2 Samuweli 6 - Emakhuwa Bible

Davide onaaruuha Arka* oYerusaleemu

¹ Davide aahaathukumanyihatho anakhotto ooreerela variyari wa aYixrayeli, ootheenaawo yaari 30 000.

² Owo ni ootheene yaamuhoola yaattimulasa erowaka oBahala oYuda weera yaakuxe Arka* a Muluku mwa yaawo yiitthaneliwaaya ni Nsina na Yave a ikuru sootheene akilaathiki vahiceni variyari wa akerubini* varkani*.

³ Yaawiikaathi Arka* a Muluku mukaaroni enyowani enaathaamiha vaate wa Ahinadabi yaari vanttumuxani. Uza ni Ahiyo, anamwane a Ahinadabi, ti yeettiha ekaaro enyowani,

⁴ Arka* ereene vasuluwaya, ni Ahiyo ti eetta ohoolowaya.

⁵ Davide ni aYixrayeli ootheene yeetta yiinaka ni yiipaka ni murima wootheene vamaithoni wa Yave ni amakita, atthakare ikoma, ikaruma sikina sa nyiri ni ikengere.

⁶ Yaaphiyaaya nipuro nimveeriwa* etrigu na Nakoni, Uza aahookola moono, anaavarela Arka* a Muluku, niwoko imombe saakwakwathuwa.

⁷ Yave aamunyoonyeriwa Uza niwoko na epakelowaawe yoohitteela. Tivawo Muluku aamvulalinghaawe, anakhwela vaavaaleene mukerekhere wa Arka* a Muluku.

⁸ Vano Davide aanyoonyiwa niwoko na isara sa Yave, ni mpaka olelo nipuro nne nniitthaniwa Perezi-Uza.

⁹ Nihuku nne Davide aamoova Yave, aneera: “Moota heeni kineeraaka kaakuxe Arka* a Yave?”

¹⁰ Khaatthunne waakuxa Arka* a Yave weera ekhale ni yoowo musidadeni ya Davide. Ohiyanawaya aaronghale vaate wa Obedi-Edomi, muGati.

¹¹ Arka* a Yave yaakhala vaatevawe Obedi-Edomi, muGati, wa nyeeri miraru ni Yave aamureeliha yoowo ni emusaawe yootheene.

¹² Vanonto mwene Davide aaleeliwa: “Yave oomureeliha Obedi-Edomi ni emusaawe yootheene ni sootheene orinaawe niwoko na Arka* a Muluku.” Vano Davide ni ohakalala otokotokoko wa efesta aarowa vaate wa Obedi-Edomi, analamulela weera eronghiwe Arka* a Muluku esidade ya Davide.

¹³ Yaateexa Arka* a Yave yeettaaya malipa mathannamosa, owo aaveleelaawe emombe ni mwaamombe ooneneva.

¹⁴ Davide, angwanreene mooxikootti a esaseredoti a eliinyu*, anniina vamaithoni wa Yave ni murimaawe wootheene,

¹⁵ owo ni aYixrayeli ootheene yaakuxaleene Arka* a Yave ekhuwelaka ni oruma wa mapalapatta.

¹⁶ Vano Arka* a Yave evolowaka esidade ya Davide, Mikali, mwaana muthiyana a Sawuli, aaweha areene vaxanelani. Owo amoonaka mwene Davide iinaka ni ahakalalaka vamaithoni wa Yave, khaamoonenle.

¹⁷ Yaahaaruuha Arka* a Yave, enawiikaathi vanipuroniwaya muheemani Davide aarehererenlaawe, anapaka sooveleela soohisa ni sa murettele vamaithoni wa Yave.

¹⁸ Owo amalihakaru opaka sooveleela soohisa ni sa murettele, aareeliha muloko mwa Nsina na Yave a ikuru sootheene.

¹⁹ Vano aamvaha khula mutthu a aYixrayeli ootheene – asilopwana ni asithiyana – epaawu emoha, eboolu emoha ya itaamara*, ni eboolu emoha ya iwuuva* soowaarikiwa. Vahoolowaya atthu ootheene yaattimula, khula mutthu arowaka owannyawe.

²⁰ Davide aarowaawe owaani weera areelihe emusaawe, Mikali, mwaana muthiyana a Sawuli, aamuciceera, anamweerela: “Moota olelo mwene a aYixrayeli iiveihalaawe, arulaka vamaithoni wa ipottha ithiyana sa arumeiyaawe ntoko mutthu piswa!

²¹ Davide aamweerela Mikali: “Ettiitthu kohiina vamaithoni wa Yave, mwa Yoowo okithanlale miyo aahiyaka atithinyu hoye hoye akina a vaatewaya weera akikhalihe namalamula a muloko wa Yave – aYixrayeli! Kinoohakalala vamaithoni wa Yave.”

²² Kinimwiiyevihatho kiiveihaka ntoko muhimmaanyu. Vaheera kinoottittimihiwa ni ipottha ithiyana, mwa seiyo munghimaanyu.”

²³ Vanonto Mikali, mwaana muthiyana a Sawuli, khaayanreru mpaka okhwawawe.