aHeberi 4 - Emakhuwa Bible

Ovolowa ngwiitthuuwani mwa Muluku

¹ Moone, yoororomelihiwa ya ovolowa ngwiitthuuwani mwa Muluku emvara muteko mpaka olelo. Tivawo, niipasoope weera hata mmoha a nyuwo ahiyeleele ehuhu ya ovolowa ngwiitthuuwani wu.

² Vano, masu ooreeraxa aalaleiwatho wa hiyo, hiiho ntoko wa yaawo, mene mutthenga ale yiiwalaaya khawaatekeleiye etthu, niwoko yaawo yiiwale khayaakhenle mutthenga ole ni nroromelo.

³ Hiyo ninroromela, ti hiyo nimvolowa ngwiitthuuwani wu, ntoko Muluku eenraawe: “Hiiho kaalipela moonyoonyiwanimwaka: awo kheerwa evolowa ngwiitthuuwanimwaka.” Aaheera yeeyo, naamwi mitekosawe simalihiweene okhuma ephattuwelo ya elapo.

⁴ Mpatta mukina, Owo aahuuluma masweene ala sa nihuku nanaathannameeli: “Ni nihuku nanaathannameeli Muluku aahiitthuuwa wa mutekwaawe wootheene.”

⁵ Wa nipuro nihimmwale vaanaanoweene, eenretho: “Kheerwa evolowa ngwiitthuuwanimwaka.”

⁶ Vano, woonaka weera yaale khalayeene yiiwale masu ooreeraxa khayaavolongwe ngwiitthuuwani mwa Muluku niwoko na ettiyamaaru, ti ekhaikhai akina ahanle ovolowa.

⁷ Tivawo Muluku omvaha veeli nihuku nimoha nniitthaniwa “olelo.” Vahoolo wa iyaakha sincipale, uulumaka ni eyano ya Davide, Muluku eenre, ntoko ehimmwalaaya: “Olelo, nyuwo mwiiwa nsunawe,muhuumihe murimaanyu.”

⁸ Vano, waari weera Yoxuwa aahaavaha atthu wiitthuuwa, Muluku saano ahuulumme vahoolowaya sa nihuku nikinatho.

⁹ Hiiho, woohalatho wiitthuuwa wa eSaabadu wa muloko wa Muluku.

¹⁰ Ootheene amvolowa wiitthuuwa wa Muluku aniitthuuwatho wa mitekosaya, ntoko Muluku iitthuuwalaawe wa mitekosawe.

¹¹ Tivawo, nilipihere ovolowa wiitthuuwawene weiwo weera ahikhale mukina aneera amore, attharaka ethoonyero ya yaale yahiiwelenle.

¹² Masu a Muluku ari ni okumi ni oowera, ni oowiithaxa oopwaha yakhalaru ekatana eniitha ninno ninno. Awo amvolowa mpaka weiwo ammwaramwaxaaya okumi ni munepa, munkumana makhuva ni ikhinda, ni anthoriha soowuupuwela ni soohaawela sa murima.

¹³ Vamaithoni a Muluku kheewo eriwo yoowiipithiheya mweephattuweloni yootheene. Sootheene sohooneleliwa ni sohooneya vamaithoni wa Yoowo hiyo nneeraahu nimwaakhuleke.

Yeesu Mutokweenexa a asaserdoti*

¹⁴ Tivawo, woonaka weera nookhalano Mutokweenexa a asaserdoti* mutokotoko, Yeesu, Mwaana a Muluku ovolongwe wiirimu, nivarexexe ni murima wootheene nroromelo ninlapaahu.

¹⁵ Vano, khaninono mutokweenexa a asaserdoti* ohingwera onimorela ikharari ni ohilipawahu, mene aani, Mukina aavinre ngweereriwani wootheene ntoko hiyo, ahitthekakatho.

¹⁶ Okhalaka hiiho, nikhuveeleke ehice ya mahala ni murima woolipa weera naakhele ikharari, ni weera niphwanye mahala annikhavihera ehuhu ya ohaawela.