2 Timootheyo 4 - Emakhuwa Bible

¹ Vamaithoni wa Muluku ni wa Kristu Yeesu, oneeraawe aathorihe akumi ni akhwiiye, ni kuupuwelelaka wooniherawawe ni omwenaawe, kinoodyoonttelelaxa:

² olaleiye masu, okhale oolikana ihuhu sootheene, ovaanye, ohiihe, olipihere ni opixa murima wootheene mmahusihoni.

³ Vano, eniiphiye ehuhu atthu eneeraaya ehitthune ovilela nihusiho na ekhaikhai. Ohiyanawaya, ettharaka soohaawelasaya asineenaaya, eniyaathukumanye anamahusiha weera yaathalihere yeeyo maaruwaaya anghaawelaaya wiiwa.

⁴ Awo eniikhootte wiiwa ekhaikhai, yaahokoleelaka andiisi a khalayi.

⁵ Wa soothesene, weyo wiipasoope mwa soothesene, ovilele soohaawa, ovare muteko wa namalaleiya a masu ooreeraxa, ni okwaniheraxe mutekwaawo.

⁶ Wa miyo, kooyeehiwa ntoko yooveleela yoowura. Yookhuveela ehuhu ya opwahawaka.

⁷ Koowana owana wooreera, koomaliha otthimakawaka, koothokorora nroromelo.

⁸ Vano enookiweherera ecireemba ya ekhaikhai Apwiya, Mphuki oororomeleya, eneeraaya ekivahe nihuku nno, ni khoohiyono wa miyo paahi, menetho wa ootheene ansivela orwawaya.

Masu ookisera

⁹ Waasaase okumana ni miyo woowaakuveya,

¹⁰ niwoko Dema ookihiya miyo, asivelaka elapo ya vathi, ni aarowa oTesalonika. Kresente okenle oGalata, ni Titu okenle oDalmasiya.

¹¹ Ti Luuka paahi ori ni miyo. Omurwaane Marku, niwoko owo onoowera okikhavihera mmutekoni.

¹² Koomurumiha Tikhiko wEfeso.

¹³ Weyo waarwaaka, okiruuhele mukaandyowaaka kihiyalaaka mpaani mwa Karpo oTrowade, nitho ilivurusaka, woopwahaxa seiyo sa exapala.

¹⁴ Alesandre, namahana, ookipaka itthu soonanara sincipale. Apwiya eniimulive ntthuvelo ophwanenlaawe.

¹⁵ Weyotho wiipasoope ni yoowo, niwoko owo aatepa okhala mwiittana a maswaahu.

¹⁶ Ngwiixaakihanimwaka woopacera, khaawo aarwiiye okikhavihera; ootheene yaakihiya. Eyo ehitthariwe.

¹⁷ Apwiyatho yaari ni miyo ni aakivaha ikuru weera mutthenga olaleiwe nnenesene ni miyo, ni weera amalapo ootheene yiiwe owo. Ni miyo koovuluxiwa mmwaano mwa mwatto.

¹⁸ Apwiya eniikivuluxe mwa muteko woonanara wootheene, ni eniikironghe oovuluxiweene moomwenenimwaya wa wiirimu. Wa Yaawo okhale ovuwa mahuku ootheene oohimala. Ame*.

Isalaama sookisera

¹⁹ Omvahe isalaama Priska ni Akila, ni vaate wa Onesiforo.

²⁰ Erasto oohala oKorinto, mene Trofimo kimuhiyale avoreiwaka oMileto.

²¹ Waasaase orwa ohinaaye mulaala. Eubulo, Prudente, Lino, Klawudiya ni axunna ootheene anoovaha isalaama.

²² Apwiya ekhale ni munepaawo. Mahala ekhale ni nyuwo ootheene.