2 Samuweli 10 - Emakhuwa Bible

awAmoni ni awArami oowiniwa

¹ Eviraka ehuhu, mwene awAmoni aahookhwa ni mwanawe mulopwana Hanuni ti aamurandenle.

² Davide aahuupuwela: “Kinoomoonihera murima wooreera Hanuni, mwaana mulopwana a Nahaxi, ntoko atithawe yaakireerenlaaya.” Tivawo aaruminghaawe anamitthenga wa Hanuni weera oonihere othananawawe niwoko na okhwa wa atithawe. Vanonto anamitthenga a Davide yaaphiyalaaya mweelaponi ya awAmoni,

³ maneethi a awAmoni yaamweerela pwiiyaaya Hanuni: “Muhuupuwele weera Davide onimwaattittimiha atithinyu aarumihelaka asilopwana weera oonihere opepesa. Owo aarumihenle ohottela esidade eerelaka okuxa.”

⁴ Vano asilopwana a Hanuni yaahaavara anamitthenga a Davide, enaamettha ireru okopolomoha, enarenkha soowarasaya mmakhuttuni, enaahiya erowaka.

⁵ Iiwakaru yeeyo, Davide aahaarumihela anamitthenga weera yaaciceere asilopwana ale niwoko yaamuulihiheya muru. Mwene aaweerela: “Ngweherere oYeriko mpaka irerusanyu wunnuwa ni vahoolowaya muhokoleeleke owaani.”

⁶ awAmoni, esuwelaka weera yaahiitothela manyaanya wa Davide, yaahaaliva anakhotto 20 000 awArami oBeti-Rehobi ni oZoba nitho mwene a oMahaka vamoha ni anakhotto macira muloko ni anakhotto 12 000 a oTobi.

⁷ Iiwakaru yeeyo, Davide aamulamulela Yowabe weera arowe ni anakhotto ootheene.

⁸ awAmoni yaarowa, enathataanela owana vamulako wa esidade; awArami a oZoba ni Rehobi ni asilopwana a Tobi ni a oMahaka ethataanenleene mmatta.

⁹ Yowabe aahoona weera ooriciwa, anaathanla akina a anakhotto ooweeraxa oYixrayeli weera yaawaneno awArami.

¹⁰ Aahaahiya anakhotto akinaawo elamuliwaka ni Abixai, munneiye, weera yaawaneno awAmoni.

¹¹ Yowabe aamweerela Abixai: “awArami yalipaxa okipwaha miyo, nyuwo murwe mukikhavihere; awAmoni yalipaxa woopwahani nyuwo, miyo kinimookhaviherani.

¹² Murima khuru, niwanele mulokwaahu ni isidade sa Mulukwaahu oolipeene murima. Yave apake yeeyo enimureerela.”

¹³ Vano Yowabe ni anakhottwaawe yaarowa waawanano awArami enamutthawasa.

¹⁴ awAmoni yoonakaru weera awArami yaamutthawa Yowabe, awosatho yaamutthawa Abixai, enatthawelasa musidade. Vanonto Yowabe aahiya waawanano awAmoni, anahokoleela oYerusaleemu.

¹⁵ awArami yoonaka weera aawiniwa ni aYixrayeli, yaathukumanatho.

¹⁶ Hadadezeri aalamulela oruuhiwa awArami yaakhala okhopela mooloko. Awosa yaaphiyasa oHelami, ehooleliwaka ni Xobaki, mutokweene a anakhottwaawe Hadadezeri.

¹⁷ Davide aleeliwaka yeeyo, aahaathukumanyiha aYixrayeli ootheene, enamulapuwa Yordanu, enaphiya oHelami. awArami yaathataana weera yaawaneno anakhotto a Davide.

¹⁸ Wa soothesene, yaahaatthawasa aYixrayeli. Davide aawiiva anamweettiha a ikaaro sa ikavalu* 700 ni anakhotto 40 000. Xobaki, mutokweene a anakhotto, aaphwanyihiwa anakhwela vaavaaleene.

¹⁹ Mamwene ootheene yaamukhavihenre Hadadezeri yoonakaru weera awArami aawiniwa ni aYixrayeli, yaahaavekela murettele aYixrayeli enalamulasiwa ni yaale. Tivawo awArami yahaatthunaaya waakhaviheratho awAmoni.