aHeberi 7 - Emakhuwa Bible

Musaserdoti* Melkhisedeki

¹ Melkhisedeki owo, mwene a oSalemi, ni musaserdoti* a Muluku musulusulu, aamukumanano Abrahaamu aahokoleelaawe owaani aawinakaru mamwene ni owo aamureeliha Abrahaamu.

² Vano, Abrahaamu aamvaha yanaamuloko ya soothesene. Woopacera nsinanawe nintaphulela ‘mwene a ekhaikhai,’ ni vahoolowaya ‘mwene a oSalemi’ entaphulela ‘mwene a murettele.’

³ Owo onkhala musaserdoti* mahuku ootheene, woohikhala atiithi, amaayi, ekhapira, epacerero, naari emalihero ya okumi, alikanxiweene Mwaana a Muluku.

⁴ Muupuwele otokweene wa mulopwana ola: mpaka nikholo Abrahaamu aamvaha yanaamuloko sa seiye aaruuhalaawe okhottoni.

⁵ Nlamulo ninnaxuttiha weera asaserdoti* variyari wa epuumba ya Leevi yaakhele yanaamuloko wa muloko, eyo tiiyo wa axunneiye, naamwi awo ekhalaka ekhapiratho ya Abrahaamu.

⁶ Wa soothesene, mulopwana owo, ahaakhanle a epuumba ya Leevi, aahaakhela yanaamuloko ni aamureeliha Abrahaamu aarino soororomelihiwa.

⁷ Woohihovela, mukhaaneene onreelihiwa ni mutokweene.

⁸ Mpatta mmoha, yaale anaakhela yanaamuloko ari atthu ankhwa, mpatta mukina, yoole onaakhela ti yoowo oneereliwa weera onkhala ni okumi.

⁹ Onoowereya ohima weera Leevi onaakhela yanaamuloko, oomulivatho Melkhisedeki yanaamuloko ni matata a Abrahaamu,

¹⁰ niwoko Melkhisedeki aamukumanannaawe Abrahaamu, Leevi aari nlelo mweerutthuni mwa nikholonawe.

Yeesu onlikana ni Melkhisedeki

¹¹ Vano, waari ni osaserdoti* wa aLeevi muloko wa Yixrayeli waakhenlaaya malamulo. Moone, wawereya okwanihera yookwanela ni osaserdoti* wa aLeevi, heeni waatthuneyaaya weera aphiye nlelo Musaserdoti* Mukina mmukhaleloni wa Melkhisedeki, ohikhanle wa Aharoni?

¹² Wakhala oceendya wa osaserdoti*, ontthuneya weera okhaletho oceendya wa nlamulo.

¹³ Vano, Yoowo mwa Yoowo singhimmwaaya itthu iya aari a epuumba ekina. Khaawo a epuumbeene yeela otonke orumeela valtaarini* ntoko musaserdoti*.

¹⁴ Ntoko esuweliwaaya, Yeesu ori a epuumba ya Yuda, ni Moisesi khanahime etthu ya epuumbeene yeele uulumaawe sa osaserdoti*.

¹⁵ Yeeyo nimalinghaahu ohima ti yoosuwanyeyaxa akhumelelaka, Musaserdoti* Mukina oolikana ni Melkhisedeki,

¹⁶ mwa Yoowo aathatungwe Musaserdoti*, ohikhanle ni malamulo mwaha wa epuumba, mene ni ikuru sa okumi woohiphwateya.

¹⁷ Mwaha wa Yoowo, Yoolempwa* enaakhulela: “Nyuwo ti Musaserdoti* oohimala mmukhaleloni wa Melkhisedeki.”

¹⁸ Malamulo a khalayi aamala, niwoko yaari oohilipa ni a siiyo,

¹⁹ woonaka weera malamulo ale khayaawenre yookwanela. Woovoleihiwa wa hiyo oweherera woopwahaxa, mwa yoowo hiyo nimmwaattamelaahuno Muluku.

²⁰ Ni eyo khayaakhumelenle woohikhala nlipelo. Akina yaathatuwa asaserdoti* woohikhala nlipelo,

²¹ mene Owo oothatuwa Musaserdoti* ni nlipelo Muluku aamweerenlaawe: “Apwiya aalipela ni kheerwa eceendya olakelawaya: Nyuwo ti musaserdoti* oohimala.”

²² Niwoko na nlipelo nne, Yeesu oothatuwa yoororomelihiwa ya wiiraanyiha otokweenexa.

²³ Moone, yaakhala asaserdoti* ancipale, niwoko okhwa onniwooceeliha opwaherera mmutekonimwaya.

²⁴ Hapotho weera Yeesu onkhala mahuku ootheene, ookhalano osaserdoti* woohimala.

²⁵ Tivawo, Owo ongweraawe waavuluxa nnenesene yaawo ammwaattamela Muluku mwa Yoowo, niwoko Owo onkhala mahuku ootheene weera aavekeleleke yaawo.

²⁶ Vano, ti Mutokweenexa a asaserdoti* ntoko Ola hiyo nnimuhaawelaahu: ootteela, oohikhala ni nthowa, oohittheka, oomwalamwalihiwa ni anamattheka, ni awelihiweene wiirimu woopwahaxa.

²⁷ Khahiyono ntoko asaserdoti* akina. Owo khanghaawela ovaha sooveleela nihuku ti nihuku, woopacera wa sootthekasawe, ni vahoolowaya wa soottheka sa muloko. Owo ohiiveleela khuluwi wa sootthekasaya, iivelenlaawe mwaneenaawe.

²⁸ Vano, nlamulo nnaakhaliha atthu ari oohilipa weera ekhale ahooleli a asaserdoti*, mene nlipelo niphiyale vahoolo wa nlamulo, noomukhaliha Mwaana ookwanela weera akhale Mutokweenexa a asaserdoti* mahuku ootheene.