aFilipi 1 - Emakhuwa Bible

Isalaama sookisera

¹ Ya Pawulo ni Timootheyo, arumeiyi a Yeesu Kristu, wa ootteela ootheene mwa Kristu ari oFilipi vamoha ni asitokweene ankosoopa* ni adikoni*:

² wa nyuwo mahala ni murettele wa Muluku Atithihu ni Apwiyaahu Yeesu Kristu.

Otthapela ni ovekela

³ Kinnamutthapela Mulukwaaka khula emaara miyo kingwuupuwelaakani nyuwo.

⁴ Imaara sootheene koovekelelakani nyuwo, kimvekela ni ohakalala

⁵ niwoko na wiiwananawanyu ni masu ooreeraxa, okhuma nihuku noopacera mpaka olelo.

⁶ Kooviriyeliwa weera Owo aapacenre muteko wooreera mwa nyuwo, anaakwanihere yoowo mpaka nihuku na Kristu Yeesu.

⁷ Ti wooreera miyo koonaka hiiha sa nyuwo, woonaka weera nyuwo muri mmurimanimwaka, niwoko, hata kikhalaka moonyooroni, hata kikhalaka oowiixaakiha ni oolipihera masu ooreeraxa, ootheene nyuwo munkhala ni miyo mmahalani mwa Muluku.

⁸ Muluku ti namoonaaka moota miyo kunkheliwaka ni nyuwo ootheene moosiveliwani vancipale mwa Kristu Yeesu.

⁹ Nivekelonaka ti nna: weera osivelawanyu waandyeerereye, wootepaxa moosuwelani ni moomwalamwaxani yooreera ni yoonanara,

¹⁰ weera musuwele yeeyo eri yooreera yoopwaha ni weeratho mukhale ootteela ni woohikhala malepa mpaka nihuku na Kristu.

¹¹ Kimvekela weera musareye ni yoowiima ya ekhaikhai. Yoowiima ela enrweela niwoko na Yeesu Kristu wa ovuwa ni ottottopela wa Muluku.

Ohaawa wa Pawulo onkhavihera omwaramwaxa masu ooreeraxa

¹² Kintthuna weera musuwele, axunnaka, weera yeeyo yaakikhumelenle, yookhavihera opwahereriha masu ooreeraxa.

¹³ Niwoko na yeeyo yoosuweliwa ni anamalipelela ootheene a empa etokotoko ya mutokweene, ni ni akinatho ootheene, weera kitthukiwe niwoko na Kristu.

¹⁴ Ni axunna ancipale oolipiheriwa mwa Apwiya niwoko na otthukiwawaka, weera elaleiye ni nthiti nincipale masu a Muluku ehoovaka.

¹⁵ Ettiitthu weera akina anlaleiya sa Kristu niwoko na nrima ni ohiiwanana, mene akina anlaleiya ni murima wooreera.

¹⁶ Ookisera anlaleiya ni osivela esuwelaka weera miyo kinkhala va kaakihaka masu ooreeraxa.

¹⁷ Awo akina anlaleiya sa Kristu niwoko na otthunawaya asineenaaya, khoohiyono ni murima wa ekhaikhai, yuupuwelaka weera anoowera okihaawiha miyo kitthukiweene.

¹⁸ Empwattheiya hai? Etthu yootthuneyaxa ti weera, hata ni murima woolokottha, naari ni murima wa ekhaikhai, Kristu onoolaleiwa ni tivawo kinghakalalaaka. Mwa yeeyo, nkipwaherere ohakalala.

¹⁹ Vano koosuwela weera, niwoko na mavekelowaanyu ni ekhavihero ya Munepa wa Yeesu Kristu, yeeyo ekikhumelenle eniimalele ni ovuluxiwawaka.

²⁰ Kingweherera ni murima wootheene ni kinroromela weera nkirwa kuuliwa muru ni yakhalaru etthu. Ohiyanawaya, kinroromela weera ntoko ehuhu yootheene, hiiho vaanaano vaava Kristu anunnuwihiwe mweerutthunimwaka: okhalaka mookumini, hoye hoye mookhwaani,

²¹ niwoko wa miyo okumi ti Kristu ni okhwa ti owina.

²² Kapwaherera okhala, yeeyo eniikhavihere mutekwaaka. Vano nkisuwenle yooreera othanla!

²³ Nlelo kiri vamarekhano: Kinghaawela opwaha weera kikhale ni Kristu, yeeyo eri yootepaxa ooreera.

²⁴ Wa soothesene, kiweerelakani nyuwo ootthuneya wootepaxa weera kikhale mweerutthuni.

²⁵ Kiviriyeliweene ni seiyo, koosuwela weera nkikhale ni nkipwaherere ni nyuwo ootheene weera kiwunnuwiheni ni koohakalaliheni munroromeloni.

²⁶ Hiiho, miyo karwa wooxekurani veeli, ohakalalawanyu mwa Kristu Yeesu waatte niwoko na miyo.

²⁷ Yookhala etthu emoha paahi yoopwattha: mweettelowaanyu okhale moota woophwanelela masu ooreeraxa a Kristu. Hiiho, hata miyo karowa ni kiwoonakani, hata kiiwa paahi sa nyuwo kihikhalakawo, kisuwele weera nyuwo mukhale oolipa mwa munepa mmoha paahi, ngwanaka ni murima mmoharu niwoko na nroromelo na masu ooreeraxa,

²⁸ muhiwoovaka hata vakhaani yaawo ari amwiittanaanyu. Wa yaawo eyo eniikhale eneneero ya oriheya, mene wa nyuwo eneneero yoovuluwa, ni eyo enrweela wa Muluku.

²⁹ Vano, wa nyuwo moovahiwa weera muhimuroromele paahi Kristu, menetho ohaawa niwoko na Yoowo,

³⁰ woonaka weera nyuwo mungwana owanawene weiwo moonnaanyu kaawannaaka ni muniiwaanyu weera nlelo kineera kiwanaka.