aHeberi 12 - Emakhuwa Bible

Muluku onaalaka anamwanaawe

¹ Tivawo, neenre nirukureeriwaka ni anamoona ancipalexa, hiyo niixoopole mwa soothesene sinnooceeliha, ni mwa soottheka sinnitthukaxa. Nnitthimakele ni ovilela ephiro Muluku oniiyaathenraawe ohoolowahu,

² ningwehexexaka Yeesu ori ompacereroni ni ommaleloni wa nroromelonahu. Owo aavilela muttanda, aramusaka wuulihawaya muru, asuwelaka ohakalala waamuweherera. Vano ori ekilaathelo moono mulopwana wa ehice ya Muluku.

³ Mmuupuwele Yoole ovilenle mweerutthunimwawe wiittana otokotoko wa anamattheka, weera nyuwo muhikhulumuwe, naari muhikhale oohilipa murima.

⁴ Mukhottoni ni soottheka, nyuwo nlelo khamuwananne iye moota wooweera ephomaanyu yoovuuvihiwa.

⁵ Nyuwo moottiwala masu a olipiha murima Muluku aaweerenlaaweni ntoko anamwane: “Mwanaka, ohiramuse olaka wa Apwiya, ni ohikhale oohilipa murima awo yoolakaka.

⁶ Vano, Apwiya animulaka yoowo animusivelaaya, ni animuttaruxa khula mutthu ammwaakhulelaaya ntoko mwanaya.”

⁷ Mwavilela olakiwa, Muluku anooreherereni ntoko anamwane. Mwaana heeni ohinlakiwa ni atithawe?

⁸ Vano, nyuwo mwaahilakiwaka (nuupuwelelaka weera olakiwa ti wa anamwane ootheene), khweeli nyuwo khamuhiyono anamwane a ekhaikhai, mene a oraruwiwa.

⁹ Ohiya toko yeeyo, naakhalano asitithihu a vathi yaanilaka, ni hiyo nannaattittimiha. Wootepaxa ontthuneya weera hiyo niwiiwelele Atiithi a minepasahu, weera hiiho nikhale ni okumi.

¹⁰ Asitithihu yaanilaka ehuhu vakhaani, ntoko yuupuwelaaya weera waari wooreera, Mulukutho onnilakela mpuhaahu weera niphwanye ntteelihonawe.

¹¹ Naalakiwaka, kheehiyono ehuhu yoohakalaliha, mene yoothananiha. Vahoolowayatho olakiwa onruwera yoowiima ya waakhuleliwa ni Muluku, ni murettele wa yaawo alakiwe.

¹² Tivawo, mulipihe matata ookhulumuwa ni makutha oohilipa.

¹³ Mpakele iphiro soowookowa inaawosanyu, weera ootuthunya ahitepaxe, mene alamihiwe.

Woopiha wa omukhootta Muluku

¹⁴ Mwiilipihe weera mukhale mmuretteleni ni atthu ootheene ni weera mukhale ootteela, niwoko ohikhanle ntteeliho, khaawo eniwoone Apwiya.

¹⁵ Mwiipasoope weera ahikhale mukina, anaasuse wa mahala a Muluku ni weera naari mukwankhwaari mmoha woowaawa ohiphuwe, oruuhaka sookacamiha waananarihaka ancipale.

¹⁶ Ahikhale namararuwa mmoha, naari mutthu onramusa itthu sootteela, ntoko Esawu, mwa yoowo aathumihale ikurusawe sa ntthaara mwaha wa yooca emoha paahi.

¹⁷ Ntoko musuwenlaanyu, vahoolowaya, ahaawelaka waakhela nreeliho, aakhoottiwa. Khaawenre oceendya yeeyo yaamukhumelenle, naamwi aasaasaka nreeliho ni maithori.

¹⁸ Nyuwo khamwaaphiyale vamwaakoni ovarelaka ongwereya otava, hata mpiphini, munihutteni nooriipa, naari ettheku etokotoko,

¹⁹ oruma wa nipalapatta, naari oruma wa masweene yaawo weera yaawo yiiwa, yaadyoonttelela weera ehileeliwetho, naari nsu nimoha.

²⁰ Khayaawera ovilela yeeyo yaalamuleliwaaya: “Mpaka mwaamunama atava mwaako, ontthuneya weera avonyiweke maluku.”

²¹ Vano, yookhumelela ele yaari yoowoopihaxa moota wooweera mpaka Moisesi aaheera: “Kinoothukumela ni woova!.”

²² Nyuwotho moophiya vamwaakoni oSiyoni, wa oYerusaleemu wa wiirimu, wa esidade ya Muluku mukumi. Moophiya wa andyelo oohaalikeleya ethukumanneene ni ohakalala,

²³ wa ekerexa ya matthaara, wa yaawo masinaaya alempwale wiirimu. Moophiya wa Muluku, Mphuki a atthu ootheene, ni wa minepa sa yaale akwanihenre okwanela,

²⁴ wa Yeesu, Namawera a wiiraana onyowani ni wa ephome emisiwe, mwa yeeyo enuuluma yooreeraxa opwaha ya Abeli.

²⁵ Mwiipasoope weera muhimukhootte Yoowo onuuluma. Yaawo yaakhoontte omwiiwa yoowo aawooperera mweelaponi, khayoopongwe ottaruxiwa. Woopwahaxa hiyo nnithorihiwe, namukhootta yoole onnooperera areene wiirimu.

²⁶ Ehuhuweene yeele nsunawe naateterexa etthaya, mene vano yoororomelihiwa ti ela: “Emaara emohatho nkiteterexe, ohikhanle etthaya paahi, mene wiirimutho.”

²⁷ Masu “emaara emohatho” anthoonyera ovenxiwa wa seiye singwereya oteterexiwa, eyo tiiyo itthu sipattuxiwe, moota wooweera sihale seiyo sihingwereya oteterexiwa.

²⁸ Tivawo, woonaka weera nnaakhela omwene woohiteterexeya, nittottopele, ni hiiho nimulape Muluku moota woowaakhuleleya, ni nttittimiho ni woova.

²⁹ Vano, Mulukwaahu ti mooro woolalihaxa.