Ahooleli 3 - Emakhuwa Bible

Miloko saahanle mweelaponi

¹ Yave aahiya miloko mweelaponi weera awoothe murima aYixrayeli ootheene yaale yahoonneru ikhotto oKanaani.

² Aapakenle yeeyo weera aaxuttihe moota woowana aYixrayeli yaale yahaawanne oKanaani. Vano miloko saari ti iya:

³ Mamwene mathanu a aFilisti, aKanaani, aZidoni ni aHivi yaakhala mmanyaakoni sa oLibanu, okhuma mwaako oBahali-Heremoni mpaka oLebo-Hamati.

⁴ Miloko iye saahiyeriwe weera mwa seiye aYixrayeli yootiweno murima, yeeraka yiiwelele malamulo Yave aavanghaawe makholowaaya mwa Moisesi.

⁵ aYixrayeli yaakhala variyari wa aKanaani, aHiti, awAmori, aPerizi, aHivi ni aYebusi.

⁶ Yaahaatheliha anamwanaaya asithiyana ni yaatheliwa anamwanaaya ni asinamwanaya, enalapa milukusaya.

Oteniyeli

⁷ aYixrayeli yaapaka soonanara vamaithoni wa Yave. Yaamuttiwala Yave Mulukwaaya yaalapaka aBahali* ni Axera.

⁸ Isara sa Yave saahaapattela aYixrayeli moota wooweera Owo aawinnyerera mmatatani mwa Kuxani-Rixatayimi, mwene a wArami-Naharayimi, ni yaamurumeela wa iyaakha ithannatthaaru.

⁹ Vaheera, emwiitthanakaru Yave, Owo aahaakhalihera namatapuxa mmoha iitthaniwa Oteniyeli, mwaana mulopwana a Kenazi, munneiye mukhaani Kalebi, ni owo aahaatapuxa.

¹⁰ Munepa wa Yave waamukhuruwela yoowo moota wooweera aahaahoolela aYixrayeli, anarowa owana. Yave aamwinnyerera Kuxani-Rixatayimi, mwene a wArami, mmatatani mwa Oteniyeli, aangwinne.

¹¹ Hiiho elapo yaakhalano murettele wookwana iyaakha miloko mixexe mpaka okhwa wa Oteniyeli, mwaana mulopwana a Kenazi.

Ehudi

¹² Emaara ekinatho aYixrayeli yaapaka soonanara vamaithoni wa Yave. Tivawo Yave aamvanghaawe Egeloni, mwene a oMowabe, waalamula aYixrayeli.

¹³ Mweneene yoowo aawiitthana awAmoni ni awAmaleki weera ethukumane ni yoowo, enarowa waawanano aYixrayeli. Awosa yaawina esidade ya Mavare.

¹⁴ aYixrayeli yaalamuliwa ni Egeloni, mwene a oMowabe, wookwana iyaakha muloko niithannatthaaru.

¹⁵ aYixrayeli yaamukhuwelelatho Yave ni Owo aavanghe namatapuxa iitthaniwa Ehudi, mulopwana noonyootho, mwaana mulopwana a Gera, muBenyamini. aYixrayeli yaamurumihela ni nlivo na musoko wa Egeloni, mwene a oMowabe.

¹⁶ Vanonto, Ehudi aahana ekatana yoowiitha ninno ninno orakamawaya eriyari ya emeetru*, anatthukelela vatakhwini yoolopwana, mpuwa mukaandyo.

¹⁷ Aamvaha musoko Egeloni, mwene a oMowabe, aari mulopwana oonenevaxa.

¹⁸ Woottharelana, Ehudi aahaakhumihera vaate yaakunxe musoko.

¹⁹ Vano aphiyaka mukerekhere icaambulo sa miluku waattamela oGiligali, owo aarukunuwa, anamweerela mwene: “Mwene, kookhalano mutthenga wa exiiri ni nyuwo.” Mweneene yoowo aaheera: “Mmaale!” Ni arumeiyaawe ootheene yaakhumela vaate.

²⁰ Vahoolowaya Ehudi aamwaattamela, owo akilaantheene meekhaawe esaala etokweene ya osulu ya empaawe etokotoko, mwa weiwe aakilaathaawe elimwe, anamweerela: “Kookhalano mutthenga wa Muluku ni nyuwo.” Vanonto, mwene eemelakaru vahiceniwawe,

²¹ Ehudi aahookola moono muthiyana, anatholola ekatana vatakhwiniwawe yoolopwana, anamuhoma mwene erukulu.

²² Mpaka ettuutta ya ekatana yaaneela ni hapo khaavenxale ekatana, makhura yaawalawo.

²³ Vahoolowaya Ehudi awanleene Milako, aakhumela nipithela* na wiithela wa esaala.

²⁴ Akhummeene, arumeiyi yaahoorwa, enaphwanya milako sa esaala ya osulu siwaliweene. Awosa yaaheerelana: “Weeraka awo ari ocumbusini.”

²⁵ Yaaweherera ekhulumuwa eenre owo aahihulaka mulako wa esaala, yaakuxa exaavi, enahula. Mmwe yaamphwannye pwiiyaaya ari vathi akhwiyeene.

²⁶ Awosa nlelo ewehereraka hiihaale, Ehudi aalakaseya. Aavinre mucaambuloni sa miluku anatthawela oSeyira.

²⁷ Aphiyakaru mmanyaakoni sa wEfrayimi, aahiipa nipalapatta, aYixrayeli yaakhuruwasa mmanyaakoni, owo areene ohoolowaya.

²⁸ Owo aaweerela aYixrayeli: “Mukitthareke, niwoko Yave oowinnyerera amwiittanaanyu, aMowabe, mmatatanimwanyu. Awosa yaamutthara, enaakamela mirora sa Yordanu saarowa oMowabe ehimutthuniheraka mutthu olapuwawo.

²⁹ Ehuhuweene yeele yaawiivasa wookwanaka aMowabe macira macireene muloko – ootheene oolipaxa ni ookhomaala. Khaawo oopongweru.

³⁰ Nihuku nenenenne aMowabe yaawiniwa ni aYixrayeli ni elapo yaakhalano murettele wookwana iyaakha miloko mithannamiraru.

Xamegari

³¹ Vahoolo wa Ehudi aahoowa Xamegari, mwaana mulopwana a Anati, mwa yoowo aawiivale aFilisti macira mathannamosa ni ekopo eneettiha imombe. Owotho aahaatapuxa aYixrayeli.