2 Nyaha 8 - Emakhuwa Bible

Soopakiwa soohiyanahiyana sikina sa Salomoni

¹ Siviraleene iyaakha miloko miili, mweehuhuni Salomoni aapakaawe Empa ya Muluku ni empaawe ya emwene,

² owo aarasela isidade aavahiwaawe ni Hirami, anaatekihawo aYixrayeli.

³ Vahoolowaya aawanano oHamate-Zoba anawinawo.

⁴ Aaraselatho oTademori munikareni, ni isidade soothokorora sooca sootheene aatenkaawe oHamate.

⁵ Aaraselatho oBeti-Horoni wa ottuttuwani ni wa ohitto ntoko isidade saalipihiwe ni ixiri, masele ni anampattika,

⁶ mpakatho oBaalate ni isidade sootheene soothokorora sooca, ni isidade sootheene saakhalaaya ikaarosawe ni ikavalusawe*. Aateka sootheene aahaawelaawe, oYerusaleemu, oLebanoni ni elapo yootheene aalamulaawe.

⁷ Ootheene yahaakhanle aYixrayeli – a ekhapira ya aHiti, awAmori, aPerizi, aHivi ni aYebusi,

⁸ eyo tiiyo yaahalahanle yahiiviwe ni aYixrayeli, vano Salomoni aahaanyesereriha awosa weera aavarihe miteko sooviha, ntoko ampwahereraaya ovara mpaka olelo.

⁹ Vaheera Salomoni khaamunyesereriharu muYixrayeli mmutekoni wooviha; awosa yaari anakhottwaawe, asitokweene a anakhotto, asitokweene a ikaarosawe ni anamweettiha a ikavalu* sa ekhotto.

¹⁰ Yaaritho asitokweenexa a mwene Salomoni – macira meeli ni miloko mithanu yaawehaweha anamiteko.

¹¹ Salomoni aamukuxa mwaana muthiyana a Farawu*, musidade ya Davide, anamurongha empa ya emwene aamutekenlaawe, niwoko aaheera: Amwaaraka khoontthuneya okhala empa ya emwene ya Davide, mwene a oYixrayeli, niwoko mapuro yaavolongwaaya Arka* a Yave, ari ootteela.

¹² Valtaarini* a Yave, aatenkaawe ohoolo wa nipithela*, Salomoni aampakela Yave sooveleela soohisa,

¹³ attharihaka sootthuneya sa sooveleela sa khula nihuku Moisesi aalamulenlaawe mwaha wa iSaabadu, nyeeri sinyowani ni sa ifesta tthaaru sa vayaakhani: Efesta ya ipaawu soohikhalano eferementu, efesta ya isimana ni efesta ya mmikotthani.

¹⁴ Aakawanyiha mikuttula sa asaserdoti* wa mitekosaya, ni aLeevi weera ehoolele icipo ni yaakhavihere asaserdoti*, attharihaka ekano ya atithawe, ni seiyo saatthuneya wa khula nihuku. Aahaathanlatho mikuttula mikuttula anamalipelela a milako soohiyanahiyana, attharihaka seiyo aalamulenlaawe Davide, mulopwana a Muluku.

¹⁵ Sootheene seiye saalamuleliwe ni mwene wa asaserdoti* ni wa aLeevi, vamoha ni seiye saalamuleliwe wa omuhakhuni, saattharihiwe hiihoweene saalamuleliwaaya.

¹⁶ Muteko wootheene Salomoni aalamulenlaawe waavariwa – okhuma nihuku yaapacenraaya mathipelo a Empa ya Yave, mpaka omalawaya. Hiiho, yaamalihiwa Empa ya Yave.

¹⁷ Vahoolowaya, Salomoni aarowa wEzeyoni-Geberi ni wElate, muxerexere ephareiya ya wEdomi.

¹⁸ Vano Hirami aamurumihela makula matokotoko yaalamuleliwa ni anamweettiihaawe a makula matokotoko, asilopwana yaasuwenle ephareiya. Awosa yaavira mphareiyani vamoha ni asilopwana a Salomoni mpaka wOfiri, ni iwe yaamuruuhelawo mwene Salomoni ikiilu* 15 300 sa eyuuma yoorikaxa.