhala yoohapala, ni yoowiima ya ekhaikhai enakhala yoowaawa;

¹³ nyuwosa munghakalalela owinawanyu oLo-Debari, mweeraka: “Naakuxa oKarnayimi ni ikurusahu.”

¹⁴ Yave, Muluku a ikuru sootheene, oneera ha: “Ii! Muloko wa oYixrayeli, kinimoorumihelani muloko ni owo onimoohasulani okhuma oLebo-Hamate mpaka nreyareya na wAraba.”