aKolosi 1 - Emakhuwa Bible

Isalaama sookisera

¹ Ya Pawulo, murummwa a Kristu Yeesu mwa otthuna wa Muluku, ni munna Timootheyo,

² wa ootteela ni axunna oororomeleya mwa Kristu ari oKolosi: mahala wa nyuwo, ni murettele onrweela wa Muluku Atithihu.

Otthapela ni ovekela

³ Mahuku ootheene ninnamutthapela Muluku, Atiithi a Apwiyaahu Yeesu Kristu noovekelelakani nyuwo,

⁴ niwoko nohiiwa suulummwaka sa nroromelonanyu murinaanyu mwa Kristu Yeesu, ni sa waasivelawanyu ootteela ootheene,

⁵ niwoko na oweherera onoowehererani wiirimu. Nyuwo woopacera mohiiwa sa oweherera wu mwaha wa masu a ekhaikhai, masu ooreeraxa

⁶ yoophwannyeni. Mwa elapo yootheene ya vathi masu ooreeraxa aniima soowiima yunnuwaka, ntoko oneereyaaya variyariwanyu okhuma ehuhu mwiiwalaanyu masu ooreeraxa, ni mwiiwexenxaanyu mahala a Muluku mwa ekhaikhai.

⁷ Nyuwo mwaaxuttihiwa ni Epafra, mukhwiihu oosiveleya, murumeiyi oororomeleya a Kristu niwoko na nyuwo,

⁸ mwa yoowo onileenle sa osivelawanyu mwa Munepa.

⁹ Tivawo, okhuma nihuku niiwalaahu yeeyo, khaninghiyerera woovekelelani, nivekelaka weera nyuwo mukhale oosareya ni esuwelo yootheene ya otthuna wa Muluku, vamoha ni miruku sootheene ni wiiwexexa wa mmunepani.

¹⁰ Nimvekela yeeyo weera mweettelowaanyu okhale woowaaphwanelela Apwiya, ni weera mwaasivelihe Yaawo mwa soothesene, mwiimaka soowiima sa miteko sooreera, munnuwaka mwa esuwelo ya Muluku.

¹¹ Nimvekelatho weera nyuwo muthatuwe oolipa ni ikuru sootheene niwoko na ikuru sa ovuwawawe weera muvilele sootheene ni oweherera ni ohakalala,

¹² mwaatthapelaka Atiithi yoophwanelingheni waakhela okumi woohimala vamoha ni ootteela moomweneni wa waara.

¹³ Vano Awo aanoopola moolamuliwani wa epiphi ni aanithaamihera moomweneni wa Mwanaya Oosiveleya,

¹⁴ mwa Yoowo nookhalano ovuluxiwa, aani elevelelo ya soottheka.

Kristu oohilikanxereya

¹⁵ Owo ti Ekhalelo ya Muluku oohooneya, Ntthaara na ephattuwelo yootheene,

¹⁶ niwoko mwa Yoowo soopattuxiwa itthu sootheene siri wiirimu ni vathi – soowooneya ni soohooneya; sikhalaka ihice, naari soowera; ikuru, naari otokweene. Itthu sootheene sipattuxiwe ni Yoowo ni wa Yoowo.

¹⁷ Sihinaaye sootheene, Owo aakhala, ni mwa Yoowo sootheene sookhala.

¹⁸ Owo ti Muru wa erutthu eri ekerexa. Owo ori Epacerero ni Ntthaara variyari wa akhwiiye weera akhale oohilikanxereya a soothesene.

¹⁹ Vano, aasivelihiwa Muluku weera ekwanihero yootheene ekhale mwa Yoowo,

²⁰ ni weera niwoko na Yoowo siiraanyihiwe itthu sootheene ni Muluku, sikhalaka sa wiirimu, hata sa vathi. Aawenre yeeyo akhalihaka murettele niwoko na ephomaawe evuuvihiwe vamuttandani.

²¹ Khalayi nyuwo mwaamwalamwala ni Muluku, ni mmuupuwelonimwanyu mwaari amwiittana niwoko na mweettelowaanyu woonanara.

²² Vanotho Owo oowiiraanyihani niwoko na okhwa wa Kristu mweerutthuni weera awoonihereni vahoolowawe ootteela, woohikhalano nthowa ni oowoopowa wa soowoothera sootheene,

²³ mwapwaherera oolipeene ni ookhalihiweene munroromeloni, muhisusaka wa nroromelo mwaakhenlaanyu mwiiwakaru masu ooreeraxa. Awo ti masu ala nyuwo mwiiwalaanyu, ni alaleeriwe atthu ootheene a elapo ya vathi, ni miyo Pawulo koothatuwa murumeiyi a masu ooreeraxa ala.

Muteko wa Pawulo wa ekerexa

²⁴ Vano, koohakalala moohaawanimwaka niwoko na nyuwo, niwoko yeeyo kinghaawa mweerutthunimwaka niwoko na ekerexa eri erutthu ya Kristu enkwanihera soohaawa Kristu ohaangwaawe wa yeeyo.

²⁵ Koothatuwa murumeiyi a ekerexa, ntoko muteko Muluku okivanghaawe weera koothalihereni nnenesene masu a Muluku,

²⁶ ntikhinelo niipithihiwe wa ihuhu ni ikhapira sikina, mene vano nohooniheriwa wa ootteelaawe.

²⁷ Wa yaale Muluku aalakela waasuweliha variyari wa amalapo mihakhu soovuwa sa ntikhinelo nna, nri Kristu mwa nyuwo, oweherera wa ovuwa.

²⁸ Hiyo nnimulaleiya Yoowo, nimoopereraka ni nimuxuttihaka khula mutthu ni miruku sootheene weera niwoonihere atthu ootheene ookwanela mwa Kristu.

²⁹ Wa yeeyo miyo kimvara muteko kiwanaka ni ikuru sootheene simvara muteko mwa miyo.