aHeberi 8 - Emakhuwa Bible

Mutokweenexa a asaserdoti* a wiiraana onyowani

¹ Moone, marimbu oottittimiheyaxa hiyo nninghimaahu ti ola: nookhalano Mutokweenexa a asaserdoti*, ntoko Ola, mwa Yoowo okilaathiye wiirimu moono mulopwana wa ehice ya Otokweene,

² ni onrumeela vaNipuroni Nootteela*, vatabernaakuluni* ya ekhaikhai Apwiya apankaaya ahikhanle mutthu.

³ Ahooleli a asaserdoti* ootheene aakhalihiwa weera evahe soovaha ni sooveleela, ni tivawo, waatthuneya weera Owotho akhaleno etthu yooveleela.

⁴ Owo aari mweelaponi, saano ahikhanle Mutokweenexa a asaserdoti*, woonaka weera aakhala yaale amvaha sooveleela soonyesereriwa ni malamulo.

⁵ Awo anrumeela vaNipuroni Nootteela* nri etakiho ni munttuusi wa nenno nri wiirimu. Tivawo Moisesi oopereriwaawe eeraawe apake etabernaakulu*: “Mwiipasoope woopaka sootheene ntoko moota mooniheriwaanyu vamwaakoni.”

⁶ Wa soothesene vano, muteko Yeesu aakhenlaawe ti woopwahaxa wawaya, hiiho ntoko wiiraanyiha, mwa weiwo Yeesu ori Namawera, ti woopwahaxa wa iwe wa khalayi, niwoko wiiraana onyowani wookhalihiwa ni soororomelihiwa soopwahaxa.

⁷ Vano, wiiraanyiha woopacera waari wookwanela, khawaatthuneya waasaasa wanaaveeli.

⁸ Wa soothesene, Muluku aahoona weera mulokwaawe waari ni milattu, ni aaheera: “Animoowa mahuku, anghima Apwiya, kineeraaka kipake wiiraana onyowani ni empa ya aYixrayeli ni ya aYuda.

⁹ Khoorwa okhala ntoko wiiraana kaapankaaka ni makholowaaya nihuku kaavarenlaaka ni matata weera kaavenxe wExipitu. Niwoko awo khayaapwaherenre ngwiiraanyihanimwaka, Miyo koosusa wa yaawo, anghima Apwiya.

¹⁰ Wu ori wiiraana Miyo kineeraaka kipake ni muloko wa aYixrayeli vahoolo wa mahuku awo, anghima Apwiya: Nkihele malamulowaaka mmuupuwelonimwaya, ni nkilepe yaawo mmirimanimwaya. Nkikhale Mulukwaaya, ni awo eniikhale mulokwaaka.

¹¹ Khaawo anaamuxuttihe mukhwaawe, hata munneiye eeraka: ‘Mwaasuwele Apwiya,’ niwoko ootheene awo eniikisuwele, okhuma asikhaani mpaka asitokweene.

¹² Vano, Miyo nkaalevelele sootakhala, ni nkirwa kuupuwelelatho sootthekasaya.”

¹³ Iitthanaka wiiraana wu ‘onyowani,’ Muluku aapaka wohuuluvala iwe woopacera, ni yeeyo eri ya khalayi ni yoowuuluvala, ehanle vakhaani olakaseiya.