aGalata 4 - Emakhuwa Bible

¹ Kinghima: owo onrowa waakhela itthu sa asinaangolowaawe areene mukhaaneene, khavirikanne ni epottha, orookhalaru muneene a sootheene.

² Owo onlamuliwa ni yaale animukhapelela ni anthokorora itthusawe mpaka ehuhuweene yeeyo atithawe yaathanlalaaya.

³ Ntokotho hiyo naaraahu akhaaneene, naalamuleliwa ni mikhalelo sa mweelaponimu.

⁴ Yaaphiyalaaya ehuhu eneeneene, Muluku aamuruma Mwanawe, aayariwa mwa muthiyana, munlamuloni,

⁵ weera awoopole yaale yaari munlamuloni weera naakhele waakhuleliwa okhala anamwane a Muluku.

⁶ Hapo muri anamwane a Muluku, Owo aaruma Munepa Wootteela wa Mwanawe wa mirimasanyu, mwa Yoowo oneera: ‘Aba, Tiithi!’

⁷ Hiiho nyuwo khamuhiyono epottha, mene mwaana ni, mweenre mukhalaka mwaana, Muluku ohootatuxani namwaakhela a itthusawe.

Pawulo ongweeteteela aGalata

⁸ Muhinaaye omusuwela Muluku, mwaari ipottha sa miluku seiyo, sihikhanle miluku sa ekhaikhai.

⁹ Vanonto, nyuwo munsuwenleene Muluku, hoye hoye fataari, musuweliweene ni Yoowo, mungwera hai nyuwo ohokoleela mikhalelo iyo, soolosowa ni sa siiyo? Muntthuna okhalatho ipotthasaya?

¹⁰ Wa nyuwo mumpwattha mahuku makina, nyeeri, ihuhu sikina ni iyaakha.

¹¹ Miyo kinoova weera mitekosaka variyariwanyu nsikhale sa siiyo.

¹² Kinoodyoonttelelani axunna, mwiikhalihe ntoko miyo, niwoko miyo kohiikhaliha ntoko nyuwo. Kheewowo etthu mukiveihalaanyuno.

¹³ Ntoko musuwenlaanyu, waari mwaha wa ovoreiwa miyo koolaleenraakani masu ooreeraxa emaara yoopacera.

¹⁴ Waarookhalaru weera erettaaka mwaaheerereliwa nyuwo, nyuwo khamwaakithannye, hata khaamwaakikhoontte. Ohiyanawaya, mwaakaakhela ntoko miyo kaari ndyelo a Muluku, ntoko Kristu Yeesu muneenaawe.

¹⁵ Yaakhumelenle eheeni ni ohakalalawanyu? Koosuwela vekhaikhai weera waawereya, nyuwo saano muzoonleene maithwaanyu weera mukivahe.

¹⁶ Koothatuwa mwiittanaanyu niwoko kooleenlaakani ekhaikhai?

¹⁷ Yaawo aniilipiheraxa weera yoosiveliheni khaampaka nnene. Antthuna woomwalamwalihani ni miyo, weera nyuwotho mwaatthuneke yaawo.

¹⁸ Ti wooreera okhala ni nthiti mwaha wa yooreera mahuku ootheene, khoohiyono paahi miyo kaakhalaka vaavaawo.

¹⁹ Anamwanaaka, miyo kinnahaawatho ovoreiya wa oyara niwoko na nyuwo mpaka Kristu aneeraawe apakeye mwa nyuwo.

²⁰ Kaatthuna okhala ni nyuwo vaanaano vaava ni oceendya muulumelowaaka, niwoko kinnatikhina mwaha wa nyuwo.

Sara ni Hagari

²¹ Mukileele: nyuwo muntthuna wiiwelela malamulo, apaale khamuniiwa malamulo?

²² Vano yoolempwa weera Abrahaamu aakhalano anamwane eeli, mmoha a epottha ni mukina a neethi.

²³ Mwaana a epottha aayariwe munkhaleloni wa erutthu, mene mwaana a neethi aayariwe niwoko na yoororomelihiwa.

²⁴ Eyo ti niphwanaphwaniho ntokotoko. Asithiyana eeli awo anthoonyihera wiiraana miili: wiiraana omoha waapacenre vamwaako Sinayi, ni onaayara anamwane a okaporo. Wu ti Hagari.

²⁵ Hagari ori mwaako ole Sinayi wArabiya ni onthoonyihera esidade ya Yerusaleemu ya vaanaano, eri mpotthani ni anamwanaaya.

²⁶ Vano, Yerusaleemu ya osulu ti neethi, ni eyo ti amayihu.

²⁷ Vano yoolempwa: “Muhakalale nyuwo oohiyara, nyuwo muhimukhalanne mwaana; mukhuwele ni ohakalala, nyuwo muhikhalanne ovoreiya wa oyara, niwoko muthiyana oohiiwa anaakhalane anamwane ancipale, ompwaha muthiyana ootheliwa.”

²⁸ Nyuwo, axunna, muri anamwane a yoororomelihiwa ntoko Isaaki.

²⁹ Ehuhuweene yeele mwaana aayariwe munkhaleloni wa erutthu aamulupattha mwaana aayariwe ni ikuru sa Munepa. Hiihotho olelo.

³⁰ Yoolempwa* enghima eheeni? “Moomole epottha ni mwanaya niwoko mwaana a epottha kharwa aakhela vamoha ni mwaana a neethi.”

³¹ Tivawo axunna, khanihiyono anamwane a epottha, mene aani, a neethi.