Ahooleli 14 - Emakhuwa Bible

Othela wa Samesoni

¹ Samesoni aarowa oTimena, anamoonawo muthiyana muFilisti.

² Ahokoleelakaru owaani, aaweerela atithawe ni amayawe: “Koomoona muthiyana muFilisti oTimena. Mwakuurele muthiyana owo weera kimuthele.”

³ Atithawe ni amayawe yaamwaakhula: “Aakhala asithiyana ancipale variyari wa emusaanyu ni mulokwaanyu. Muntthuna orowa wa aFilisti oohiineliwa weera mwathelewo?” Wa soothesene, Samesoni aaweerela atithawe: “Mwakuurele. Okisivenle ti yoowo.”

⁴ Asinaangolowaawe khayaasuwenle weera iwo waari otthuna wa Yave aasaasaka maatannyero aFilisti. Vano ehuhuweene yeele awosa yannaalamula aYixrayeli.

⁵ Samesoni aarowa oTimena vamoha ni atithawe ni amayawe. Yaakhuvelaaya imatta sa iwuuva* sa oTimena, wootutuxereya aahaakhumelela mwatto oopelaka murika aaraawe Samesoni.

⁶ Munepa wa Yave waamulipiha moota wooweera aamwiiva mwatto ahikuxale etthu antoko weera epuri. Wa soothesene, khaathalihenre atithawe hoye hoye amayawe yeeyo aapankaawe.

⁷ Vano aarowa wuuluma ni muthiyana aamutthunaawe.

⁸ Eviraleene ehuhu, owo aahokoleelaawe weera avolowe othela, Samesoni aahapuwa weera oone nikarakasa na mwatto. Mpuwa waakhalamo muupattetthe ni ikuttha.

⁹ Aahaavula oravo, anaca eettaka. Aahokoleelaawe wa asinaangolowaawe, aahaameela, enacatho. Wa soothesene, khaathalihenre weera aavunle oravo munikarakasani na mwatto.

¹⁰ Atithawe yaarowa owannyawe muthiyana muFilisti owo. Samesoni aapakawo efesta, ntoko waakhoveleliwaaya wa namathela.

¹¹ Aphiyakaru, yaamuruuhela amiravo miloko miraru weera emuhoole ofestani.

¹² Samesoni aaweerela: “Kinoowaalelani ethale. Mwawera otthoma mmahukuni mathannameeli a efesta ela, kinimoovahani soowara miloko miraru sa eliinyu* ni ikuwo sikina miloko miraru.

¹³ Vaheera, mwaahitthoma, nyuwosa munookivaha soowara miloko miraru sa eliinyu* ni ikuwo sikina miloko miraru.” Awosa yaamweerela: “Munaalele ethale. Niiweke.”

¹⁴ Owo aawaakhula: “Wa yoole onca yookhuma yooca ni wa mukhomaali yookhuma yoocoocowa.” Wookwana mahuku mararu khayaawenre otthoma.

¹⁵ Vanihukuni nanaaxexe yaamweerela mwaariye Samesoni: “Mwaaviriyele aiyinyu weera ethalihe ethalaaya. Mwaaheere hiiho, nnimoohiserani nyuwo ni emusi ya atithinyu ni munimookhwa. Munilattulenle oniiya?”

¹⁶ Vano mwaariye Samesoni aamuttaandawula Samesoni iinlaka: “Nyuwo munnakithanya! Khamunkisivela vekhaikhai. Mohaalela ethale mulokwaaka, mene khamukileenle yootthoma.” Owo aamwaakhula: “Nkaathalihenre yootthoma atithaka naari amayaka. Kaahooleeleleni heeni nyuwo?”

¹⁷ Mwaariye Samesoni anniinla mahuku maxexe makinaawo a efesta. Vanonto, vanihukuni nanaathannameeli Samesoni aamuthalihera ethalaawe eenre apwahereraka omuxupa. Owo aarowa waathalihera atthwaawe.

¹⁸ Nihuku nanaathannameeli ohinaaye wiila, asilopwana a esidade yaahoorwa omuleela yootthoma: Kheewowo yoocoocowa yoopwaha oravo; khawowo oolipaxa ompwaha mwatto.” Samesoni aaweerela: “Nyuwosa mwahaaleeliwe ni amwaaraka, khamwaatthoma ethalaaka.”

¹⁹ Vano Munepa wa Yave waamulipiha. Aarowa wAxekeloni, anawiivawo asilopwana miloko miraru, anakuxa soowarasaya, anaavaha yaale yaatthomme ethale. Oonyoonyiweene, aarowa vaate wa atithawe.

²⁰ Vano, mwaariye Samesoni aavahiwa nthamenaawe aamuhoonle Samesoni woothelani.