Ahooleli 7 - Emakhuwa Bible

Gidiyoni onaawina aMidiyani

¹ Oyaaka ni oxa Yeru-Bahali* (eyo tiiyo Gidiyoni) ni anakhottwaawe ootheene yaakonela onaattuuttuni a oHarodi. Yaakonenlaayawo aMidiyani waari mpattaaya wa ottuttuwani, mureyareyani waattamela nttumuxa na oMore.

² Yave aamweerela Gidiyoni: “Mohaattanaxa atthu. Kawinnyerera aMidiyani mmatatani mwa aYixrayeli, awosa eniyeereke wiixoona wa Miyo yeeraka weera ikurusaya ti saatapunxe.

³ Vano mwaaleele atthu: ‘Ootheene anoova, ehokoleeleke omwaako oGiliyade.’” Hiiho asilopwana 22 000 yaahokolowa, enahala asilopwana macira macireene muloko.

⁴ Wa soothesene, Yave aamweerela Gidiyoni: “Nlelo asilopwana ahaattaxa. Mwaarowanase omoolokoni ni Miyo kinimwaamwalamwaxa yaawo ahanle ni nyuwo. Miyo keera: ‘Ola aroweke ni nyuwo,’ onoorowa, mene keera: ‘Ola khanrowa ni nyuwo,’ ahaleke.”

⁵ Vano Gidiyoni aahaarongha asilopwana omoolokoni. Weiwo Yave aamweerela: “Mwaamwalamwaxe yaawo angwura ntoko mwalapwa ni yaale ankokhora weera ewure ni matata.”

⁶ Asilopwana macira mararu yaawura ntoko mwalapwa, vaheera ancipalaawo yaakokhora weera ewure.

⁷ Yave aamweerela Gidiyoni: “Kinimoovuluxani ni asilopwana macira mararu awunre ntoko mwalapwa kiwinnyereraka aMidiyani mmtatanimwanyu. Asilopwana akinaawo mwaaleele ehokolowaseke.”

⁸ Vano Gidiyoni aahaalamula akinaawo orowa oheemaniwaya, aahalanaka asilopwana macira mararu, mwa yaawosa, yaakuxasa itthu sa munkwahani ni mapalapatta a yaale yaahokolongwe. Vano aMidiyani yaari oxepaniwaya mureyareyani.

⁹ Ohiyuweene yoole Yave aamweerela Gidiyoni: “Mvenye, murowe akonenlaayawo aMidiyani, niwoko kinoowinnyerera mmtatanimwanyu.”

¹⁰ Nyuwo moova orowa waawanano, murowe ni murumeiyaanyu Pura mpaka okhwipi akonenlaayawo aMidiyani.

¹¹ Mwaaphiyakawo, mwiiwe yeeyo anuulumaaya. Vahoolowaya munoolipiha murima weera mwaawaneno.” Hiiho Gidiyoni ni Pura, murumeiyaawe, yaarowa mpaka okhwipi yaaraayawo anamalipelelaaya.

¹² Vano, aMidiyani, awAmaleki ni miloko sootheene sikina sa mpatta ninkhuma nsuwa saathukumana mureyareyani. Yaahaattaxa ntoko nasope ohinaalikeleya. Hiiho ntoko ehaava ya mphareiya nave khayaalikeleya ahaacaaya.

¹³ Gidiyoni aaphiya nnenesene mweehuhuni mulopwana mmoha aamuthaliheraawe mukhwaawe yoolohaawe. Owo eera: “Kooloha epaawu ya esevada* ephirikeelaka yaakonenle aMidiyani, enakhitta eheema ni ikuruxa moota wooweera eyo yaakankhanyuwa.”

¹⁴ Nthamwenaawe aamwaakhula: “Vekhaikhai eyo ti ekatana ya Gidiyoni, mwaana mulopwana aYowaxi, muYixrayeli. Muluku oomwinnyerera aMidiyani ni mukonelingwe moothemwene mmatatanimwawe.”

¹⁵ Gidiyoni iiwakaru yooloha ela ni etaphulelowaaya, aamulapa Muluku. Aahokoleela yaakonenlaayawo aYixrayeli anaweerela: “Mvenye! Yave ohinnyerera okonelingwe wa aMidiyani mmatatanimwanyu!”

¹⁶ Aahaakawanyiha asilopwana macira mararu mipatta miraru, anaavaha ootheene mapalapatta ni nyaapu soohikhala etthu ni mithuko mpuwamwaya.

¹⁷ Aaweerelasa: “Mukiweheke, mukitakihe. Kaaphiyaka okhwipi wa akonenlaayawo, mwapake nnenesene yeeyo kineeraka kapake.

¹⁸ Vano miyo ni ootheene yaawo ari ni miyo niipaka mapalapattaahu nirukureenreene akonenlaayawo, mwiipe awinyu ni mwakhuwelewo: ‘Wa Yave ni wa Gidiyoni!’”

¹⁹ Gidiyoni ni asilopwana ncira yaamuhoonle yaaphiyasa okhwipi yaaraayawo anamalipelela, opwangheene vakhaani ohiyu eriyari ni eceendyiweene anamalipelela. Vano yaahiipasa mapalapattaaya, epwexaka nyaapu saari mmatatanimwaya.

²⁰ Mipatta soomiraru saahiipa mapalapatta sipwexaka nyaapu. Evarenleene mithuko moono muthiyana, mapalapattaawo moono mulopwana, yaakhuwela: “Ekatana wa Yave ni wa Gidiyoni!”

²¹ Khula mulopwana aakhala aaraawewo erukureenreene waakonelingwe. aMidiyani ootheene yaatthawasa etthimakaka ni ekhuwelaka.

²² Erumakaru mapalapatta macira mararu, Yave aaheeriha weera waakonelingwe woothewene asilopwana yaarukunuwelana ni ekatana. Vaheera anakhotto ancipale yaatthawela oBeti-Xita, mpatta wa oZerera, mpaka omwiinanoni wa wAbeli-Mehola, waattamela oTabati.

²³ Vano aYixrayeli a oNafitali, wAxeri ni oManaxe ootheene yaahiitthaniwa, enaattharelelasa aMidiyani.

²⁴ Gidiyoni aahaarumihela anamitthenga elapo yootheene ya mmanyaakoni sa wEfrayimi, eeraka: “Mukhuruwe, mwaawaneno aMidiyani ni mwamurice mooloko Yordanu mpaka oBeti-Bara.

²⁵ Awosa yaahaavarasa ahooleli eeli a aMidiyani, Orebi ni Zeebi. Yaamwiiva Orebi vamwala wa Orebi ni Zeebi munttankhini saamiwa iwuuva* sa Zeebi. Yaahaattharelela aMidiyani, enamuruuhela Gidiyoni muru wa Orebi ni Zeebi, owo areene okhopela Yordanu.