Ahooleli 12 - Emakhuwa Bible

Onyakulihana variyari wa ipuumba sa aYixrayeli

¹ Asilopwana a wEfrayimi yaawiitthana anakhottwaaya, enalapuwa oZafoni, enamukohasa Yefeta: “Heeni mwaarongwaanyu waawanano awAmoni muhiniitthanaka hiyo? Nnimoohiserani mpaanimwanyu!”

² Yefeta aawaakhula: “Miyo vamoha ni atthwaaka naakacamiheyaxa ni minyakunyaku ni awAmoni. Kaawiitthanani, mene khamwaakitapunxe mmatatanimwaya.

³ Koonakaru weera khamwaakikhavihera, kaaleva okumaaka, kinarowa waawanano awAmoni ni Yave aakiwiniha. Vano heeni nyuwo mukirweenlaanyu olelo? Apaale muntthuna okiwanano?”

⁴ Vano Yefeta aawiitthana asilopwana a oGiliyade, enaawanano awEfrayimi. aGiliyade yaahaawina, niwoko awEfrayimi yaaheera: “Nyuwosa aGiliyade muri anamatthawatthawa a ekhapira ya wEfrayimi ni Manaxe.”

⁵ aGiliyade yaahaakamela moohiixera mwa Yordanu mwaalapuwiwa wookela wEfrayimi. Imaara sootheene namatthawatthawa a awEfrayimi eeraawe: “Kilapuwe,” vano aGiliyade yannamukoha: “Nyuwo ngwEfrayimi?” Owo eera: “Hoye,”

⁶ aGiliyade yaamweerela: “Mweere: ‘Xiboleti.’ Vanonto, mulopwana owo eera ‘Siboleti,’ ahiweraka oromola nnenesene Xiboleti, yaamumvara, emwiivelaka moohiixera mwa Yordanu. awEfrayimi yiiviwe ehuhuweene yeele yaari 42 000.

⁷ Yefeta aahaahoolela aYixrayeli wookwana iyaakha ithannamosa. Vano Yefeta, muGiliyade, aahookhwa, anavithiwa musidadeni mwa oGiliyade.

Ibezani, Eloni ni Abedoni

⁸ Vahoolowawe Ibezani a oBeteleheemu aahaahoolela aYixrayeli.

⁹ Aarino anamwane asilopwana miloko miraru ni anamwane asithiyana miloko miraru. Aahaatheliha anamwanaawe asithiyana ni asilopwana a mahimo makina ni anaaruuhela anamwanaawe asilopwana asithiyana miloko miraru a mahimo makina. Ibezani aahaahoolela aYixrayeli wookwana iyaakha ithannapiili.

¹⁰ Vano Ibezani aahookhwa, anavithiwa oBeteleheemu.

¹¹ Vahoolowawe Eloni, muZebuloni, aahaahoolela aYixrayeli wookwana iyaakha muloko.

¹² Eloni aahookhwa, anavithiwa wAyaloni, mweelaponi ya oZebuloni.

¹³ Vahoolowawe Abedoni, mwaana mulopwana a Heleli a oPiratoni, aahaahoolela aYixrayeli.

¹⁴ Aarino anamwane asilopwana miloko mixexe ni osuulu miloko miraru yaarino abuuru miloko mithannamiili. Aahaahoolela aYixrayeli wookwana iyaakha ithannatthaaru.

¹⁵ Abedoni, mwaana mulopwana a Hileli, aahookhwa, anavithiwa oPiratoni, elapo ya wEfrayimi, mweelaponi ya nyaako sa awAmaleki.