aHeberi 13 - Emakhuwa Bible

Masu oolipihera ookisera

¹ Mupwaherere osivelana mukina ni mukhwaawe ntoko axunna.

² Muhittiwale oletto, niwoko epakaka yeeyo, akina yaawaakhela andyelo ehisuwelaka.

³ Ngwuupuwelele yaawo ari okaliposo ntoko nyuwotho mureene vamoha ni yaawo. Ngwuupuweleletho yaawo anghasuliwa ntoko nyuwo muhaawaka mweerutthuni asineenaanyu.

⁴ Othelana ontthuneya weera ottittimiheyeke ni ootheene. Ororomeleya variyari wa mulopwana ni mwaariye ontthuneya weera ottittimiheyeketho, niwoko Muluku anaathorihe alavilavi ni anamararuwa.

⁵ Muhilamuliweke ni osivela wa musurukhu, ni muhakalaleleke yeeyo murinaanyu, niwoko Muluku mwaneenaawe eenre:“Nkirwa koohiya, naari koothaama.”

⁶ Hiiho ninoowera ohima ni nroromelo: “Apwiya ti ekhaviherowaaka, nkinoova. Anaawere okeeriha eheeni mutthu?”

⁷ Ngwuupuwelele yaawo ari ahoolelaanyu, yoothalihenreni masu a Muluku. Moone emalihero ya okumaaya ni mutakihe nroromelonaya.

⁸ Yeesu Kristu ti oohiceendyeya: osilo, olelo ni mahuku ootheene.

⁹ Muhikuxiwe ni makhalelo a mahusiho ootheene oohiyanahiyana a amalapo. Ti wooreera weera murimaahu olipihiwe ni mahala, ohikhanle ni yooca, mwa yeeyo ehingwera waapuhiha yaawo anca.

¹⁰ Nookhalano altaari*, mwa yaawo atthu anrumeela mutabernaakuluni* khaantthuniheriwa ocawo.

¹¹ Mutokweenexa a asaserdoti* onkuxa ephome ya axinama mpaka vaNipuroni Nootteela na Ootteela* ntoko yooveleelela yoottheka, mene irutthusaya singhisiwa okerekhere wa esidade.

¹² Hiihotho Yeesu aahaawa okerekhere wa milako sa esidade weera atteelihe muloko niwoko na ephomaawe.

¹³ Tivawo, nivenye, nirowaka wa Yoowo okerekhere wa esidade, nivilelaka ohittittimihiwa Owo ovilenlaawe.

¹⁴ Vano, khaninono vathi esidade yoohimala, mene nnaasaasa yeeyo eneera erwe.

¹⁵ Niwoko na Yeesu, nimvahe Muluku mahuku ootheene yooveleela ya ottottopeliwa, eri yoowiima ya iyano sinlapa Nsinanawe.

¹⁶ Muhittiwale opaka yooreera, naari okawana, niwoko Muluku onghakalalela sooveleela ntoko iyo.

¹⁷ Ngwiiwelele asitokweenaanyu ni mwaakhuleleke ikurusaya. Awo anookosoopani, nyuwo, esuwelaka weera awo ankela owaakhula Apwiya mwaha wa nyuwo. Ngwiiwelele weera mitekosaya sikhale ohakalala, ehikhanle etthu yoolemela, niwoko eyo khayaavareleya etthu wa nyuwo.

¹⁸ Munivekelele hiyo. Noororomela weera nookhalano murima wooreera, ni ninghaawela okhala moota woottittimiheya mwa soothesene.

¹⁹ Kinoodyoonttelelani weera muvekele, weera woowaakuveya miyo kikhale vamoha ni nyuwo.

²⁰ Ti ohaawelawaka weera Muluku a murettele omvenyererihale Yeesu Apwiyaahu, Mukukhuli mutokweene a ikhondoolo, mwa Yoowo owenre ni ephomaawe wiiraanyiha woohimala,

²¹ ookwaneliheni nyuwo mwa sooreera sootheene weera mupake otthunawawe. Owo awere mwa hiyo muteko woomusiveliha mwaha wa Yeesu Kristu, mwa Yoowo okhale ovuwa woohimala. Ame*.

²² Axunnaka, kinoovekelani nyuwo weera muvilele maswaaka a owoopererani. Vekhaikhai, miyo kohoolepelani masu vakhaani.

²³ Kintthuna weera musuwele weera munnihu Timootheyo ootaphuliwa. Owo aphiya woowaakuveya, nkirwe kiwooneni vamoha ni yoowo.

²⁴ Mwaavahe isalaama wa asitokweenaanyu ootheene ni wa ootteela ootheene. Yaawo ari a wItaliya animoovahani isalaama.

²⁵ Mahala ekhale ni nyuwo ootheene.