2 Samuweli 7 - Emakhuwa Bible

Wiiraana wa Muluku ni Davide

¹ Vahoolowaya mwene aahiitekiha mpaanimwawe ya emwene ni Yave amwiitthuuwiha wa amwiittanaawe ootheene yaamurukureenre.

² Aamweerela Natani, mprofeeti: “Miyo kinkhala va kimankeene mpaani ya emwene yoopakiwa ni nyiri sa esedari*, Arka* a Yave epwahereraka okhala muheemani piswa.”

³ Natani aamwaakhula mwene: “Mpake yeeyo muntthunaanyu, niwoko Yave ori ni nyuwo.”

⁴ Ohiyuweene yoole Yave aamweerela Natani:

⁵ “Murowe mwamuleele murumeiyaaka Davide: ‘Yave oneera ha: Khamuhiyono nyuwo muneera mukitekele empa weera kikhalemo.

⁶ Okhuma nihuku kaakhuminghaaka aYixrayeli wExipitu mpaka olelo nkinakhale mpaani; kaakhalakhala paahi muheemani.

⁷ Mapuro ootheene kaaviraviraaka ni aYixrayeli ootheene, nkinavekeleru naari epuumba emoha kithanlalaaka weera ehoolele mulokwaaka, aYixrayeli okitekela empa ya nyiri sa esedari*.’

⁸ Vano, mwamuleele murumeiyaaka Davide: ‘Yave a ikuru sootheene oneera ha: Kohoovenxani mwaacihaanyuwo muhuwo weera mukhale namalamula a mulokwaaka, aYixrayeli.

⁹ Mmapuroni moothemwene mwaaviraviraanyu kaari ni nyuwo. Kohaawina amwiittanaanyu ootheene ohoolowanyu. Vano kinoovuwiha nsinananyu, ntoko masina a atthu oottittimiheyaxa mweelaponi ya vathi.

¹⁰ Kinoorehererela nipuro mulokwaaka, aYixrayeli, kimakihaka weera okhalane etthokwaayaxa ni ohuungurumihiwe. Miloko sootakhala khasoohooxaniru ntoko woopacera,

¹¹ ni okhuma ehuhuweene yeele kaakhalinghaaka aphuki wa mulokwaaka, aYixrayeli. Kinoowiitthuuwihani wa amwiittanaanyu ootheene. Yave oneeratho weera Owo muneenaawe onookhaliha omwenaanyu.

¹² Waamalaka okumaanyu, muniitthuuwa vamoha ni makholowaanyu, kinoomukhaliha mmoha a ekhapiraanyu weera oorandeleni. Owo onookhala a ekhapiraanyu ni Miyo kinookhaliha omwenaawe.

¹³ Ti yoowo anaakitekele Empa attittimiherelaka Nsinanaka ni kinoolipiha ehice ya omwenaawe wa mahuku ootheene.

¹⁴ Nkikhale Atithawe ni anaakhale mwanaka. Atapanya, kinoomuttaruxa ni nttaruxo na atthu ni ikwamba angwaxulelanaaya atthu.

¹⁵ Vaheera omusivelawaka khommala wa mahuku ootheene ntoko kivenxalaaka omusivelawaka Sawuli, mwa yoowo kimvenxalaaka ohoolowanyu.

¹⁶ Emusaanyu ni omwenaanyu onuukhale wa mahuku ootheene ohoolowaka; ehicaanyu ya emwene eniipwaherere wa mahuku ootheene.’”

¹⁷ Natani aamuthalihera Davide masu ootheene aalangheriwaawe ni ooniheriwaawe ni Yave.

Nivekelo na Davide

¹⁸ Vano mwene Davide aavolowa mutabernaakuluni, anakilaathi vamaithoni wa Yave, anavekela: “Ii! Yave onlamula sootheene, miyo ni emusaaka taani wookiruuhela ekhalelo ela olelo?

¹⁹ Ohiya toko yeeyo, Yave onlamula sootheene, mohuulumatho sa muhoolo wa ekhapira ya murumeiyaanyu. Ti hiiha Yave onlamula sootheene, mungwerihaanyu atthu?

²⁰ Nkirino masu makina. Moomusuwela nnenesene murumeiyaanyu, Yave onlamula sootheene.

²¹ Moopaka etthu etokotoko ela ni moomuthupululela murumeiyaanyu niwoko na moosivelani maswaanyu, muttharihaka otthunawanyu.

²² Ii! Yave onlamula sootheene, Nyuwo mutokweenexa! Khawowo onlikana ni Nyuwo ni nkiniiwe sa muluku mukina ntoko Nyuwo.

²³ Mulokwaanyu aYixrayeli ti woohilikanxereyatho. Ti muloko mmoharu Muluku ooponlaawe weera okhale mulokwaawe. Hiiho Muluku aatatuxa Nsinanawe na epili. Aapaka sootikhiniha sitokotoko oomoloka miloko ni milukusaya ohoolo wa muloko ola ooponlaawe wExipitu.

²⁴ Nyeenyuweene mookhaliha mulokwaanyu, aYixrayeli, ntoko wawinyu wa mahuku ootheene ni Nyuwo, Yave, moothatuwa Mulukwaaya.

²⁵ Vano, Yave Muluku, mukwanihere wa mahuku ootheene yoororomelihaanyu mwaha wa murumeiyaanyu ni ekhapiraawe. Mpake yeeyo muroromelinghaanyu

²⁶ weera Nsinananyu nivuwihiwe mahuku ootheene. Hiiho atthu eniyeere: ‘Yave a ikuru sootheene ti Muluku a aYixrayeli!’ Ni ekhapira ya murumeiyaanyu Davide eniikhale yoolipeene vamaithoniwanyu.

²⁷ Ii! Yave a ikuru sootheene, moomuthupululela yeeyo murumeiyaanyu mweenraanyu: ‘Kinimookhaliherani omwene.’ Tivawo murumeiyaanyu olipihalaawe murima woowoovekelani.

²⁸ Ii! Yave onlamula sootheene, Nyuwo Muluku! Maswaanyu ti oororomeleya ni Nyuwo moomuroromeliha murumeiyaanyu etthu yooreera ela.

²⁹ Vano, ni onnenaanyu mureelihe ekhapira ya murumeiyaanyu weera eyo epwaherere vamaithoniwanyu wa mahuku ootheene. Nyuwo Yave onlamula sootheene, moororomeliha yeeyo! Ekhapira ya murumeiyaanyu eniireelihiwe mahuku ootheene niwoko na mareelihowaanyu.”