Ahooleli 15 - Emakhuwa Bible

Samesoni onaawina aFilisti

¹ Eviraleene ehuhu, mweehuhuni enghephiwa etrigu, Samesoni aakuxa epuri ekhaani ntoko yamahala, anarowa omuxekura mwaariye. Aaweerela atithaya amwaariye: “Kinkela okwartu wa amwaaraka.” Wa soothesene, atithawe muthiyana khayaamutthunihenre ovolowa.

² Tiithi ole aamweerela: “Kaaviriyeleya weera nyuwo mwaamunthanya, tivawo kimvanghaaka nthamwenaanyu. Moone, munneiye mukhaani ti ooreeraxa. Muntheleke yoowo.”

³ Samesoni aaheera: “Emaara ela ahikhale anaakikhupanye ni makacamiho, miyo kaarulelaka ikukuttula aFilisti!”

⁴ Aavenya, anaavara akhwatte macira mararu, anaatthuka nyiila eeli-eeli. Vahoolowaya anaahelela mithuko nnyiilani,

⁵ anapattiha mithuko, anaweettiha akhwatte eriyari ya imatta sa etrigu sa aFilisti. Hiiho saahisiwa ihara ni etrigu ya mmatta nitho imatta sa iwuuva* ni sooliveira*.

⁶ aFilisti yaakohana: “Taani opanke yeela?” Yaaleeliwa: “Ti Samesoni, mukamwene a muTimeni, niwoko na ovahiwa mwaariye nthamwenaawe.” Hiiho aFilisti yaarowa, enamuhisa muthiyana ole nitho atithawe.

⁷ Samesoni aaweerela: “Mweenre mpakaka yeeyo, nkimmaaleleya kihoohiyeranseni ikukuttula.”

⁸ Aahaawanano moota woowoopiha awiivaka ancipale a yaawo. Vahoolowaya aarowa, anakhala munikhukuni vamwala wa wEtami.

⁹ aFilisti yaarowa, enakonelawo oYuda emwaarelasaka mukhwipi wa oLehi.

¹⁰ Asilopwana a oYuda yaahaakoha: “Murweenle heeni oniwanano?” Awosa yaawaakhula: “Nintthuna omukuxa Samesoni ootthukiweene weera nimpake yeeyo onipakenlaawe hiyo.”

¹¹ Vano asilopwana macira miloko miraru a oYuda yaarowa onikhukuni vamwala wa wEtami, enamweerela Samesoni: “Nyuwo moosuwela weera aFilisti ti annilamula. Mohoona munipakenlaanyu?” Owo aawaakhula: “Kaapanke yeeyo paahi akipakenlaaya.”

¹² Awosa yaamweerela: Nirweenle wootthukani weera nawinnyerereni wa aFilisti.” Samesoni aaweerela: “Mukiroromelihe weera nyuwosa khamukiiva.”

¹³ Awosa yaamwaakhula: “Vekhaikhai, nneere wootthukani ni nawinnyerereni mmatatanimwaya paahi. Khaniwiivani.” Awosa yaamutthuka ni mikhoyi miili sinyowani, enamukhumihasa vamwala.

¹⁴ Yaaphiyasaaya oLehi, aFilisti yaamuciceera ekhuwelaka. Vaheera Munepa wa Yave waamulipiha. Mikhoyi aatthukeliwaawe saathatuwa antoko weera miraambela sooza ni saamora mmononimwawe.

¹⁵ Amphwanyaka nandere a buuru, aamuttotta, anawiivano aFilisti asilopwana macira muloko.

¹⁶ Vano Samesoni aaheera: “Ni nandere a buuru, kohaatatuxa aFilisti abuuru. Koowiivano asilopwana macira muloko ni nandere a buuru.”

¹⁷ Amalihakaru wuuluma aamvonyera okhwipi nandere ni nipuro nne naatteehiwa oRamati-Lehi.

¹⁸ Samesoni aavolaxiwa ntthona, anamukhuwelela Yave: “Mookivaha owina wu otokotoko. Vano kikhweeke ntthona kimorelaka hiiho mmatatani mwa oohiineliwa?”

¹⁹ Muluku aamuhula mwala ori oLehi, enakhumawo maahi. Awuraka, saahokoleela ikuru sa Samesoni ni owo aakakhamuwa. Niwoko na yeeyo naattuuttu ole ootteehiwa wEni-Hakore ni nlelo ori oLehi.

²⁰ Samesoni aahaahoolela aYixrayeli wookwana iyaakha miloko miili mmahukuni a aFilisti.