2 Samuweli 23 - Emakhuwa Bible

Masu ookisera a Davide

¹ Masu ookisera a Davide ti ala: “Masu a Davide, mwaana mulopwana a Yixai; masu a mulopwana ovuvihiwe; mulopwana oottikittheliwa ni Muluku a Yakobe; namwiipa a icipo oYixrayeli:

² Munepa wa Yave wohuuluma mwa miyo; maswaaya yaari vanluminivaka.

³ Muluku a aYixrayeli ohuuluma; Mwala a oYixrayeli ookeerela: ‘Yoowo onaalamula atthu moota woororomeleya; yoowo onlamula amoovaka Muluku,

⁴ ori ntoko waara wa nsuwa nikhumaka ehikhanle mahutte; ntoko nsuwa nnoopa erupaleene epula nnunnuwiha nyiri sa vathi.’

⁵ Emusaaka yohaakhuleliwa ni Muluku. Owo ookikhalihera wiiraana woohimala – woolipihiwa ni woororomelihiwa mmikhaleloni moothemwene. Vekhaikhai Owo onookeettiherela nnenesene mwa sootheene, akivahaka sootheene kinghaawelaaka.

⁶ Vaheera anamatakhala amvonyeriwa okerekhere ntoko nyiiwa sihinkwesereriwa ni matata.

⁷ Yaale ankweserera, amvarela muteko ekaruma hoye hoye mvitto wa nivaka. Hiiho nyiiwa singhiseriwa woomalela vaavaawo siraayawo.”

Anakhotto ooweraxa a Davide

⁸ Masina a anakhotto ooweraxa a Davide ti ala: Yoxebi-Baxebeti, muTakemoni mmoha aari mutokweene a atthu araru ooweraxa. Aavarela nivakanawe mweehuhuni ekina anaawanano asilopwana macira mathannamararu, anawiiva khuluwi.

⁹ Vahoolowawe aari Eleyazari, mwaana mulopwana a Dodai, ngwAhohi. Aaritho mmoha a anakhotto araru ooweraxa yaari ni Davide aFilisti yaathukumannaaya oPasi-Damimi weera ewane. aYixrayeli akina yaatthawa,

¹⁰ mene owo aapwaherera vanipuroniwawe aawananaka aFilisti mpaka ntatanawe omuuma mwaha wa ovukhula ekatana. Nihuku nne Yave aahaawinihaxa aYixrayeli, anakhotto enahokoleelasa aaraawewo Eliyazari, mene yaarowenle ohuhula mittembo paahi.

¹¹ Vahoolowawe aari Xama, mwaana mulopwana a Age, muHarari. aFilisti yaathukumana vanipuroni yaaraayawo ematta yoosareya iroro. Anakhotto a aYixrayeli yaahaatthawasa aFilisti.

¹² Wa soothesene, Xama aaheemela eriyari ya ematteene yeele, anaakihera ematta awiivaka aFilisti. Yave aangwinihaxa.

¹³ Mweehuhuni ya ohepha, asitokweene araru a nakupa a asitokweene miloko miraru, yaarowa omukumanano Davide munikhukuni na wAdulami. Vano ehuhuweene yeele yaakhala anakhotto akina a aFilisti yaakonenle vanreyareyani na oRefayimi.

¹⁴ Ehuhuweene yeele Davide aahiipitha wootthawelawawe, anakhotto a aFilisti ereene oBeteleheemu.

¹⁵ Davide aavolaxiwa ntthona, aneera: “Ii! Taani anaakivahe maahi oowura a muhimeni vakhiviru vamulako wa oBeteleheemu?”

¹⁶ Vano asilopwana araru ooweraxa ale yaavira yaakonenlaayawo anakhotto a aFilisti, enarika maahi muhimeni vakhiviru vamulako wa oBeteleheemu, enamuronghela Davide. Vanonto, aakhootta owura, amiinelaka ntoko yooveleela vamaithoni wa Yave.

¹⁷ Owo aaheera: “Ii! Yave nkingwuraru maahi ala! Kawura, waahilikaneke ni ephome ya anakhotto alemve okumaaya weera eruuhe.” Vano Davide khaawunre. Iye saari soopaka sa anakhotto araru ooweraxa.

¹⁸ Abixai, munneiye Yowabe, mwaana mulopwana a Zeruha, aari mutokweene a Miloko Miraru. Ehuhu emoha aawiiva anakhotto macira mararu ni nivakanawe, epilaawe elikanaka ni ya anakhotto araru ale.

¹⁹ Aattittimiheyaxa waapwaha akina a Miloko Miraru anathatuwa mutokweenaaya, mene khaalikananne anakhotto araru ooweraxa.

²⁰ Benaiya, mwaana mulopwana a Yehoyada, aari nakhotto oominya murima oKabezeyeli aapanke itthu sitokotoko. Aawiiva anakhotto eeli ooweraxa a aMowabe. Nihuku nimoha nooriiraxa aavolowa mulittini anamwiiva mwatto.

²¹ Aamwiivatho ngwExipitu oorakamaxa. ngwExipitu aavarela nivaka ni Benaiya aangwanano ni ekopo. Aamwaakha nivaka mmatatani mwa ngwExipitu, anamwiivano.

²² Iye saari soopaka sitokotoko sa Benaiya, mwaana mulopwana a Yehoyada. Owo aakhalanotho epili ntoko anakhotto araru ooweraxa.

²³ Aattitimihiwatho waapwaha akina a Miloko Miraru, mene khaalikananne araru ale. Davide aamukhaliha ntoko mutokweene a anamalipelelaawe.

²⁴ Variyari wa Miloko Miraru yaari: Asaheli, muneiye Yowabe, Elihanani, mwaana mulopwana a Dodo a oBeteleheemu,

²⁵ Xama, muHarodi, Elika, muHarodi,

²⁶ Helezi, muPaleti, Ira, mwaana mulopwana a Ikexi a oTekowa,

²⁷ Abiyezeri ngwAnatoti, Mebunai, muHuxati,

²⁸ Zalemoni, ngwAhohi, Maharai, muNetofati,

²⁹ Heledi, mwaana mulopwana a Bahana, muNetofati, Itai, mwaana mulopwana a Ribai a oGibeya, mweelaponi ya aBenyamini,

³⁰ Benaiya, muPiratoni, Hidai a maxaapwa a oGahaxi.

³¹ Ali-Aleboni, ngwArebati, Azemaveti, muBarehumi,

³² Elihaba, muXahaleboni, anamwane a Yaxeni, Yonatani,

³³ mwaana mulopwana a Xama, muHarari, Ahiyami, mwaana mulopwana a Xarari, muHarari,

³⁴ Elifeleti, mwaana mulopwana a Ahasebai, mMahakati, Eliyami, mwaana mulopwana a Ahitofeli, muGiloni,

³⁵ Hezero, muKarameli, Paarai, ngwArebi,

³⁶ Igali, mwaana mulopwana a Natani oZoba, mwaana mulopwana a Hageri,

³⁷ Zeleki, ngwAmoni, Naharai, muBeheroti, namakuxa a ikapwitthi sa Yowabe, mwaana mulopwana a Zeruha,

³⁸ Ira, ngwIteri, Garebi, ngwIteri ni

³⁹ Uriya, muHiti. Ootheenaawo yaari miloko miraru ni athanneeli.