Biblia Todo Logo
Bìoball air-loidhne

- Sanasan -

aFilipi 3 - Emakhuwa Bible


Ohiroromele erutthu

1 Wookisera axunnaka, muhakalale mwa Apwiya. Nkinkhulumuwa woolepelani veeli itthu imoharu seiyo, ni seiyo siri itthu soowoolipiherani nyuwo.

2 Mwiipasoope ni alapwa. Mwiipasoope ni yaawo ampaka soonanara; yaawo antthuna wiineliwa paahi.

3 Vano, ti hiyo nri wiineliwa, hiyo ninlapaahu mMunepani wa Muluku, hiyo nniivuwihaahu mwa Kristu Yeesu, ni khaninroromela naari etthu emoha mweerutthuni,

4 hata kikhalanaka mathowa ororomela mwa yeeyo. Akhala mukina onuupuwela weera ookhalano mathowa a ororomela mweerutthuni, ootepaxa ti miyo.

5 Miyo kiineliwe kimalaka mahuku mathannamararu a oyariwawaka, muYixrayeli a epuumba ya Benyamini; muHeberi ooyariwa ni aHeberi; munlamuloni muFarisi*;

6 munthitini namattharatthara a ekerexa; moottharani ekhaikhai ya nlamulo, oohikhala malepa.

7 Mene yeeyo khalayi yaari yoowina wa miyo, vano kinoona ntoko yooriheya niwoko na Kristu.

8 Wootepaxa, kinoona sootheene ntoko oriheya saalikanxiwaka ni otokweene wa esuwelo ya Kristu Yeesu Apwiyaaka. Niwoko na Yaawo koovaherera itthu sootheene. Vekhaikhai kinoona seiyo ntoko mahiloka weera kimphwanye Kristu

9 ni kiphwanyiwe mwa Yoowo, kihikhalanaka ekhaikhaiyaaka enrweela munlamuloni, mene waakhuleliwa weiwe onrweela munroromeloni mwa Kristu, waakhuleliwa weiwe onrweela wa Muluku okhalihiweene munroromeloni.

10 Kintthuna omusuwela Kristu, ikuru sa ovenyererawawe, aani kintthuna okhala mpatta wa ohaawawawe, kithatuwaka ntoko Owo mookhwaanimwawe,

11 munroromeloni, weera kikwaniheretho ovenyerera wa akhwiiye.


Opwahereraka

12 Nkineera weera koophwanya sootheene, naari kookwanihera, mene kinnatthara weera kiphwanye sootheene seiya, niwoko miyotho koophwanyiwa ni Kristu Yeesu.

13 Axunna, nkinuupuwela weera miyo koowera seiya sootheene, mene kimpaka etthu emoha: kittiwalaka itthu siri ottuliwaka, ni kipwahereraka wa seiyo siri ohoolowaka,

14 yoomeene kiniilipiherano yeeyo kaahaawelaaka nri ntthuvelo na wiirimu Muluku oniitthanenlaawe mwa Kristu Yeesu.

15 Ootheene hiyo nunnuwale mmunepani nuupuweleke itthu iyo mooteene yoola, ni mwa etthu ekina nyuwo muupuwela moota mukina, Muluku anoothaliherenitho yeeyo.

16 Ontthuneya paahi weera neetteleke mwa yeeyo niphwannyaahu.

17 Axunna, mukitakihe ni mwaawehexexeke yaawo aneetta moota niwoonihenraahuni.

18 Vano, ntoko kooleelaakani imaara sincipale, ni vano kinooleelanitho ni maithori: aakhala ancipale ankhala ntoko amwiittana a muttanda wa Kristu.

19 Mwaha wa yaawo, ommaleloniwaya ti oriheya; mulukwaaya ti nipwiipwi, ni ovuwawaya ori mwa yeeyo eri yoowuuliha muru; awo anuupuwela paahi itthu sa elapo ya vathi.

20 Wa soothesene, hiyo nri atthu a wiirimu, weiwo nningwehereraahu ni murima wootheene Mvuluxa mmoha, Apwiya Yeesu Kristu.

21 Ni ikurusene seiyo soolamulelano sootheene Owo anaatatuxe erutthwaahu yoowiiyeviha weera elikane ni erutthwaawe yoovuwaxa.

Makhua Shirima Bible © Christelike Lektuurmaatskappy NPC, 2021.

CHRISTELIKE LEKTUURMAATSKAPPY NPC
Lean sinn:



Sanasan