2 Timootheyo 2 - Emakhuwa Bible

¹ Tivawo, weyo mwanaka, olipihere murima mmahalani ari mwa Kristu Yeesu.

² Ni masu okiiwalaawo kihimaka variyari wa anamoona ancipale, waavaherera atthu oororomeleya weera ekhaletho oowera waaxuttiha akina.

³ Ovilele vamoha ni miyo soohaawa ntoko nakhotto ooreera a Kristu Yeesu.

⁴ Yoowo ori nakhotto khampwattha miteko sikina sa okumi; owo onghaawela omusiveliha mutokweene a anakhotto paahi.

⁵ Hiihotho, mutthu ontthimaka ni akina khangwera owina ahiiwelelaka ikano sa otthimaka iwo.

⁶ Namalima omvara muteko wooviha ti yoowo ompacera olawiha soowiima sa soohepha.

⁷ Otthokelele yeeyo kinghimaaka, niwoko Apwiya eniyoovahe wiiwexexa mwa soothesene.

⁸ Omuupuwelele Yeesu Kristu, ovenyererihiwe mookhwaani, a ekhapira ya Davide, ntoko maswaaka ooreeraxa kinlaleiyaaka,

⁹ mwa yaawo kinghaawa mpaka kootthukiwa ni onyooro ntoko namatakhala. Wa soothesene, masu a Muluku khaatthukiwe.

¹⁰ Tivawo kimvilelaaka sootheene niwoko na oothanliwa, weera awotho yaakhele ovuluxiwa ori mwa Kristu Yeesu ni ovuwa woohimala.

¹¹ Masu ala aaphwanela ororomeliwa: Hiyo nakhwa ni Yoowo, nnikhaletho ni okumi ni Yoowo.

¹² Hiyo navilela ni Yoowo, nnilamuletho ni Yoowo; namukhootta Yoowo, Owo anaanikhoottetho.

¹³ Nakhala oohiroromeleya, Owo onookhala oororomeleya, niwoko khangwera wiikhootta mwaneenaawe.

Namuteko oowaakhuleliwa ni Muluku

¹⁴ Opwaherere owuupuxera atthu ootheene itthu iya, owoopereraka yaawo vamaithoni wa Muluku weera ehivolowe moonyakulihanani mwaha wa masu. Eyo kheemphanyereya etthu, ohikhanle waananariha yaawo aniiwa.

¹⁵ Waasaase wiixoonihera wa Muluku, ntoko mutthu oowaakhuleliwa, ntoko namuteko ohikhanleno etthu yoomuulihiha muru, ni onreherera nnenesene masu a ekhaikhai.

¹⁶ Osembe soowuuluma sa siiyo ni soohitteela, niwoko yaawo antthara moota owo, anoopwaherera wootepaxa wa murima woohitteela.

¹⁷ Mahusihowaaya animweettelelana ntoko eretta enkhuura erutthu. Variyariwaya ari Himeneyo ni Fileto.

¹⁸ Awo yaahapuwa mwa ekhaikhai, yeeraka weera ovenyerera wa atthu wookhumelela, ni hiiho aananariha nroromelo na akina.

¹⁹ Wa soothesene, nthipelo noolipaxa na Muluku ninkhala nooweemelaxa, ni nookhalihiwa ni yoolempwa ela: ‘Apwiya anaasuwela yaawo ari awaya’ ni ‘Ootheene anlapa Nsina na Apwiya, esuseke sootakhala.’

²⁰ Mpaani etokotoko khasimphwanyeya paahi nyaapu sa iyuuma soorikaxa, menetho nyaapu sa nyiri ni oloko; sikina mutekwaaya woottittimiheya, vaheera sikina mutekwaaya woohittittimiheya.

²¹ Akhala mukina oniirapiha mwa itthusene seiyo sookisera, anaakhale mwaapu woottittimiheya, wootteelihiwa ni woovareleya muteko wa Apwiya, ni wooreherereliwa muteko wooreera wootheene.

²² Otthawe soohaawela soonanara sa omiravo, ni otthare waakhuleliwa ni Muluku, nroromelo, osivela, ni murettele, vamoha ni yaawo angwiitthana Apwiya ni murima wootteela.

²³ Osembe ovaanyihana wa ololo ni wa siiyo, niwoko weyo woosuwela weera wu ongyara onyakulihana.

²⁴ Murumeiyi a Apwiya khantthuneya onyakulihana, mene aani, ontthuneya okhala oosiveleya ni ootheene, oowera oxuttiha ni opixa murima.

²⁵ Ontthuneya waalaka amwiittanaawe ni murima woomaaleleya, aroromelaka weera Muluku aavahe orukunxa murima, aasuwelihaka ekhaikhai,

²⁶ weera hiiho yuupuwelele nnenesene ni yoopowe mmuraakhoni wa Diyabu*, aatthunkaaya weera epake otthunawawe.