2 Samuweli 3 - Emakhuwa Bible

Abeneri onthanla okhala mpatta wa Davide

¹ Ekhotto yaawaniwe variyari wa anamatthara a Sawuli ni a Davide yaalekela. Mpatta wa Davide wannapwaherera oolipa, vaheera wa Sawuli khawaalipa.

² Anamwane asilopwana Davide aayarenlaawe oHeberoni ti ala: Amoni, mwaana mulopwana a Ahinowami oYizereyeli;

³ anaaveeli Kileyabi, mwaana mulopwana a Abigayili, naamukhweli a Nabali oKaremeli; anaararu Abesalomi, mwaana mulopwana a Mahaka mwaana muthiyana a Talemayi, mwene a oGexuri;

⁴ anaaxexe Adoniya, mwaana mulopwana a Hagiti, anaathanu Xefeteya, mwaana mulopwana a Abitali;

⁵ ni anaathanammosa Itereyami, mwaana mulopwana a mwaarawe Davide Egela. Ti yaala anamwane Davide aayarenlaawe oHeberoni.

⁶ Ewanawaniwaka hiihaale Sawuli ni Davide, Abeneri aathatuwa mulopwana ooweraxa mumpattani mwa Sawuli.

⁷ Vano Sawuli aakhalano ekuxo yiitthaniwa Rizepa, mwaana muthiyana a Ayiha. Vanonto Ixi-Boxeti aamukoha Abeneri: “Okonanenle heeni ni ekuxo ya atithaka?”

⁸ Abeneri aanyoonyaxiwa niwoko na yeeyo Ixi-Boxeti uulummaawe, anamwaakhula: “Weeraka miyo mwalapwa a oYuda? Mpaka olelo kinnaroromeleya mweemusini ya Sawuli, ni wa axunnaya ni asinthamwenaaya. Nkoohiyaleni mvariwaka ni Davide. Hata hiiho, munkoothera sa mulattu mwaha wa muthiyana owo!

⁹ Yave akithorihaxe miyo kaahimpakela Davide yeeyo Yave aamuroromelinghaawe ni nlipelo,

¹⁰ avenxaka omwene wa Sawuli amvaraka Davide omwene wa aYixrayeli ni aYuda okhuma oDani mpaka oBerxeba.”

¹¹ Ixi-Boxeti, amoovaka Abeneri, khaamwaakhunle etthu.

¹² Vano Abeneri aamurumihela anamitthenga Davide amweerelaka: “Elapo ela yawani? Mpake wiiraana ni miyo ni miyo kinooreherera weera aYixrayeli ootheene ekhale mpattaanyu.”

¹³ Davide aamwaakhula: “Paahi, kinoopaka wiiraana ni nyuwo, mene kintthuna etthu emoha: Nyuwo muhirwe wa miyo muhikiruuhenle Mikali, mwaana muthiyana a Sawuli.”

¹⁴ Davide amurumihela anamitthenga Ixi-Boxeti, mwaana mulopwana a Sawuli, amunyesererihaka: “Mukinnyerere mwaaraka Mikali. Kaamuthuma wa Sawuli ni mutteengo wa matusu ncira a aFilisti.”

¹⁵ Ixi-Boxeti aalamula weera Mikali aroweliwe wa Palitiyeli, mwaana mulopwana a Layixi.

¹⁶ Wa soothesene, aiyawe yaamutthara yiinlaka mpaka oBahurimi. Vano Abeneri aamweerela: “Muhokoleele owaani” ni owo aahokolowa.

¹⁷ Abeneri aathukumana ni asitokweene a aYixrayeli aweerelaka: “Okhuma khalayi mootthuna omvara Davide omwene.

¹⁸ Vano yoophiya ehuhu yoomvara, niwoko Yave aamuroromeliha Davide: ‘Kinoopola mulokwaaka mmatatani mwa aFilisti ni mwa amwaattamanaaya ootheene kimvarelaka muteko murumeiyaaka Davide.’”

¹⁹ Abeneri aarowa wuulumatho ni aBenyamini. Vahoolowaya aarowa oHeberoni omuleela Davide sootheene aYixrayeli ni aBenyamini yaakhulenlaaya.

²⁰ Abeneri vamoha ni asilopwana miloko miili ephiyaleene wa Davide oHeberoni, owo aamurehererela Abeneri efesta vamoha ni yaawo aaraaweno.

²¹ Vano Abeneri aamweerela Davide: “Mukihiyeke kirowe weera kaathukumanyihe aYixrayeli ootheene, pwiiyaaka mwene, weera awosa epake wiiraana ni nyuwo ni weera mulamule sootheene muntthunaanyu.” Vano Davide aamuhiya Abeneri arowaka, anapwaha mmuretteleni.

Yowabi ommwiiva Abeneri

²² Ehuhuweene yeele asilopwanaawe Davide vamoha ni Yowabi yaahokolowa vahoolo woohuhula nipuro nikina ekuxaleene soohuhula sincipale. Mene Abeneri khaakhanletho ni Davide oHeberoni, niwoko Davide aamuhiya apwahaka mmuretteleni.

²³ Yowabi aphiyaka ni anakhotto ootheene, aaleeliwa weera Abeneri, mwaana mulopwana a Neri, aaphiya wa mwene ni weera mwene aamuhiya apwahaka mmuretteleni.

²⁴ Vano Yowabi aarowa wa mwene, anamweerela: “Mpankeni? Moone, Abeneri aarowa wa nyuwo, munamuhiya apwahaka!

²⁵ Moomusuwela Abeneri, mwaana mulopwana a Neri. Aarweenle woolokotthani woona okhalawanyu ni seiyo mumpakaanyu.”

²⁶ Yowabi aamuhiya Davide, anamurumihela anamitthenga Abeneri ni awosa yaamuhokoloxa okhuma ohimeni ya oSira. Vano Davide khaasuwenle yeeyo.

²⁷ Vano Abeneri ahokoleelakaru oHeberoni, Yowabi aamwiitthana okhwipi vamulako wa esidade, uulumakano ntoko exiiri. Vanonto Yowabi aamvulaliha nipwiipwi. Abeneri aakhweenle niwoko na ephome ya Asaheli, munneiye Yowabi.

²⁸ Vahoolowaya, Davide iiwakaru yeeyo, aaheera: “Wa mahuku ootheene miyo ni omwenaaka khanikhalanoru nthowa vamaithoni wa Yave mwaha wa ephome ya Abeneri, mwaana mulopwana a Neri.

²⁹ Nthowa na okhwa wa Abeneri nikhale na Yowabi ni emusaawe yootheene! Ahikhale a ekhapiraawe anaahaleele ohaawa ithuku sootathareya, maleepela, orakala, wiiviwa ni ekatana hoye hoye ovoliwa etala.”

³⁰ Yowabi ni munneiye Abixai yaamwiiva Abeneri niwoko owo aamwiiva munneiye Asaheli mukhottoni ya oGibiyoni.

³¹ Vano Davide aamweerela Yowabi ni ootheene yaari ni yoowo: “Mwaahule soowarasanyu, ngware sa wiinanela ni munghoolele Abeneri munlalamikelaka!” Mwene Davide muneenaawe aatthara edyaneesa ya muttembo.

³² Yaamvitha Abeneri oHeberoni ni mwene aahiinla akhuwelaka ohoolo wa nihiye na Abeneri. Ni atthu ootheene yaahiinlatho.

³³ Mwene aahiipa ecipo ya omulalamikela Abeneri: “Khawaawereya Abeneri okhwa ntoko mutakhali.

³⁴ Hata matataanyu naari inaawosanyu khasaatthukiwe ni onyooro. Nyuwo mukhwiiye ntoko mutthu oniiviwa ni alavilavi.” Ni atthu ootheene yaamwiinlelaxa yoowo.

³⁵ Vahoolowaya yaawo yaari ni Davide yaamudyoonttelela oca etthu ohinaaye wiila, mene Davide aalipela eeraka: “Yave akittaruxe miyo kaca yakhalaru etthu ohinaaye wiila.”

³⁶ Ootheene yaahoona ni eyo yaahaasiveliha. Vekhaikhai sootheene mwene aapankaawe sannaasiveliha.

³⁷ Nihuku nenenenne aYixrayeli ootheene yaasuwela weera Davide khaakhalenle mpatta wa wiiviwa wa Abeneri, mwaana mulopwana a Neri.

³⁸ Vano mwene aaweerela asilopwanaawe: “Khamusuwenle weera olelo mwaana a mwene ni mulopwana oottittimiheyaxa ohookhwa oYixrayeli?

³⁹ Olelo, kirookhalaru mwene oottikittheliwa ni Muluku, kookhulumuwa. Anamwane ale a Zeruha ti oolipa okipwaha miyo. Yave amuttaruxe yoowo ophwanenle ottaruxiwa mwa yoonanaraawe!”