2 Nyaha 7 - Emakhuwa Bible

Salomoni ontteeliha Empa ya Muluku

¹ Salomoni amalihaleene ovekela, waakhuruwa mooro wiirimu, onahisa sooveleela soohisa ni sooveleela sikina, ni ovuwa wa Yave waasareya Mpaani mwa Muluku.

² Asaserdoti* khayaawera ovolowa Mpaani mwa Yave, niwoko waasareyamo ovuwa wa Yave.

³ aYixrayeli ootheene yoonnaaya mooro okhuruwaka ni ovuwa wa Yave osareyaka Mpaani mwa Muluku, yaakokhora vathi yuuramihelaka ikhovesaya vatthayani, yaamulapa, enamutthapela Yave, yeeraka: “Owo ti ooreera; osivelawawe khoommala.”

⁴ Vano mwene ni aYixrayeli ootheene, yaampakela sooveleela Yave.

⁵ Mwene Salomoni aapaka sooveleela sa imombe 22 000 ni sa ikhondoolo 120 000. Hiiho, mwene ni muloko wootheene yaatteeliha Empa ya Muluku.

⁶ Asaserdoti* yaakhala mmapuronimwaya, mpakatho aLeevi, ekuxaleene ikaruma sa icipo sa Yave, yiipaka: “Osivelawawe khoommala.” Icipo saahooleliwe ni ikaruma Davide aapankaawe weera amutthapele Yave. Vano ohoolo wa aLeevi, asaserdoti* akina yiipa mapalapattaaya, muloko wootheene oreene yeemelelo.

⁷ Salomoni aatteeliha mpatta wa eriyari ya nipuwa naari mpatta wa ohoolo wa Empa ya Yave, ni vale aapakelawo sooveleela soohisa ni makhura a sooveleelela murettele, niwoko altaari* a ebronze* aapankaawe Salomoni khasaakwanawo sooveleelela murettele, sooveleela sa irooro, ni mipatta sa makhura.

⁸ Mmahukuni mathannameeli Salomoni ni aYixrayeli ootheene yaapaka efesta; aakhala nakupa mutokotoko, atthu yaarweela okhuma oLebo-Hamate mpaka nxaapwa na wExipitu.

⁹ Vanihukuni nanaathannamararu, yaapaka muthukumano wa efesta, niwoko wa mahuku mathannameeli yaatteeliha altaari*. Vahoolowaya yaapwaherera ni efesta wa mahuku mathannameelitho.

¹⁰ Vanihukuni nanaamiloko miili ni mathannamararu na mweeri wanaathanamiili, mwene aalamulela muloko orowa mmawannyaya. Hiiho, ootheene yaarowa ootteeliweene ni murima woohakalala mwa itthu sooreera Yave aampakenlaawe Davide, Salomoni ni aYixrayeli mulokwaawe.

Yave oniixoonihera wa Salomoni emaara yanaaveeli

¹¹ Salomoni amalihaleene oteka Empa ya Yave ni empa ya emwene, akwaniheraka nnenesene sootheene aatthunaawe opaka Mpaani mwa Yave, ni empaawe ya emwene,

¹² Yave aahiixoonihera wa yoowo moohiyuni, aneera: “Kohiiwa nivekelonanyu, kiniithanlela nipuro nna, ntoko Empa ya Yave ya sooveleelela.

¹³ Miyo kawala erimu weera ehirupe epula, hoye hoye kamurumiha nasope weera anyaanye elapo, hoye hoye karumihela nihooxo mulokwaaka,

¹⁴ vano mulokwaaka oniitthaneliwa Nsinanaka, wiiyeviha, onavekela, onaasaasa ekhovaaka, ni wasusa mphironimwaya moonanara, kiri wiirimu kinimwiiwa, kileveleleke yootthekaaya ni kilamiheke elapwaaya.

¹⁵ Okhuma olelo woorowa muhoolo, maithwaaka animoona ni maaruwaaka animwiiwa mavekelo ampakiwa nipuro nna.

¹⁶ Koothanla ni kootteeliha Empa ya Muluku ela, weera Nsinanaka nikhalemo mahuku ootheene. Maithwaaka ni murimaaka onookhalamo mahuku ootheene.

¹⁷ Wa nyuwo, mweetta ohoolowaka, ntoko yaapankaaya atithinyu Davide, munapaka sootheene kinoolamulelaakani, mwiiwelelaka ikanosaka ni malamulowaaka,

¹⁸ kinoolipiha ehicaanyu ya emwene, kittharihaka wiiraana kipankaaka ni atithinyu Davide, Miyo kaaweerenlaaka: ‘Nyuwo khamuhiya okhalano namarandela weera aalamule aYixrayeli.’

¹⁹ Vaheera nyuwo mwasusa, munahiya ikano ni malamulo koovanghaakani, munakokhorela miluku sikina ni munalapa,

²⁰ vano kinimwaavenxa aYixrayeli mulaponimwaka kaavanghaaka ni kinookhootta Empa ela kitteelihenraaka Nsinanaka. Kinoopakiha weera awo ekhalase ootthebwiwa ni ootheiwa eriyari ya miloko sootheene.

²¹ Ootheene eniivire wa Empa ya Muluku ela vano eri yoophwaneliwa, anootikhiniheya, ekoheke: ‘Yave opakenle heeni etthu siiyeela? wa elapo ela, ni wa Empa ya Muluku ela?’

²² Yoowaakhula eniikhale ela: ‘Aroomuhiya Yave, Muluku a makholowaaya, aakhumihale wExipitu, enavarexexa miluku sikina, elapaka ni ekokhorelaka; Tivawo Owo aaruhenlaawe erisa yootheene ela.’”