2 Samuweli 11 - Emakhuwa Bible

Oraruwa wa Davide

¹ Mmalayaakha, mweehuhuni mamwene yaakhovelenlaaya owana, Davide aamurumihela Yowabi vamoha ni arumeiyaawe ni anakhotto ootheene a aYixrayeli okhottoni. Yaahaaphwata awAmoni, enarica oRaba. Vaheera Davide aahanle oYerusaleemu.

² Oxekuwa omoha Davide aavenya vakaamani, aneetteetta vataratoni ya empa ya mwene. Areene hiihaale vataratoni, aamoona muthiyana ooreeraxa arapaka.

³ Davide aamurumihela mukina weera amusuwele muthiyana taani yoole. Mulopwana owo aamweerela Davide: “Ti Batixeba, mwaana muthiyana a Eliyami, mwaarawe Uriya, muHiti.”

⁴ Vano Davide aalamulela oruuhiwa. Betixeba aarowa wa yoowo ni Davide aamukonano. Eera amalihaleene vaanaanoru mwiikho wa asithiyana. Vahoolowaya aahokoleela owaani.

⁵ Muthiyana ole aarupala, anamurumihela ihaali Davide eeraka: “Koorupala.”

⁶ Vano Davide aamurumihela mutthenga ola Yowabe: “Mukirumihele Uriya, muHiti.” Vanonto Yowabe aamurumiha.

⁷ Uriya aphiyakaru, Davide aamukoha moota aaraawe Yowabe ni anakhotto ni moota ekhotto yeettaaya.

⁸ Vano Davide aamweerela: “Murowe owannyinyu, mwiitthuuwe vakhaani.” Uriya aavenya empa ya mwene ni aarumiheliwa yoovaha ya mwene.

⁹ Vaheera, Uriya aakonne vamulako wa empa ya mwene vamoha ni arumeiyi a apwiyaawe ootheene ahirowaka owaani.

¹⁰ Davide iiwakaru weera Uriya khaarongwe owaani, aamukoha: “Munkhuma ottai – muroweke owaani.”

¹¹ Uriya aamwaakhula: “Arka* ni asilopwana a oYixrayeli ni oYuda aniitthuuwa muheemani ni pwiiyaaka Yowabe ni anakhotto a pwiiyaaka akonelanse vattendereni. Vekhaikhai nkingwera orowa owaani weera kace, kawure ni kamukoneno mwaaraka! Kinlipela mwa okumaanyu weera nkipaka siiyeeyo!”

¹² Vano Davide aamweerela: “Mukhaleke wenno wa nihuku nimohatho. Vahoolowaya kinimoohokoloxerani.” Tivawo Uriya aakhanlaawe oYerusaleemu nihuku nne ni oxaawaya.

¹³ Davide aamulattula, ni Uriya aahooca ni aawura ni yoowo ni Davide aamuhapaliha. Wa soothesene, ohiyu, Uriya aavenya, anarowa okona vamwinliniwawe ni arumeiyi a apwiyaawe; khaarongwe owaani.

Davide onlamula weera Uriya iiviwe

¹⁴ Oxaawaya Davide aamulepela ekaratta Yowabe, amwinnyereraka Uriya.

¹⁵ Mukarattani mmwe aalepa: “Munghoolihe Uriya mmwiikaathiki mpatta eneeraaya eluttuwaxe ekhotto ni mwamuhiyewo meekhaawe weera avulalihiwe ni akhwe.”

¹⁶ Eenre Yowabe arica esidade, aamwiikaathi Uriya vanipuroni yaaraaya amwiittanaaya oolipaxa.

¹⁷ Asilopwana a esidade yaavenyaaya weera yaawanane anakhotto a Yowabe, akina a anakhotto a Davide yaahookhwa – hiihotho Uriya, muHiti.

¹⁸ Yowabe aamurumihela Davide sooweereya sootheene sa okhottoni.

¹⁹ Aamulamulela namutthenga: “Mwaamalihakaru oomvaha mwene ethalihero ela ya ekhotto,

²⁰ wookhala woonyoonyiwaka mwene ookohakani: ‘Mwaakhuveelelaxa heeni esidade weera ngwanewo? Khamwaasuwela weera awosa yaaheereke woolathasani ereene vaxirini?

²¹ Taani amwiivale Abimeleki, mwaana mulopwana a Yerubi-Bexeti? Aari muthiyana mmoha vaxirini aamukurukundulenle nxilo vamuruwawe moota wooweera aahookhwa oTebezi. Mwaakhuveelela heeni exiri?’ Owo ookohani yeeyo, vano mwamwaakhule: ‘Mpaka murumeiyaanyu Uriya, muHiti ohookhwa.’”

²² Namutthenga aapwaha, anaphiya wa Davide, anamuthalihera sootheene Yowabe aamulamulenlaawe ohima.

²³ Namutthenga aamweerela Davide: “Amwiittana yaanirweela mmatta eniwananaka moota woovihaxa onipwaha hiyo, mene noowoomola mpaka vamulako wa esidade.

²⁴ Vano alipa oolatha nyuupa vaxirini yaahaalathela arumeiyaanyu ni akina a asilopwana a mwene aahookhwa. Murumeiyaanyu Uriya, muHiti, ohookhwatho.”

²⁵ Davide aamweerela namutthenga: “Mwamuleele Yowabe: ‘Muhiicikulele niwoko na yeeyo. Itthu iya sinneereya mukhottoni. Mpwaherere owanano esidade mpaka ophwata.’ Mwamuleele yeeyo Yowabe weera alipiheye murima.”

²⁶ Mwaarawe Uriya iiwakaru weera aiyawe ahookhwa, aawiinlela.

²⁷ Omalakaru wiinanela, Davide aalamulela weera aruuheliwe owannyawe ni owo aamuthela, anamuyarano mwaana mulopwana. Vano, yeeyo Davide aapankaawe khayaamusivenle Yave.