Ahooleli 21 - Emakhuwa Bible

Opwaherera wa epuumba ya aBenyamini

¹ oMizepa asilopwana a aYixrayeli yaalipenle ha: “Ahikhaleru a hiyo anaamuthelihe muBenyamini.”

² Muloko waarowa oBeteli mwa weiwo waakilaathiyaayawo vamaithoni wa Muluku mpaka oxekuwa okhuwelaka ni wiinlaka ni wiikhupanyera.

³ Yaalalamika: “Ii! Yave, Muluku a aYixrayeli, yeereenle heeni yeela oYixrayeli? Heeni yeeraaya ehaleele olelo epuumba emoha variyari wa aYixrayeli?”

⁴ Oxaawaya muloko waapeherera ovenya, onaateka altaari* opakaka sooveleela soohisa ni sa murettele.

⁵ Vano aYixrayeli yaakohana: “Variyari wa ipuumba sa aYixrayeli taani ohirwiiye omuthukumanoni vamaithoni wa Yave?” Yaakohenre hiiho, niwoko waalipeliwa weera yoowo eera ahithukumaneno vamaithoni wa Yave oMizepa aamwiiviwa.

⁶ aYixrayeli yaahaathananela axunnaya aBenyamini yeeraka: “Olelo aYixrayeli aayeleela epuumba emoha.

⁷ Khaningwera waaphwanya asithiyana wa yaawo ahanle ni okumi, neenre nilipelaka mwa Yave ohaatheliha anamwaniihu.”

⁸ aYixrayeli yaakohana: “Taani a ipuumba sa aYixrayeli ohithukumanne vamaithoni wa Yave oMizepa?” Yaahoonelela weera khaawo a oYabexi-Giliyade aarwiiye waakoneleliwe mmuthukumanoni.

⁹ Yaalikelaka muloko, yaahoona weera khaariworu muYabexi-Giliyade.

¹⁰ Hiiho muthukumano waahaarumiha anakhotto 12 000 waalamulelaka weera erowe oYabexi-Giliyade ni yawiive ootheene yaamankewo, mpakatho asithiyana ni anamwane.

¹¹ Waaweerela anakhotto:” Muneeraanyu mwapake ti ela: mwawiive alopwana ni athiyana ootheene yaahikhalaru asimwali oowiikosoopa.”

¹² Yaahaaphwanya variyari wa amaki a oYabexi-Giliyade asimwali oowiikosoopa macira maxexe, enaaronghasa waakonelingwe oXilo, oKanaani.

¹³ Vahoolowaya muloko wootheene waahaarumihela yoovaha yoowiiraana aBenyamini yaari vaMwala wa oRimoni.

¹⁴ Vano ehuhuweene yeele aBenyamini yaahokolowasa, enawaakhelasa asithiyana a oYebexi-Giliyade yuureliwe. Wa soothesene, khayaakwanenle ootheene.

¹⁵ Muloko wa aYixrayeli waahaathananela aBenyamini, niwoko Yave aamwaramwaxa ipuumba sa aYixrayeli.

¹⁶ Ahooleli a muloko yaaheera: “Yeenre asithiyana a aBenyamini ekhwaaka, nniwaasere hai athiyana alopwana ahanle?

¹⁷ Ontthuneya weera yaale ahanle ni okumi ekhaleno anamwane weera epuumba emoha ya aYixrayeli ehiphwateye.

¹⁸ Nihaathelihe anamwaniihu, niwoko hiyo aYixrayeli nilipenle ha: ‘Oolaphiwa yoowo anaamuthelihe mwaniye ni muBenyamini.’”

¹⁹ Moone, vayaakhani yookhala efesta ya Yave oXilo, mpatta wa ottuttuwani wa oBeteli ni mpatta ninkhuma nsuwa wa musewe onkhuma oBeteli okelaka oXekhemi mpaka mpatta wa ohitto wa oLebona.”

²⁰ Hiiho yaahaalamulela aBenyamini: “Murowe mwiipithe mmatta mwa iwuuva*

²¹ ni mwaweherere. Asimwali a oXilo yaarowaka wiina, mwathupuluwe mmatta mwa iwuuva* ni khula mutthu a nyuwo iivareleke mwaamwali a oXilo. Vahoolowaya arowekeno mweelaponi ya aBenyamini.

²² Vano asitithaya hoye hoye asicimweenaaya yarwa okatta wa hiyo, nnooweerela: ‘Mwaamoorelase ikharari, niwoko khanaawenre waakwaniherela okhottoni asithiyana. Nyuwosa khamunthowa mweenre muhaathelihaka asinamwaniinyu.’”

²³ Vanonto, aBenyamini yaapaka hiiho. Yiinaaya asimwali, khula mulopwana aahiivarela muthiyana weera amuthele. Vahoolowaya yaahokoleelasa wa yoohiyeriwaaya, enarasela isidadesaya, eniitekihamo.

²⁴ Ehuhuweene yeele aYixrayeli yaavenyasa nipuro nne, enahokoleela mpuumbanimwaya ni mmahimonimwaya, khula mutthu wa yoohiyeriwaawexa.

²⁵ Ehuhuweene yeele aYixrayeli khayaarino mwene. Khula mutthu aapaka yeeyo yaamureerela.