aHeberi 10 - Emakhuwa Bible

Yooveleela ya Kristu ti yoohimala

¹ Nlamulo ti munttuusi paahi wa sooreera sineera sirwe, ohikhanle ekhaikhai ya seiyo. Tivawo, khaningwera waakwaneliha ni sooveleelasene seiyo simvahiwa eyaakha ti eyaakha yaawo anaattamela weera elape.

² Nawera waakwaneliha, sooveleela saarowa omala. Niwoko waari hiiho, anamalapa, etteelihiwaka emaara emoha, wa mahuku ootheene khayoonatho nthowa na sootthekasaya.

³ Wa soothesene, sooveleela iyo eyaakha ti eyaakha sinnuupuxera sa soottheka,

⁴ niwoko khoongwereya weera ephome ya imombe ni ipuri evenxe soottheka.

⁵ Tivawo, Kristu awaaka mweelaponi, aaheera: “Yooveleela ni yoovaha khamwaatthunne, mene mwaakirehererela erutthu.

⁶ Sooveleela soohisiwa, naari soovaha wa yoottheka khasoosivenleni.

⁷ Vano kaaheera: Kiri va. Yoolempwa* mulivuruni mwaha wa Miyo: kirweenle weera kipake otthunawanyu, Muluku.”

⁸ Woopacera Owo aaheera: “Sooveleela ni soovaha, sooveleela soohisiwa ni soovaha wa yoottheka khamwaatthunne, naari khasoosivenleni.” Seiyo saapakeliwe niwoko nlamulo naanyeserera.

⁹ Vano aapwaherera: “Kiri va. Kirweenle weera kipake otthunawanyu.” Owo ommaliha soopacera weera ekhalihiwe yooveleela yanaaveeli.

¹⁰ Mootthunani wu, nootteelihiwa niwoko na yooveleela ya erutthu ya Yeesu Kristu, evahiwe emaara emoha wa mahuku ootheene.

¹¹ Nihuku ti nihuku asaserdoti* ootheene aneemela ni ampaka mitekosaya sa ediini, evahaka mahuku ootheene sooveleelasene seiyo sihingwera ovenxa soottheka.

¹² Vaheera Musaserdoti* Ola, amalihakaru yooveleelaawe yoohimala emoharu wa yoottheka, aakilaathi moono mulopwana wa Muluku.

¹³ Evenyero vaavaale, Owo onooweherera mpaka amwiittanaawe yiikaathiwe vathi wa inaawosawe.

¹⁴ Vano, niwoko na yooveleela emoharu Owo ohaakwaneliha wa mahuku ootheene yaawo antteelihiwa.

¹⁵ Munepa Wootteela onnikhalela onamoona mwaha wa yeeyo. Woopacera Apwiya yeenre:

¹⁶ “Wu ti wiiraana kineeraaka kipake ni yaawo vahoolo wa mahuku ale, aneera Apwiya. Nkihele malamulowaaka mmirimanimwaya, ni nkilepe mmuupuwelonimwaya.”

¹⁷ Ni yaapwaherera: “Sootthekasaya ni sootakhalasaya nkirwa kuupuwelelatho.”

¹⁸ Weiwo enkhalaayawo elevelelo, khoontthuneya ovahatho yooveleela.

Ororomela ni ovilela

¹⁹ Vano, hiyo nookhalano oweherera otokotoko weera nivolowe mwa nootteela na ootteela* niwoko na ephome ya Yeesu,

²⁰ mphironi enyowani ni ekumi Owo onihulenlaawe eviraka mukuwoni etokotoko, eyo tiiyo mweerutthunimwawe,

²¹ ni nookhalanotho Musaserdoti* mutokotoko vaate wa Muluku.

²² Tivawo, nimwaattamele Muluku ni murima wa ekhaikhai ni noosareya ni nroromelo, nikhalanaka mirima soomisiwa sa mathowa, ni nikhalanaka irutthusahu soorapihiwa ni maahi ootteela.

²³ Nivarexexe nnenesene oweherera ninlapaahu, niwoko Yoowo ororomelihale ti oororomeleya.

²⁴ Nuupuwele moota heeni nneerahu nilipihane mukina ni mukhwaawe wa osivela ni miteko sooreera.

²⁵ Nihihiye othukumana mukerexani, ntoko akina ankhovelelaaya, mene nilipihanaxeke mukina ni mukhwaawe, woonaka weera nihuku eneeraaya erwe Apwiya ninnaattamela.

²⁶ Napwaherera ottheka mwayiini vahoolo woowaakhela esuwelo ya ekhaikhai, kheenghala yooveleela ekina wa yoottheka.

²⁷ Onihalenle paahi oweherera nthorihelo noowoopihaxa na Muluku, ni mooro ovarelaka oniwaahise amwiittana a Muluku.

²⁸ Yoowo aakhoontte nlamulo na Moisesi aahookhwa woohimoreliwa ikharari, nthowanawe nakhaleliwa onamoona ni anamoona eeli, hoye hoye araru.

²⁹ Munuupuwela hai? Ottaruxiwa heeni wootepaxa omphwanela yoole omunyikanlaawe ni inaawo Mwaana a Muluku, yoole oveihale ephome ya wiiraana emutteelihale ni ooruwana Munepa wa mahala?

³⁰ Vano, noomusuwela Yoole eenre: “Isikula ti sawaka, ti Yoomi kinrowa ottaruxa.” Nitho: “Apwiya eniithorihe mulokwaaya.”

³¹ Ti woowoopihaxa omorela mmatatani mwa Muluku mukumi.

³² Muupuwelele mahuku oopacera, mwa yaawo vahoolowaya mwaamwaleeliwaanyu, mwaavilenlaanyu ekhotto etokotoko ya ohaawa.

³³ Imaara sikina nyuwo mwaaruwaniwa ni mwaari moohaawani mwaatthuni, imaara sikinatho mwaahaawa vamoha ni yaawo yaahaawihiwa hiiho.

³⁴ Nyuwo mwaahaamorela ikharari yaawo yaari okaliposo, ni mwaahaakhulela ni ohakalala waakhiwa wa sooreelasanyu, niwoko mwaasuwela weera mookhalano sooreela sitokweene ni soohimala.

³⁵ Tivawo, muhiiyeleelihe nroromelo murinaanyu, niwoko nno nnitthuveliwe nnenesene.

³⁶ Ontthuneya weera nyuwo muvilele mooteene yoowo weera mwaamalihaka opaka otthuna wa Muluku, nyuwo mwaakhele yeeyo Owo ororomelihalaawe.

³⁷ Vano, woowaakuveyaxa “Yoowo aneera arwe, anaarwe, ni kharwa alekela.

³⁸ Yoowo aakhuleliwa ni Miyo anaakhale munroromeloni, mene ahokoleela ottuli, khakisiveliha.”

³⁹ Wa soothesene, hiyo khanihiyono a yaale anghokoleela ottuli ni amphwatiwa, mene a yaale anroromela ni amvuluxiwa.