2 Samuweli 8 - Emakhuwa Bible

Ikhotto sa Davide

¹ Eviraka ehuhu, Davide aahaawina aFilisti, anaalamula. Owo aakuxa oMetegi-Ama wa aFilisti.

² Davide aahaawinatho aMowabe. Aahaakuha, anaaringa avarelaka muteko mpatta wa mukhoyi. Owo uurela khula mpatta wanaararu wooringiwa. Khula mipatta miili saahala, aamwiiva. Hiiho aMowabe yaalamuliwa ni Davide emulivaka musoko.

³ Ohiyanawaya, Davide aamuwananotho Hadadezeri, mwaana mulopwana a Rehobi, mwene a oZoba, owo eereraawe okuxatho mweelaponi mukerekhere mooloko Efratesi.

⁴ Davide aakuxa ikaaro sa ikavalu* macira muloko sa Hadadezeri ni anamweettiha ikaarosene seiye macira miloko mathannameeli nitho anakhotto 20 000. Aahintaka mapitaaya ootheene a ikavalu* sa ikaaro ahiyaka ikavalu* ncira.

⁵ Vano awArami a oDamasku yaarwiiyaaya omukhavihera Hadadezeri, mwene a oZoba, Davide aawiiva 22 000 a anakhottwaaya.

⁶ Davide aakhaliha mikuttula sa masintinela moomweneni wa awArami oDamasku ni awArami yaalamuliwa ni yoowo, emulivaka musoko. Vano Yave aanangwiniha Davide mmipattani sootheene aarowaawe.

⁷ Davide aakuxa ixikudu* soowiixaakihera sa eyuuma yoorikaxa sa asitokweene a Hadadezeri, anaruuha oYerusaleemu.

⁸ Owo aakuxatho ebronze* yincipale oTeba ni oBerotayi, mittetthe sa Hadadezeri.

⁹ Vano Tohu, mwene a oHamati, iiwakaru weera Davide aahaawina anakhotto ootheene a Hadadezeri,

¹⁰ aamurumihela mwanawe, Yorami, wa mwene Davide weera amuulumihe ni amuttottopeleke niwoko na owinawawe mukhottoni ni Hadadezeri, mwa yoowo aari mwiittana a Tohu. Yorami aakuxa ni yoowo ikaruma sa eyuuma yoorikaxa, eparatha* ni ebronze*.

¹¹ Mwene Davide aamutteelihera Yave ikaruma iye, ntoko aapakenlaawe ni eyuuma yoorikaxa ni eparatha* ya miloko sootheene aawinnaawe:

¹² awEdomi, aMowabe, awAmoni, aFilisti ni awAmaleki. Aatteeliheratho soohuhula saakuxiwe wa Hadadezeri, mwaana mulopwana a Rehobi, mwene a oZoba.

¹³ Vahoolo woowiiva awEdomi 18 000 Vanreyareyani na Maakha, Davide aatepaxa okhala ni epili.

¹⁴ Owo aakhaliha mipatta sa masintinela mweelaponi yootheene ya wEdomi ni awEdomi ootheene yaalamuliwa ni yoowo. Yave aangwiniha Davide mapuro ootheene aarowaawewo.

Asitokweene a Davide

¹⁵ Davide aalamula muloko wootheene wa aYixrayeli apakaka yeeyo eri ya ekhaikhai ni yoororomeleya wa mulokwaawe wootheene.

¹⁶ Yowabi, mwaana mulopwana a Zeruha, aari mutokweene a anakhotto ootheene a aYixrayeli ni Yehoxafati, mwaana mulopwana a Alihudi, aari mutokweene a ilivuru sa nyaha.

¹⁷ Zadoki, mwaana mulopwana a Ahitubi, ni Ahimeleki, mwaana mulopwana a Abiyatari, yaari asaserdoti*; Seraya aari namalepa a mwene.

¹⁸ Benaiya, mwaana mulopwana a Yoiyada, annaalamula aKereti ni aPeleti ni anamwane asilopwana a Davide yaari asaserdoti*.