aHeberi 6 - Emakhuwa Bible

¹ Tivawo, nihiye mahusiho oopacera mwaha wa Kristu, ni nipwaherere mpaka nikhale atokweene, nihivonyeraka veeli mathipelo awo: orukunxa mirima wa miteko sinrongha mookhwaani; nroromelo mwa Muluku;

² nihusiho mwaha wa opatiso; wiiyaathera matata; ovenyererihiwa akhwiiye, ni othoriha woohimala.

³ Hiiho nnipake Muluku atthuna.

⁴ Vano, wakhala weera atthu amwaleeliwe emaara emoha, yaalawiha mahala a wiirimu, yaakhenle Munepa Wootteela,

⁵ yaahoona oreera wa masu a Muluku ni ikuru sa ehuhu ya omaalo,

⁶ ni vahoolowaya yamora, khoongwereya wa yaawo weera ekhale oorongheliwatho orukunxa murima, niwoko asineenaayaru animuthomeiya veeli Mwaana a Muluku, ni ammuulihiha muru mwaatthuni.

⁷ Vano, etthaya engwura epula enrupa imaara sincipale ni emvaha soohepha soovareleya muteko wa yaawo anlima, ennaakhela mareeliho a Muluku.

⁸ Etthayatho enruwera nyiiwa ni malaxi eri yoohivareleya muteko, ni ehanle vakhaani weera elamphwe. Ommaleloniwaya ti yoohisiwa.

⁹ Oosiveleya, hata nuulumaka itthusene seiya, nooviriyeliwa wa itthu sooreera soopwaha mwaha wa nyuwo; itthu sinrongha moovuluwani.

¹⁰ Muluku khahiyono oohiroromeleya, Owo kharwa attiwala mitekosanyu, naari osivelawanyu mmoonihenraanyu, niwoko mohaakhavihera ootteela ni nlelo mumpwaherera waakhavihera yaawo.

¹¹ Nintthuna weera khula mutthu a nyuwo oonihere nthiti noolikana ntoko hiiho mpaka ommaleloni, weera mulipihere owehererawanyu.

¹² Ohiyanawaya, khanintthuna weera mukhale ooreesi, mene weera mwaatakihe yaawo anaakhela soororomelihiwa munroromeloni ni moovilelani.

Ekhaikhai ya yoororomelihiwa ya Muluku

¹³ Hapo khaakhanle mukina mutokweenexa oomulipela, Muluku aamuroromelihalaawe Abrahaamu, aahiilipela mwaneenaawe,

¹⁴ eeraka: “Vekhaikhai, Miyo nkooreelihe ni nkoovahe ikhapira sincipale.”

¹⁵ Hiiho, vahoolo wa oweherera ni ovilela, Abrahaamu aahaakhela yoororomelihiwa ele.

¹⁶ Atthu animulipela mukina ori mutokweene waapwaha yaawo, ni nlipelo ninlipihera yeeyo ehimmwale, nimalihaka masu ootheene.

¹⁷ Muluku aatthuna woonihera ni ekhaikhai ya nnenesene wa yaale yeera yaakhele yoororomelihiwa weera olakelawaya khoorwa onceendyeya. Tivawo, aalipihera yoororomelihiwa ele ni nlipelo.

¹⁸ Vano, sookhala itthu piili sahaawereya oceendyiwa: yoororomelihiwa ni nlipelo. Ni mwaha wa itthusene seiyo khoongwereya weera Muluku anilokotthe. Hiiho, hiyo nikhaleke oolipihiweene, hiyo nnimutthawela Muluku weera nivare nnenesene oweherera nivahiwaahu.

¹⁹ Nookhalano oweherera wu ntoko nipuro noolipihiwa mookuminimwahu, noolipa nnenesene. Nroromelo nna nimvolowa mpuwa mwa empa yootteela mpaka wiithela wa ekuwo etokotoko,

²⁰ mwemmo Yeesu aavolongwaawe ntoko Muhooleli vanipuroniwahu, athatuwaka Mutokweenexa a asaserdoti* oohimala mmukhaleloni wa Melkhisedeki.