2 Samuweli 12 - Emakhuwa Bible

Natani onthaliha nttaruxo wa Davide

¹ Yave aamurumihela Davide mprofeeti Natani. Aphiyakaru, aamweerela: “Musidadeni emoha yaakhala asilopwana eeli – mmoha aari namapuha ni mukina oohaawa.

² Namapuha aarino ikhondoolo ni imombe sincipalexa,

³ Vaheera mulopwana oohaawa khaarino mihuwo ehikhanle eputtiputthi ekhaani aathummaawe. Owo aahuwa, enunnuwa ni yoowo vamoha ni anamwanaawe. Eyo yaaca vamoha, yaawurera ekomixaawe – mpakatho yaakona vayaawaniwawe. Yaari ntoko mwaana muthiyana wa yoowo.

⁴ Vano muletto mmoha aaphiyera vaate wa namapuha, mene owo khaatthunne omwiivela emoha ya ikhondoolosawe hoye hoye imombesawe weera amwaapeele. Ohiyanawaya, aakuxa eputtiputthi ya mulopwana oohaawa, anamwaapeela muletto aamphiyerenle.”

⁵ Davide aamunyoonyeraxiwa namapuha ole, anamweerela Natani: “Kinlipela mwa Nsina na Yave, mulopwana opanke yeeyo omphwanela wiiviwa!

⁶ Owo aliveke mutteengo wa imaara ixexe wa eputtiputthi, eenre apaka etthu eyo ahimorelaka ikharari.”

⁷ Vano Natani aamweerela Davide: “Mutthweene yoowo ti nyuwo! Yave Muluku a aYixrayeli oneera ha: ‘Kohoottikitthelani omwene wa aYixrayeli ni kohoovuluxani mmatatani mwa Sawuli.

⁸ Kohoovahani empa ni axaara a pwiiyaanyu. Kohoovahani ikhapira sa aYixrayeli ni aYuda. Sootheene iye sahookhwanneni, saano koovangheenenitho.

⁹ Muramburenle heeni masu a Yave mpakaka yeeyo eri yoonanara vamaithoniwawe? Momwiiva Uriya, muHiti, ni ekatana ya awAmoni, munamukuxa mwaariye.

¹⁰ Mweenre mukiramburaka munkuxaka mwaariye Uriya, muHiti, vaatevanyu, khoomala owanawana.’

¹¹ Yave oneeratho ha: ‘Kinimuulihiha muru veemusiniwanyu. Vamaithoniwanyu kinimwaakuxa axaarinyu kimvahaka mukina ni owo onimwaakonano woohikhuwanyeya.

¹² Moopaka etthu ele muxiirini; Miyo kinoopaka yeeyo woohikhuwanyeya vamaithoni wa aYixrayeli ootheene.’”

¹³ Vano Davide aamweerela Natani: “Koomutthekela Yave.” Natani aamwaakhula: “Yave oolevelela yootthekaanyu. Nyuwo khamukhwa.

¹⁴ Wa soothesene, mweenre munruwana Yave, mwaninyu mulopwana onimookhwa.”

Okhwa wa mwaana mulopwana a Batixeba

¹⁵ Natani arongweene owaani, Yave aamutannyera eretta mwaana a mwaariye Uriya muHiti aamuyarannaawe Davide.

¹⁶ Davide aamudyoonttelela Yave amweerelaka mwaana ole. Owo aatthuka, anavolowa mpaanimwawe avirihaka ohiyu akonneene puruvuru.

¹⁷ Asitokweene a vaatevawe yaaheerera omvenxa vathi, mene aakhootta ni khaatthunne oca.

¹⁸ Vanihukuni nanaathannameeli mwaana ole aahookhwa. Arumeiyi a Davide yaahoova omuleela weera mwaana ohookhwa, niwoko yuupuwela: “Mwaana nlelo areene ni okumi, naamuulumano, mene owo khaaniiwelenle. Moota heeni nneeraahu nimuleele weera mwaana ohookhwa? Apaale onoopaka etthu ya ololo.”

¹⁹ Davide oonaka weera arumeiyi yaamwaapelana, aasuwela weera mwaana aahookhwa, aahaakoha: “Mwaana ohookhwa?” Awosa yaamwaakhula: “Ohookhwa.”

²⁰ Vano Davide aavenya, anarapa, aniixunkheliha, anaceendya soowara, anavolowa Empa ya Yave, anamutthapela. Vahoolowaya aarowa owannyawe, anavekela oreherereliwa yooca, anaca.

²¹ Arumeiyaawe yaamukoha: “Mumpakelani hiiha? Mwaana areene mukumi, mwaatthuka mwiinlaka, vaheera mwaana akhwaakaru, mumvenyaanyu, munaca!”

²² Owo aawaakhula: “Mwaana areene mukumi, kaatthuka, kiniinla, kuupuwelaka: ‘Apaale Yave onookimorela ikharari amuhiyaka mwaana okhala ni okumi.’

²³ Vaheera, eenre akhwaaka, khoontthuneya weera kitthuke. Nkingwera omuhokoloxera okumi. Miyo kinoorowa wa yoowo, mene owo khahokoleela wa miyo.”

Oyariwa wa Salomoni

²⁴ Vano Davide aamupepesa mwaariye, anarowa wa yoowo, anamukonano. Batixeba aamuyanre mwaana mulopwana, anamutteha Salomoni. Yave aamusivela,

²⁵ ni aamurumihela Davide mprofeeti Natani ni mutthenga. Natani aamutteha mwaana Yedidiya.

Owiniwaxa wa awAmoni

²⁶ Eyo eri hiiho, Yowabe aawanano oRaba wa awAmoni ni aakuxa esidade ya emwene.

²⁷ Vano Yowabe amurumihela Davide anamitthenga eeraka: “Koowanano oRaba, kinaakamela mattankhi a maahaaya.

²⁸ Vano ngwiitthane anakhotto akina ootheene, mwawaneno esidade ni mwakuxe. Mwaahikuxa esidade, kinimwiiwanyeya weera koowina.”

²⁹ Vanonto Davide aawiitthana anakhotto ootheene, anarowa oRaba, anawanano, anakuxa.

³⁰ Aamurula ecireemba vamuru wa mwenaaya – olemelawaya waari ikiilu* miloko miraru niixexe. Ecireemba ele yaakhalano maluku oowaaraxa. Aatthukiwa Davide. Owo aakuxa soohuhula sincipalexa sa esidade.

³¹ Aahaaruuhatho amaki a esidade ele, anaanyesereriha ovara muteko ni esera*, epikareta* ni ipaso. Yaalamuleliwatho opaka indyerwa. Davide aapaka hiiho isidade sootheene sa awAmoni. Vahoolowaya Davide ni anakhottwaawe yaahokolela oYerusaleemu.