Ahooleli 9 - Emakhuwa Bible

Abimeleki oneerera okhaliha omwene

¹ Abimeleki, mwaana mulopwana a Yeru-Bahali, aarowa wa asicimweenaaya amayawe oXekhemi, anaweerela yaawosa ni nihimo nootheene na emusi ya amayawe:

² “Mwaakohase aXekhemi ootheene: ‘Enooreerelani eheeni – olamuliwa ni anamwane asilopwana miloko mithannamiili ootheene a Yeru-Bahali, hoye hoye olamuliwa ni mulopwana mmoha paahi?’ Muupuwelele weera miyo ti xaxaxaanyu wuutiithini.”

³ Vano asicimweenaaya amayawe yaahuulumasa yeeyo wa aXekhemi, mwa yaawosa yaatthunasa omuthanla Abimeleki niwoko na okhala a emusaaya.

⁴ Awosa yaamvaha ixekeli* miloko mithannamiili sa eparatha* saakhumihiwe empa ya Bahali-Beriti. Abimeleki aavarela muteko ixekeli* iye wa owiiwananano oohikhalano muteko ni attiyamaaru, mwa yaawo yaathatungwe anamattharaawe.

⁵ Aarowa vaate wa atithawe Yeru-Bahali wOfera, anawiivakasa vamwala axunneiye miloko mithannamiili, anamwane a Yeru-Bahali. Wa soothesene, Yotami, etthaako ya Yeru-Bahali, aahoopowa, aniipitha.

⁶ Vahoolowaya atthu ootheene a oXekhemi ni oBeti-Milo yaathukumana mukerekhere wa mwiri wa ekarivalyu*, vakhiviru wa nrimbu na oXekhemi weera avariwe omwene Abimeleki.

Niphwanaphwaniho na nyiri

⁷ Yotami iiwakaru yeeyo, aawela vamwaako oGerizimi, anaakhuwelela: “Mukiiwe aXekhemi weera Muluku awiiweenitho.

⁸ Nihuku nimoha nyiri saavenya weera siivarele mwenaaya. Saaheerela mwiri wa olivera: ‘Mukhaleke mwenaahu.’

⁹ Mwiri wa olivera waahaakhula: ‘Nkingwera ohiya weeka makhura, mwa yaawo amvareliwa muteko woottittimihera miluku ni atthu weera kilamule nyiri!’

¹⁰ Vahoolowaya nyiri saaheerela mwiri wa efiigu*: ‘Haya, mukhaleke mwenaahu.’

¹¹ Wa soothesene, mwiri wa efiigu* waahaakhula: ‘Nkintthuna ohiya soowiimasaka soosiva ni soocoocowa weera kilamule nyiri.’

¹² Vahoolowaya nyiri saaheerela mwiri wa eviinyu: ‘Haya, mukhaleke mwenaahu.’

¹³ Wa soothesene, mwiri wa eviinyu waahaakhula: ‘Nkintthuna ohiya eviinyuwaaka enghakalaliha miluku ni atthu weera kilamule nyiri.’

¹⁴ Wookisera nyiri saaheerela mwiri wa nyiiwa: ‘Haya, mukhaleke mwenaahu.’

¹⁵ Mwiri wa nyiiwa waaheerela nyiri: ‘Mwatthuna weera miyo kikhale mwenaanyu, murwaaseke ootheene nyuwo vamunttuusiniwaka. Mwaahitthuna, vano mooro okhume mphandinimwaka sa nyiiwa ohisaka mpaka nyiri sitokotoko sa oLibanu.’”

¹⁶ Yotami aapwaherera: “Weeraka nyuwosa mohuupuwela nnenesene, munthanlaka Abimeleki ntoko mwene? Moomuttittimihera Gidiyoni ni emusaawe ntoko waaphwanelaaya?

¹⁷ Muhittiwale weera atithaka ahoowanelasani ni aaleva okumaaya weera yootapuxaseni mmatatani mwa aMidiyani.

¹⁸ Wa soothesene, nyuwosa olelo moorukunuwela emusi ya atithaka, ngwiivelaka anamwanaaya miloko mithannamiili vamwaleene yoowo ni moomuthanla Abimeleki, mwaana mulopwana a epottha ethiyana, okhala mwene a aXekhemi niwoko na okhala munninyu.

¹⁹ Waari weera nyuwosa moomoonihera Yeru-Bahali ni emusaawe murima woororomeleya, vano muhakalalelaneke.

²⁰ Vaheera waahikhanle hiiho, vano okhume mooro wa Abimeleki ni waahise atthu a oXekhemi ni oBeti-Milo ni okhumetho mooro wa nyuwosa, atthu a oXekhemi ni oBeti-Milo, omuhisaka Abimeleki!”

²¹ Vahoolowaya Yotami aatthawela oBeheri, aakhanlaawewo ottaiwene ni munneiye Abimeleki.

Omora wa Abimeleki

²² Aakwaniheraawe iyaakha tthaaru Abimeleki aalamulaka aYixrayeli,

²³ Muluku aarumiha munepa woonanara variyari wa Abimeleki ni aXekhemi, mwa yaawo yaapacera omuuluma Abimeleki.

²⁴ Muluku aapaka yeeyo weera yootakhala aapakenlaawe Abimeleki anamwane asilopwana miloko mithannamiili a Yeru-Bahali ni oyeeheya wa ephomaayasa, yiinleliwe ikukuttula mwa munneiye Abimeleki ni mwa aXekhemi yaamukhavihenre owiivasa axunneiye.

²⁵ aXekhemi yaamvaanelela Abimeleki yaathanlaka anamatakhala weera yawiipithele vanttumuxani yaawo yeera evirewo, ni Abimeleki aaleeliwa yeeyo.

²⁶ Vano Gahali, mwaana mulopwana a Ebedi, aaphiya oXekhemi vamoha ni axunneiye weera ekhalewo ni aXekhemi yaamuroromela yoowo.

²⁷ Waaheereya weera aXekhemi yaarowasa omatta ohepha iwuuva*, yaavotta, enapaka efesta mpaani mwa mulukwaaya. Ecaaka ni ewuraka hiihaale, yaamunyoholasa Abimeleki.

²⁸ Vano Gahali, mwaana mulopwana a Ebedi aaheera: “Abimeleki taani ni Xekhemi taani? Khaninrowa olamuliwa ni yoowo! Owo ti mwaana mulopwana a Yeru-Bahali ni Zebuli ti mwaakhulaawe. Munrumeele Hamori, tiithi a Xekhemi. Munimurumeelela heeni Abimeleki?

²⁹ Eya! Kaalamula muloko ola! Miyo kaamwiitapuxa mwa Abimeleki kimweerelaka: ‘Waareherereke anakhottwaawo ni orwe niwane!’”

³⁰ Zabuli, guvernadori a esidade, iiwakaru yeeyo aahimmaawe Gahali, mwaana mulopwana a Ebedi, aanyoonyiwa vancipale.

³¹ Aamurumihela anamitthenga Abimeleki muxiirini, eeraka: “Gahali, mwaana mulopwana a Ebedi ni axunneiye aahoorwa oXekhemi, enooseserelani muloko.

³² Vano murwe ohiyu vamoha ni anakhottwaanyu ngwehereraka mmatta.

³³ Oxeexelo, nsuwa nikhumaka, mwawaneno esidade. Gahali ni atthwaawe yoowananani, mwaapakelase yoowoorerelani.”

³⁴ Hiiho Abimeleki ni anakhottwaawe ootheene yaattimulasa ohiyu, enaasa woowiipithawo waattamela oXekhemi mipatta mixexe.

³⁵ Vano Gahali, mwaana mulopwana a Ebedi, aavenya areene vamulako wa esidade, Abimeleki ni anakhottwaawe yaahiithupulula.

³⁶ Gahali awoonakaru, aamweerela Zebuli: “Moone, annirwa atthu ekhuruwaka vamwaako!” Zebuli aamwaakhula: “Nyuwo munaapanyera irungu sa nyaako ni atthu.”

³⁷ Wa soothesene, Gahali aaheeratho: “Moone, annirwa atthu erweelaka mpatta wa eriyari ya elapo ni nakupa mmoha aneera awaaka mphironi wa mwiri wa anamatthoma.”

³⁸ Vano, Zebuli aamweerela: “Mwahaanyu wootheene ole ori woowi? Nyuwo mweera: ‘Abimeleki taani, oomurumeela hiyo?’ Atthweene ti yaala nyuwo mwaanyemulaanyu. Mukhume mwaawaneno!”

³⁹ Hiiho Gahali aahaakhumihera vaate aXekhemi, anangwanano Abimeleki.

⁴⁰ Abimeleki aamuttharelela ni owo aatthawa. aXekhemi ancipale yaahookhwa mmuseweni moothemwene mpaka wa mulako wa esidade.

⁴¹ Abimeleki aapwaherera okhala wAruma ni Zebuli aamoomola Gahali ni axunneiye oXekhemi.

⁴² Oxaawaya aXekhemi yaarowa mmamattani ni Abimeleki aasuwela yeeyo.

⁴³ Vano aahaakawanyiha anakhottwaawe mipatta miraru, anawiipithiha mmatta. Awoonakaru atthu ekhumaka musidade, anakhottwaawe yaahiithupulula, enaawanano.

⁴⁴ Abimeleki ni anakhotto yaari ni yoowo yaarowa mpaka wa mulako wa esidade. Vanonto, mipatta miili saahaarweela yaawo yaari mmatta, enawiivasa.

⁴⁵ Abimeleki aawanano esidade nihuku nenenno mpaka owina ni owiiva atthwaaya. Vahoolowaya aaphwata esidade, anamwaramwaxelamo maakha.

⁴⁶ Esuwelaka yeeyo yaawosa yaari otooreni* ya oXekhemi yaavolowasa mootthawelamo wa empa ya Eli-Beriti.

⁴⁷ Abimeleki asuwelaka weera awosa yaavolowamo,

⁴⁸ owo ni anakhottwaawe ootheene yaawelasa vamwaako oZalemoni. Aattotta epaso, anathikila iphandi sikina, anathatela. Aahaalamula akina yaari ni yoowo: “Mwaakuveke! Mpake yeeyo kimpakaaka!”

⁴⁹ Hiiho anakhotto ootheene yaathikila ipandi ethatelaka, enamutthara Abimeleki. Yaaciringelela iphandi vatooreni*, enapattiha. Hiiho atthweene yaale yaari mpuwa yaahookhwa. Vanonto atthu ootheene yakhwiiye mutooreni* yaari wookwana asilopwana ni asithiyana macira muloko.

⁵⁰ Vahoolowaya Abimeleki aarowa oTebezi, anarica, anawinawo.

⁵¹ Vaheera musidadeni yaakhala etoore* yoolipaxa. Mwa yeeyo ootheene a esidade yaatthawelaayamo. Yaahiiwalela mpuwapuwa, enawela vapathoni wa etoore*.

⁵² Abimeleki aahaattamela otooreni* weera ahise. Vano aattamelaka mulako wa etoore* weera ahise,

⁵³ muthiyana mmoha aamukurukundulela nxilo vamuruwawe apwexaka nikarakasa na Abimeleki.

⁵⁴ Woowaakuveya aamulamulela namakuxa a exikudwaawe: “Otholole ekatanaawo, okiive weera eheeriwe: ‘Muthiyana mmoha oomwiiva.’” Vano, murumeiyaawe aamuhoma, anakhwa.

⁵⁵ aYixrayeli yoonaka weera Abimeleki ohookhwa, yaahokoleelasa owaani.

⁵⁶ Hiiho Muluku aamuhokoloxera sootakhala Abimeleki aapakenlaawe atithawe awiivaka axunneiye miloko mithannamiili.

⁵⁷ Muluku aahaattaruxatho atthu a oXekhemi niwoko na sootakhalasaya. Nlapho na Yotami, mwaana mulopwana a Yeru-Bahali, naahaamorelasa.