Ahooleli 1 - Emakhuwa Bible

Owananiwa aKanaani yaahanle

¹ Vahoolo wa okhwa wa Yoxuwa aYixrayeli yaamukoha Yave: “Taani a hiyo anaapacere waawanano aKanaani?”

² Yave aawaakhula: “Eniipacere ti epuumba ya aYuda. Miyo kohinnyerera elapo mmatatanimwaya.”

³ Vano asilopwana a aYuda yaaweerela axunnaya aSimeyoni: “Nrowe ootheene elapo nithanleliwaahu mooreereliwani weera naawaneno aKanaani. Vahoolowaya nnirowe ni nyuwosa elapo mvahasiwaanyu.” Hiiho aSimeyoni yaarowa ni aYuda.

⁴ Asilopwana aYuda ewanaka, Yave aawinnyerera aKanaani ni aPerizi mmatatanimwaya ni awosa yaawiiva asilopwana macira macireene muloko oBezeki.

⁵ Ti weiwe yaamphwannyaayawo Adoni-Bezeki, enangwanano, enaawina aKanaani ni aPerizi.

⁶ Adoni-Bezeki aatthawa, mene yaamuttharelela enamutthuka, enamuthikila ikatha itokweene sa mmattatani ni sa mmettoni.

⁷ Adoni-Bezeki aaheera: “Mamwene miloko mithannamiili ethikiliweene ikathasaya itokweene sa mmatatani ni mmettoni yannakhupela inyenyeeri vathi wa meesaaka. Mooteene yoowo Mulukutho ookipaka.” Awosa yaamurongha oYerusaleemu, anakhwelawo.

⁸ Asilopwana a aYuda yaawananotho oYerusaleemu enawinawo. Yaawiiva yaale yaamankewo, enahisa esidade.

⁹ Vahoolowaya yaarowa waawanano aKanaani yaakhala mmanyaakoni, oNegeba ni yaawosa yaakhala mukerekhere nyaako.

¹⁰ Yaahaarowela aKanaani yaakhala oHeberoni (khalayi wiitthaniwa oKiriyati-Arba), enangwina Xexai, Ahimoni ni Talema.

¹¹ Okhuma vaavaale yaarowela muloko waakhala oDebiri (khalayi wiitthaniwa oKiriyati-Seferi).

¹² Vano Kalebi aaheera: “Mulopwana aneera awine oKiriyati-Seferi, kinoomvaha mwanaka muthiyana, Akesa, weera amuthele.”

¹³ Oteniyeli, mwaana mulopwana a Kenazi, munneiye mukhaani Kalebi, aawina esidade, tivawo Kalebi aamvanghaawe mwanawe Akesa weera amuthele.

¹⁴ Nihuku nimoha akhalaka ni Oteniyeli, Akesa waamvoreihela murima waavekela ematta atithawe. Vano Akesa akhuruwakaru vabuuruni, Kalebi aamukoha: “Muntthunani?”

¹⁵ Owo aamwaakhula: “Mukivahe yookivaha. Mweenre pwiiya mukivahaka mpatta wa oNegeba, mukivahetho anaattuuttu a maahi.” Hiiho Kalebi aamvaha anaattuuttu akina a osulu ni a vathi.

¹⁶ Vano ekhapira ya muKeni, atatawe oowaathelela Moisesi, yaavenyasa musidade ya Mavare vamoha ni asilopwana a aYuda, enakhalasa eriyari ya muloko wa oNikareni wa oYuda, oNegeba, waattamela wAradi.

¹⁷ Vahoolowaya asilopwana a aYuda yaarowasa ni axunnaaya aSimeyoni, enaawinasa aKanaani yaakhala oZefati, enaphwata esidade. Tivawo esidade ele yiitthaniwaaya oHorema.

¹⁸ Asilopwana a aYuda yaawinatho oGaza, wAxekeloni, ni wEkeroni ni mittetthesaya.

¹⁹ Yave aari ni asilopwana a aYuda. Yaahaakamela elapo ya nyaako, mene khayaawenre owoomola atthu a mureyareyani, niwoko awosa yaakhalano ikaaro sa ekhotto soopakiwa ni eyuuma.

²⁰ oHeberoni aavahiwa Kalebi, ntoko Moisesi aaroromelinghaawe. Vano Kalebi aawoomolawo anamwane asilopwana araru a Enaki.

²¹ Wa soothesene, aBenyamini yaahooceela waawina aYebusi yaakhala oYerusaleemu. aYebusi ankhala weiwe ni aBenyamini mpaka olelo.

²² Vano asilopwana a epuumba ya Yoseefe yaawanano oBeteli ni Yave aari ni yaawosa.

²³ Awosa yaahaarumiha anamahottela oBeteli (khalayi wiitthaniwa oLuzi).

²⁴ Anamahotteleene yaawo emoonakaru mutthu mmoha akhumaka musidade yaamweerelasa: “Munileele mavoleelo musidade weera nuurele okumaanyu.”

²⁵ Vanonto, owo aawoonihera mavoleelo ni awosa yaawiivasa amaki a esidade, mene yaamuurela mulopwana ole ni emusaawe yootheene.

²⁶ Owo aarowa mulaponi ya aHiti, mwa weiwo aatenkaawewo esidade, anatteha oLuzi. Nna nri nsinanaya mpaka olelo.

²⁷ Wa soothesene, aManaxe yaahooceela owoomola atthu a oBeti-Xani, oTahanakhi, oDori, oYibeleyami naari oMegido ni mittetthe sa mukhwipimwaya, niwoko aKanaani yaalakelasa okhala elapo ele.

²⁸ aYixrayeli elipakaru, yaahaavariha aKanaani miteko sooviha, mene khayaawoomonle ootheene.

²⁹ Hiihotho awEfrayimi khayaawoomonle aKanaani yaakhala oGezeri; aKanaani yaapwaherera okhala eriyaraayasa.

³⁰ Mpakatho aZebuloni khayaawoomonle aKanaani yaakhala oKiteroni ni oNahaloli. aKanaaneene yaale yaapwaherera okhala eriyaraayasa, mene yaavarihiwa miteko sooviha.

³¹ Hata awAxeri khayaawoomonle yaale yaakhala wAko, oZidoni, wAhelabi, wAkezibi, oHeleba, wAfeki naari oRehobi.

³² Niwoko na yeeyo awAxeri yaamaka variyari wa aKanaani a elapweene yeele.

³³ Mpakatho aNafitali khayaawoomonle yaale yaakhala oBet-Xemexi ni oBet-Anati. Awosa yaakhala vamoha ni aKanaani a elapweene yeele ni yaale yaamaka oBet-Xemexi ni oBet-Anati yaahaavarihasa miteko sooviha.

³⁴ Vano awAmori yaahelela mpika epuumba ya aDani mweelaponi ya nyaako ehitthuniheraka okhuruwela oreyareyani.

³⁵ awAmori yaalakelatho opwaherera okhala vamwaako oHeresi, wAyaloni ni oXahalebimi, mene epuumba ya Yoseefe yaalimpaaya, awosatho yaavarihiwa miteko sooviha.

³⁶ Mwiinano wa awAmori waawelela okhuma ekhato ya Walisi mpaka oSela ni opwahereraka ohoolo.